యాదాద్రి, వెలుగు : అసెంబ్లీ ఎన్నికల్లో బీసీలకు టికెట్లు ఇచ్చే విషయంలో హైకమాండ్ ఇబ్బంది పడుతోందని కాంగ్రెస్ లీడర్ కుంభం అనిల్కుమార్ రెడ్డి చెప్పారు. శుక్రవారం యాదాద్రి జిల్లా భువనగిరిలో ప్రెస్‌ మీట్‌ పెట్టారు. ఈ సందర్భంగా ఆయన మాట్లాడుతూ.. పార్టీ లీడర్ రామాంజనేయులు ముందు పోటీ చేయనని చెప్పి.. తర్వాత మాట మార్చారన్నారు. పార్టీ ఢిల్లీ పెద్దలు మొదట్లో తనను పట్టించుకోలేదని అందుకే బీఆర్ఎస్లో చేరానని చెప్పారు. తర్వాత ఎంపీ కోమటిరెడ్డి సహా ఢిల్లీ పెద్దలే కాంగ్రెస్లోకి ఆహ్వానించారని పేర్కొన్నారు.
ఇప్పుడు పార్టీలో ఎలాంటి విబేధాలు లేవని, తాను ఎంపీ కోమటిరెడ్డి నాయకత్వంలోనే పని చేస్తున్నానని స్పష్టం చేశారు. భువనగిరి అసెంబ్లీ టికెట్, బీసీలతో పాటుఎవరికి ఇచ్చినా తాను వారి గెలుపునకు సహకరిస్తానన్నారు. బీఆర్ఎస్ సర్కారుకు తొమ్మిదేండ్లుగా గుర్తుకు స్కీమ్స్ ఎన్నికలు సమీపిస్తుండడంతో గుర్తుకొస్తున్నాయని విమర్శించారు. ఎమ్మెల్యే పైళ్ల శేఖర్ రెడ్డి దళిత, బీసీ, మైనార్టీ బంధుతో పాటు గృహలక్ష్మి పథకాన్ని బీఆర్ఎస్ కార్యకర్తలకే ఇస్తున్నారని ఆరోపించారు. గృహలక్ష్మి స్కీంపై ఈ నెల 9న నిరసన దీక్ష చేస్తామని ఆయన ప్రకటించారు.
