- గత ఎన్నికల కంటే భారీగా పెరిగిన ఓట్లు
- అన్ని తానే వ్యవహరించిన ఎమ్మెల్యే రాజగోపాల్ రెడ్డి
- 2.22 లక్షల మెజార్టీతో చామల విజయభేరి
యాదాద్రి, వెలుగు: భువనగిరి లోక్సభ స్థానానికి జరిగిన ప్రతి ఎన్నికల్లో కాంగ్రెస్ గ్రాఫ్ పెరుగుతోంది. 2014 మినహా జరిగిన అన్ని ఎన్నికల్లోనూ ప్రతీ అసెంబ్లీ సెగ్మెంట్లో ఓట్లు పెంచుకుంటూ వెళ్తోంది. నియోజకవర్గాల పునర్విభజనలో భాగంగా ఉమ్మడి నల్లగొండలో మిర్యాలగూడ లోక్సభ స్థానానికి బదులుగా 2009లో భువనగిరి ఏర్పడింది. ఇందులో ఇబ్రహీంపట్నం, మునుగోడు, నకిరేకల్, భువనగిరి, ఆలేరు, తుంగతుర్తి, జనగామ అసెంబ్లీ సెగ్మెంట్లు ఉన్నాయి. 2009లో టీడీపీ మద్దతుతో మహాకూటమి తరఫున పోటీ చేసిన సీపీఎం అభ్యర్థి నోముల నర్సింహయ్యపై కాంగ్రెస్క్యాండిడేట్ కోమటిరెడ్డి రాజగోపాల్ రెడ్డి 1,39,462 ఓట్ల తేడాతో సత్తా చాటారు.
రాష్ట్రం ఏర్పడిన తర్వాత జరిగిన ఎన్నికల్లో నల్లు ఇంద్రసేనారెడ్డి(టీడీపీ పొత్తులో బీజేపీ అభ్యర్థి)కి 1,82,817, రాజగోపాల్ రెడ్డి (కాంగ్రెస్)కి 4,16,371, బీఆర్ఎస్అభ్యర్థి బూర నర్సయ్యకు 4,46,903 ఓట్లు వచ్చాయి. దీంతో బూర 30,532 ఓట్ల మెజార్టీతో గెలిచారు. ఆ తర్వాత 2019లో జరిగిన లోక్సభ ఎన్నికల్లో భువనగిరి నుంచి కాంగ్రెస్ తరఫున కోమటిరెడ్డి వెంకట్ రెడ్డి.. బీఆర్ఎస్ అభ్యర్థి బూర నర్సయ్యపై 4,796 ఓట్లతో విజయం సాధించారు. తాజాగా జరిగిన లోక్సభ ఎన్నికల్లో కాంగ్రెస్ తరఫున కొత్త అభ్యర్థి చామల కిరణ్కుమార్ రెడ్డిని బరిలోకి దించారు.
ఎన్నికల ఇన్చార్జిగా మునుగోడు ఎమ్మెల్యే కోమటిరెడ్డి రాజగోపాల్రెడ్డి తానే అభ్యర్థి అన్న తరహాలో ప్రచారం నిర్వహించారు. నియోజకవర్గం పరిధిలోని దాదాపు 46 మండలాలు, 15 మున్సిపాలిటీల్లో ఆయన పర్యటించారు. దీంతో ఒక్కో అసెంబ్లీ సెగ్మెంట్లో గత ఎన్నికల కంటే 4 వేల నుంచి 40 వేల వరకు ఓట్లు పెరిగాయి. ఈ ఎన్నికల్లో సమీప ప్రత్యర్థి బీజేపీ అభ్యర్థి బూర నర్సయ్యకు 4,01,513 ఓట్లు రాగా, చామలకు 6,23,762 ఓట్లు రావడంతో.. 2.22 లక్షల మెజార్టీ విజయ ఢంకా మోగించారు.
