పెద్దపల్లి, వెలుగు: పెద్దపల్లి నియోజకవర్గం అభివృద్ధి చెందాలంటే వివేక్ వెంకటస్వామి వారసుడు గడ్డం వంశీకృష్ణకు ఎంపీ టికెట్ కేటాయించాలని కాంగ్రెస్ సీనియర్ లీడర్లు ఉనుకొండ శ్రీధర్ పటేల్, బాలసాని సతీశ్ గౌడ్ తదితరులు పార్టీ హైకమాండ్కు, ముఖ్యమంత్రి రేవంత్రెడ్డికి విజ్ఞప్తి చేశారు. పెద్దపల్లి జిల్లా కేంద్రంలో శుక్రవారం వారు మీడియాతో మాట్లాడారు. కేంద్రమంత్రిగా కాకా వెంకటస్వామి, ఎంపీగా ఆయన తనయుడు వివేక్ వెంకటస్వామి పెద్దపల్లి నియోజకవర్గాన్ని అన్ని రంగాల్లో అభివృద్ధి చేశారని, నియోజకవర్గ ప్రజలకు ఎల్లవేళలా అందుబాటులో ఉండేవారని వారు గుర్తుచేసుకున్నారు. విశాక ట్రస్ట్ ద్వారా గ్రామగ్రామాన అనేక సేవా కార్యక్రమాలు చేపడుతున్నారని చెప్పారు.
అలాంటి కాకా కుటుంబం నుంచి రాజకీయాల్లోకి వచ్చిన గడ్డం వంశీకృష్ణకు కాంగ్రెస్ పార్టీ టికెట్ కేటాయించాలన్నారు. కాంగ్రెస్ నాయకులు, కార్యకర్తలంతా ఏకతాటిపై ఉండి, టికెట్ఇప్పించుకోవడంతో పాటు గెలిపించుకోవాలని వారు కోరారు. మీడియా సమావేశంలో సయ్యద్ సజ్జాద్, అడ్డగుంట శ్రీనివాస్, ఉనుకొండ భూమయ్య, ప్రవీణ్, ఇమ్రాన్, నరెందర్ రెడ్డి, బండి రాజు, తోట మహేశ్ తదితరులు పాల్గొన్నారు.
