- ఇసుకను కంట్రోల్ చేసిన స్ఫూర్తితో ముందుకు
- మొరం దందా చేస్తున్న 130 మంది లిస్టు రెడీ
- యాక్షన్ విషయంలో సీపీకి పూర్తి స్వేచ్ఛ
- మేయర్ నీతూ కిరణ్ భర్త దండు శేఖర్ బైండోవర్తో అక్రమార్కులకు వార్నింగ్
- దందా చేస్తున్న వారిలో గులాబీ నేతలే అధికం
- మానుకోవాలని నెలన్నర కిందటే ఇన్ఛార్జి మంత్రి జూపల్లి అల్టిమేటం
నిజామాబాద్, వెలుగు: గత బీఆర్ఎస్ గవర్నమెంట్ అండతో చెలరేగిపోయిన మొరం, మైనింగ్ మాఫియాపై కాంగ్రెస్ గవర్నమెంట్ ఫోకస్ పెట్టింది. నిజామాబాద్ జిల్లాలో మొరం బిజినెస్తో గుట్టలను కరగదీస్తున్న వారి లెక్కలు రెడీ అయ్యాయి. వాల్టా చట్టాన్ని ఖాతరు చేయక ప్రకృతి వినాశనానికి కారణమవుతున్న వారిపై కఠినంగా వ్యవహరించేలా ఆఫీసర్లకు ప్రభుత్వం ఫ్రీహ్యాండ్ ఇచ్చింది. పార్టీలతో సంబంధం లేకుండా మొరం దందా చేస్తున్న వారిపై ఉక్కుపాదం మోపాలని జిల్లా ఇన్ఛార్జి మంత్రి జూపల్లి కృష్ణారావు ఇచ్చిన ఆర్డర్స్ ఇంప్లిమెంట్ కాబోతున్నాయి. ఇసుక మాఫియాను కట్టడి చేసినట్లుగానే మొరం మాఫియాపై అధికారులు ఫోకస్ పెట్టారు. ఈ క్రమంలో నిజామాబాద్ మున్సిపల్ మేయర్ నీతూకిరణ్ భర్త దండు చంద్రశేఖర్ను బైండోవర్ చేసి అందరికీ వార్నింగ్ మెసేజ్ పంపారు.
నిరంతర సమాచార సేకరణ
జిల్లాలో మొత్తం 130 మంది మొరం దందాలో ఉన్నట్లు సీపీ కల్మేశ్వర్ స్టేషన్ల వారీగా లెక్కలు తేల్చారు. బీఆర్ఎస్ ముఖ్య లీడర్లు వారి అండతో దందా చేస్తున్న వారి సమగ్ర వివరాలు, నడుపుతున్న జేసీబీలు, టిప్పర్ల సంఖ్యను పూర్తిగా సేకరించారు. జిల్లా ఇన్ఛార్జి మంత్రిగా జూపల్లి కృష్ణారావు నెలన్నర కింద మొదటిసారి ఇందూరు వచ్చినప్పుడు పౌరుల నుంచి ఈ విషయంలో నేరుగా ఫిర్యాదులు వచ్చాయి. స్పందించిన మంత్రి తీరు మార్చుకోని పక్షంలో తీవ్ర పరిణామాలు చూస్తారని ఓపెన్ వార్నింగ్ ఇచ్చారు. దీంతో ఇసుక అక్రమ రవాణా కంట్రోల్లోకి వచ్చినా మొరం తవ్వకాలు మాత్రం ఆగడం లేదు. గ్రౌండ్ రియాల్టీని నిత్యం సేకరిస్తున్న ఆయన పరిస్థితి సెట్ చేయాలని కలెక్టర్ రాజీవ్గాంధీ, సీపీ కల్మేశ్వర్ను ఆదేశించారు.
బైండోవర్ అందుకే..
ఆర్మూర్, బోధన్, నిజామాబాద్ అర్బన్, రూరల్, బాల్కొండలో బీఆర్ఎస్ ముఖ్య లీడర్లు మొరం తవ్వకాల్లో ఇన్వాల్ అయి ఉన్నారు. బినామీలకు నిర్వహణ అప్పగించి తమను ఎవరూ గమనించడం లేదని ఇన్నాళ్లు భ్రమపడ్డారు. ఆఫీసర్లను బెదిరించి అడుగు ముందుకు వేయనీయలేదు. కాంగ్రెస్ గవర్నమెంట్ వచ్చాక కేసులు నమోదు చేస్తే బద్నాం పాలిటిక్స్ చేస్తారనే అంచనాతో జాగ్రత్త వహించారు. దందా బంద్ చేయించే ప్రయత్నంలో మేయర్ భర్త దండు చంద్రశేఖర్ ను బైండోవర్ చేశారు. రాత్రి పగలు మొరం బిజినెస్‌లో మునిగి ఉండే ఆయన్ని బైండోవర్ చేస్తే మిగితా అందరిని కట్టడి చేయొచ్చనే ఎత్తుగడ అమలు చేశారు. తీరు మారని పక్షంలో జేసీబీ, టిప్పర్లు స్వాధీనం చేసుకోవాలని, కేసులు పెట్టాలని సీపీ కల్మేశ్వర్ డిసైడ్ అయినట్లు తెలుస్తుంది
