- కొల్లాపూర్లో ఇప్పటికే పాగా
- రేపు అచ్చంపేటలో అవిశ్వాస తీర్మానం
- నాగర్ కర్నూల్ చైర్పర్సన్పై అవిశ్వాసం పెట్టేందుకు రెడీ
నాగర్కర్నూల్, వెలుగు: రాష్ట్రంలో పార్లమెంట్ ఎన్నికలు ముగిసిన తర్వాత కాంగ్రెస్ నాయకులు మున్సిపాలిటీలపై దృష్టి సారించారు. ఇప్పటికే కొల్లాపూర్ మున్సిపాలిటీ కాంగ్రెస్ ఖాతాలో పడింది, బుధవారం అచ్చంపేట మున్సిపల్ చైర్మన్ అవిశ్వాసం మీద ఓటింగ్ జరుగనుంది. నాగర్ కర్నూల్ మున్సిపాలిటీలో కాంగ్రెస్ కౌన్సిలర్లు చైర్పర్సన్పై అవిశ్వాస తీర్మానానికి సిద్ధమయ్యారు. సోమవారం రాత్రి ఎమ్మెల్సీ కూచుకుళ్ల దామోదర్రెడ్డితో సమావేశమైన 15 మంది కౌన్సిలర్లు కలెక్టర్కు అవిశ్వాస నోటీసు ఇచ్చేందుకు సిద్ధమవుతున్నారు.
జిల్లాలో నాగర్ కర్నూల్, అచ్చంపేట, కొల్లాపూర్, కల్వకుర్తి మున్సిపాలిటీల్లో బీఆర్ఎస్ చైర్మన్లు ఉన్నారు. గత నెల 31న కొల్లాపూర్ మున్సిపాలిటీ కాంగ్రెస్ వశమైంది. ఇప్పటికే అచ్చంపేట మున్సిపల్ చైర్మన్పై అవిశ్వాస తీర్మానం ప్రతిపాదించిన కాంగ్రెస్ కౌన్సిలర్లు క్యాంపునకు వెళ్లిపోయారు. బీఆర్ఎస్ నుంచి గెలిచిన నలుగురు కౌన్సిలర్లు కాంగ్రెస్లో చేరగా, మరో ఇద్దరు చేరనున్నట్లు సమాచారం. అచ్చంపేట మున్సిపాలిటీని దక్కించుకునేందుకు మాజీ ఎమ్మెల్యే గువ్వల బాలరాజు, సిట్టింగ్ మున్సిపల్ చైర్మన్ నర్సింహాగౌడ్ అన్ని రకాలు ప్రయత్నాలు చేస్తున్నా అవి ఎంత వరకు సఫలమవుతాయో బుధవారం తేలనుంది.
అచ్చంపేటలో హై టెన్షన్..
అచ్చంపేట మున్సిపాలిటీపై గురిపెట్టిన కాంగ్రెస్ నాయకులు బీఆర్ఎస్ చైర్మన్ను కుర్చీ దింపడానికి ప్రయత్నించినా, గతంలో ఎమ్మెల్యే వంశీకృష్ణ పెద్దగా ఇంట్రెస్ట్ చూపించలేదు. మున్సిపల్ ఎన్నికల్లో కాంగ్రెస్ నేతలను ఓడించిన వారిని పార్టీలో చేర్చుకొని వారి ప్రాధాన్యం ఎందుకు తగ్గించాలని ఎమ్మెల్యే వంశీ కృష్ణ భావించారు. బీఆర్ఎస్ కౌన్సిలర్లను చేర్చుకోవడానికి మొదట ఇష్టపడని ఎమ్మెల్యే మారిన పరిస్థితులు, బీఆర్ఎస్ లీడర్ల దాడులతో తన స్టాండ్ ను మార్చుకున్నారు.
