గోదావరిఖని, వెలుగు : కాంగ్రెస్ అధికారంలోకి వచ్చాక ఆర్‌‌ఎఫ్‌‌సీఎల్‌ బాధితులకు న్యాయం చేస్తామని కాంగ్రెస్ లీడర్‌ తీన్మార్ మల్లన్న హామీ ఇచ్చారు. మంగళవారం గోదావరిఖనిలో రామగుండం కాంగ్రెస్ అభ్యర్థి ఎంఎస్ రాజ్ ఠాకూర్‌‌కు మద్దతుగా సినీనటుడు శివారెడ్డితో కలిసి ఎన్నికల ప్రచారం నిర్వహించారు. ఈ సందర్భంగా ఆయన మాట్లాడుతూ రాష్ట్రవ్యాప్తంగా బీఆర్ఎస్ ప్రజాదరణ కోల్పోతుందని, రాష్ట్రంలో కాంగ్రెస్ ప్రభుత్వం వస్తుందని మల్లన్న ఆశాభావం వ్యక్తం చేశారు.
సీఎం కేసీఆర్ కాళేశ్వరం ప్రాజెక్టు ద్వారా రూ.లక్షల కోట్ల ప్రజాధనాన్ని దుర్వినియోగం చేసి అవినీతికి పాల్పడ్డారని ఆరోపించారు. కాంగ్రెస్ అభ్యర్థి ఎంఎస్ రాజ్‌‌ఠాకూర్‌ మాట్లాడుతూ రామగుండం ప్రజలకు అండగా తాను ఉంటానని, ఎవరికి ఏ కష్టం వచ్చినా ఆదుకుంటానని తెలిపారు. సినీనటుడు శివారెడ్డి తన మిమిక్రీ ద్వారా ప్రజలను ఆకట్టుకున్నారు. అంతకుముందు అడ్డగుంటపల్లిలోని అబ్దుల్‌ కలామ్‌ విగ్రహం నుంచి కళ్యాణ్‌‌నగర్‌, లక్ష్మీనగర్‌ మీదుగా గాంధీ చౌరస్తా వరకు భారీ ర్యాలీ నిర్వహించారు.
