జైపూర్, వెలుగు: బీఆర్ఎస్, బీజేపీ లీడర్లు సీఎం రేవంత్ రెడ్డిపై తప్పుడు ఆరోపణలు చేస్తూ ఆయన దిష్టిబొమ్మను దహనం చేయడాన్ని జైపూర్ మండల కాంగ్రెస్ లీడర్లు తీవ్రంగా ఖండించారు. బుధవారం మండల కేంద్రంలో కాంగ్రెస్ సీనియర్ లీడర్ రిక్కుల శ్రీనివాస్ రెడ్డి ఆధ్వర్యంలో ఏర్పాటు చేసిన మీడియా సమావేశంలో ఆ పార్టీ మండల అధ్యక్షుడు మహమ్మద్ ఫయాజోద్దిన్ మాట్లాడారు. బీఆర్ఎస్, బీజేపీ పార్టీలు ఒక్కటయ్యాయని, ఆ పార్టీల లీడర్లు ఎన్నికల కోడ్ను ఉల్లంఘించి మండల కేంద్రంలో సీఎం దిష్టిబొమ్మను దహనం చేయడంపై మండిపడ్డారు.
కాంగ్రెస్ ప్రభుత్వం ప్రజలు, రైతుల పక్షాన నిలుస్తోందన్నారు. బీఆర్ఎస్ లీడర్లు మతిస్థిమితం కోల్పోయి మాట్లాడుతున్నారని, గతంలో బీఆర్ఎస్ ప్రభుత్వం ప్రజలకు ఇచ్చిన హామీల్లో ఎన్ని నెరవేర్చిందో చెప్పాలన్నారు. రైతులను బీఆర్ఎస్ మోసం చేసిందని ఫైర్అయ్యారు. కాంగ్రెస్ ప్రభుత్వంపై తప్పుడు ఆరోపణలు చేస్తే ఊరుకునేది లేదని హెచ్చరించారు. ఈ సమావేశంలో మాజీ సర్పంచులు లింగారెడ్డి, గణేశ్, నాయకులు మంతెన లక్ష్మణ్, పాపిరెడ్డి, వెంకటేశ్, నాగరాజు, మారుతి, ప్రశాంత్, శ్రీకాంత్ తదితరులు పాల్గొన్నారు.