ఫోన్ ట్యాపింగ్తో మాజీ ఎమ్మెల్యే గువ్వల బాలరాజు తనను రాజకీయంగా ఇబ్బంది పెట్టాడన్న ఆగ్రహంతో ఉన్న ఎమ్మెల్యే వంశీకృష్ణ అచ్చంపేట మున్సిపాలిటీలో బీఆర్ఎస్ అనే మాట వినిపించకూడదనే నిర్ణయానికి వచ్చినట్లు తెలిసింది. నల్లమలలో బీఆర్ఎస్ ఆనవాళ్లు లేకుండా చేయాలన్న పట్టుతో ఉన్నారు. మున్సిపల్ ఎలక్షన్స్లో బీఆర్ఎస్ నుంచి12 మంది, కాంగ్రెస్ నుంచి ఏడుగురు, బీజేపీ నుంచి ఒక కౌన్సిలర్ గెలిచారు.
ప్రస్తుతం బీఆర్ఎస్ నుంచి నలుగురు కౌన్సిలర్లు కాంగ్రెస్లో చేరారు. మద్దతివ్వడానికి బీజేపీ కౌన్సిలర్ ఓకే అనడంతో కాంగ్రెస్ కౌన్సిలర్లు గత నెల 25న చైర్మన్పై అవిశ్వాస తీర్మానం ప్రతిపాదించారు. అనంతరం క్యాంపునకు వెళ్లిపోయారు. కాంగ్రెస్లోకి వెళ్లిన నలుగురు కౌన్సిలర్లు పార్టీ వీడకుండా ఉండేందుకు బీఆర్ఎస్ బంపర్ ఆఫర్ ఇస్తున్నట్లు ప్రచారం జరుగుతోంది.
బీఆర్ఎస్ నులేకుండా చేస్తాం..
బీఆర్ఎస్ పదేండ్ల పాలనలో జిల్లాలోని నాలుగు మున్సిపాలిటీల్లో పూర్తి స్థాయిలో అభివృద్ది జరగలేదు. బీఆర్ఎస్ ఎమ్మెల్యేలు నియంతృత్వ పోకడలతో కౌన్సిలర్లు, మున్సిపల్ పాలకవర్గాన్ని పట్టించుకోలేదు. నిధులు ఖర్చు చేసే విషయంలోనూ పక్షపాతంతో వ్యవహరించారు. అన్ని వార్డులను సమానంగా డెవలప్ చేస్తాం. మున్సిపాలిటీల్లో బీఆర్ఎస్ పార్టీ లేకుండా చేస్తాం.
వంశీకృష్ణ,ఎమ్మెల్యే, నాగర్ కర్నూల్ డీసీసీ అధ్యక్షుడు
నోటీస్ ఇచ్చేందుకు రెడీ..
నాగర్ కర్నూల్ మున్సిపల్ చైర్ పర్సన్ను గద్దె దించేందుకు కాంగ్రెస్ నాయకులు పావులు కదుపుతున్నారు. చైర్పర్సన్, వైస్ చైర్మన్, మరో ముగ్గురు కౌన్సిలర్లు మినహా మిగిలిన వారిని కాంగ్రెస్లో చేర్చుకునేందుకు ఎమ్మెల్సీ కూచుకుళ్ల దామోదర్రెడ్డి గ్రీన్ సిగ్నల్ ఇచ్చారు. త్వరలోనే నాగర్కర్నూల్లోనూ అవిశ్వాసం పెట్టేందుకు హస్తం నేతలు రెడీ అవుతున్నారు. ఇదిలాఉంటే కల్వకుర్తి మున్సిపాలిటీలో కాంగ్రెస్కు సంఖ్యా బలం లేకపోవడం, అవిశ్వాసం, మెజార్టీకి అవసరమైన మ్యాజిక్ లేక ఇండిపెండెంట్లపై ఆధారపడలేక అవిశ్వాస ప్రయత్నాలకు దూరంగా ఉన్నారు.
