భువనగిరి ఖిలా మళ్లీ చేతికి చిక్కేనా?

మూడు ఎన్నికల్లో రెండుసార్లు గెలిచిన కాంగ్రెస్
ఓట్ల చీలికతో ఒక్కసారి ఓటమి

యాదాద్రి, వెలుగు : భువనగిరి పార్లమెంట్ నియోజకవర్గంలో కోమటిరెడ్డి బ్రదర్స్ పోటీలో లేకపోవడంతో ఈసారి కాంగ్రెస్ గెలుస్తుందా అనే చర్చ మొదలైంది. ఈ నియోజకవర్గంలో మూడుసార్లు ఎన్నికలు జరగగా.. రెండుసార్లు కాంగ్రెస్ గెలిచింది. ఒకసారి బీఆర్ఎస్ గెలిచింది. ఎలాగైనా భువనగిరిలో కాంగ్రెస్ తన సత్తా చాటాలని భావిస్తోంది. గతంలో మూడుమార్లు కోమటిరెడ్డి కుటుంబీకులే పోటీలో ఉండటంతో ఆ పార్టీ క్యాడర్ పట్టుదలగా పని చేసింది. కానీ, ఈసారి నియోజకవర్గంలో పూర్తి స్తాయిలో పరిచయం లేని చామల కిరణ్కుమార్ రెడ్డిని హైకమాండ్ పోటీకి దింపింది. ఈ మార్పు కాంగ్రెస్ శ్రేణుల్లో మొదట నిరాశ కలిగించింది. కానీ, గెలుపు బాధ్యతను మునుగోడు ఎమ్మెల్యే కోమటిరెడ్డి రాజగోపాల్రెడ్డికి అప్పజెప్పడంతో ఊపిరి పీల్చుకున్నారు.

రెండుమార్లు గెలుపు

ఉమ్మడి నల్లగొండలో మిర్యాలగూడ లోక్సభ స్థానానికి బదులుగా నియోజక వర్గాల పునర్విభజనలో భాగంగా 2009లో భువనగిరి లోక్సభ ఏర్పడింది. దీని పరిధిలో రంగారెడ్డి, నల్గొండ, భువనగిరి, సూర్యాపేట, జనగామ జిల్లాల్లోని ఇబ్రహీంపట్నం, మునుగోడు, నకిరేకల్, భువనగిరి, ఆలేరు, తుంగతుర్తి, జనగామ అసెంబ్లీ సెగ్మెంట్లు ఉన్నాయి. 2009లో జరిగిన మొదటి ఎన్నికల్లో కాంగ్రెస్ నుంచి కోమటిరెడ్డి రాజగోపాల్ రెడ్డి గెలిచారు. 2014 ఎన్నికల్లో రాజగోపాల్రెడ్డి నిలిచినా బీఆర్ఎస్ నుంచి బూర నర్సయ్య గౌడ్ గెలుపొందారు. 2019 ఎన్నికల్లో మళ్లీ కాంగ్రెస్ నుంచి కోమటిరెడ్డి వెంకట రెడ్డి విజయం సాధించారు.

బీజేపీ ఓట్లు చీల్చడంతో ఒకసారి ఓటమి

2009 లో కాంగ్రెస్ నుంచి రాజగోపాల్ రెడ్డి, బీజేపీ నుంచి చింత సాంబమూర్తి పోటీలో ఉండగా.. టీడీపీ, సీపీఎం, సీపీఐ కలిసి మహాకూటమిగా ఏర్పడి సీపీఎంకు చెందిన నోముల నర్సింహయ్యను బరిలోకి దించారు. ఆ ఎన్నికల్లో బీజేపీ అభ్యర్థికి కేవలం 45,805 ఓట్లు రాగా, మహాకూటమి అభ్యర్థికి 3,63,143 వచ్చినా రాజగోపాల్రెడ్డి 5,02,605 ఓట్లతో గెలుపొందారు.

2014 ఎన్నికల్లో టీడీపీ, బీజేపీ కలిసి పోటీ చేశాయి. ఉమ్మడి అభ్యర్థి నల్లు ఇంద్రసేనారెడ్డికి 1.82 లక్షల ఓట్లు, కాంగ్రెస్ అభ్యర్థి రాజగోపాల్ రెడ్డికి గతం కంటే 84 వేల ఓట్లు తక్కువగా వచ్చాయి. బీజేపీ ఎక్కువగా ఓట్లు చీల్చడంతో బూర నర్సయ్య గౌడ్ (బీఆర్ఎస్) 4,46,903 ఓట్లు వచ్చినా గెలిచారు. 2019 ఎన్నికల్లో బీజేపీ అభ్యర్థి పీవీ శ్యాంసుందర్రావు ప్రభావం చూపకపోవడంతో 65,222 ఓట్లు మాత్రమే వచ్చాయి. బూర నర్సయ్య గౌడ్ (బీఆర్ఎస్) 5,27,235 ఓట్లు వచ్చాయి. నియోజకవర్గంలోని ఆరు అసెంబ్లీల్లో బీఆర్ఎస్ ఎమ్మెల్యేలు ఉన్నా కాంగ్రెస్ అభ్యర్థిగా పోటీ చేసిన కోమటిరెడ్డి వెంకటరెడ్డి 5,32,031 ఓట్లు సాధించి గెలిచారు.

కోమటిరెడ్డి లేకుండా ఫస్ట్ ఎన్నిక

జిల్లా ఏర్పడక ముందు నుంచి భువనగిరిపై కోమటిరెడ్డి వెంకటరెడ్డికి పట్టుంది. లోక్సభ ఎన్నికల్లో కోమటిరెడ్డి సోదరులు రెండుసార్లు ఎంపీగా గెలవడం, మధ్యలో రాజగోపాల్రెడ్డి ఎమ్మెల్సీగా గెలవడంతో పట్టు మరింత పెరిగింది. కాంగ్రెస్లో కోమటిరెడ్డి సోదరుల కోసం పని చేసేవారు ఉన్నారు. ఇటీవల జరిగిన అసెంబ్లీ ఎన్నికల్లోనూ వెంకటరెడ్డి తన మార్క్ చూపించుకున్నారు. 2009లో భువనగిరి లోక్సభ స్థానం ఏర్పడినప్పటి నుంచి జరిగిన మూడు ఎన్నికల్లో కోమటిరెడ్డి సోదరులే –బరిలో నిలిచి, రెండుమార్లు గెలవడంతో ఈసారి కూడా ఆ కుటుంబం నుంచే అభ్యర్థి ఉంటారని అందరూ అనుకున్నారు.

అయితే అందరి అంచనాలకు భిన్నంగా సీఎం రేవంత్రెడ్డికి సన్నిహితుడిగా పేరున్న చామల కిరణ్కుమార్రెడ్డిని పార్టీ ఎంపిక చేసింది. భువనగిరి లోక్సభ పరిధిలోని ఏడు అసెంబ్లీ నియోజకవర్గాల్లో ఆరు కాంగ్రెస్ చేతిలోనే ఉన్నాయి. చామల గెలుపు బాధ్యతను కోమటిరెడ్డి రాజగోపాల్ రెడ్డికి సీఎం అప్పగించారు. దీంతో అప్పటివరకూ నిరాశతో ఉన్న కాంగ్రెస్ కేడర్కు ఉత్సాహం వచ్చింది. మొన్న జరిగిన అసెంబ్లీ ఎన్నికల్లో బీజేపీకి తక్కువగా ఓట్లు రావడంతో భువనగిరి ఈసారి చేతికి చిక్కుతుందని కాంగ్రెస్ కేడర్ ధీమాతో ఉంది.