జవహర్ నగర్, వెలుగు: ‘‘ఏంరా.. ఒర్రుతున్నరు. మీ పీసీసీ ప్రెసిడెంట్ రేవంత్ రెడ్డి ఏం చేసిండు”అంటూ మంత్రి మల్లారెడ్డి కాంగ్రెస్ నేతలను తిట్టారు. జవహర్ నగర్ మున్సిపల్ కార్పొరేషన్ పరిధిలో నిర్వహించిన పాదయాత్రలో మంత్రి.. కాంగ్రెస్ నాయకులపై విరుచుకుపడ్డారు. ఎమ్మెల్యేలంతా రోజూ పబ్లిక్ లో ఉండాలని, ఏడాదిలో ఎన్నికలు వచ్చే అవకాశం ఉందని కొన్ని రోజుల కిందట సీఎం కేసీఆర్ ఇచ్చిన ఆదేశాలతో మేడ్చల్ జిల్లా లో మంత్రి మల్లారెడ్డి ఆదివారం జవహర్ నగర్ మున్సిపల్ కార్పొరేషన్లోని గబ్బిలాలపేట్లో పాదయాత్ర చేపట్టారు. విషయం తెలుసుకున్న కాంగ్రెస్ పార్టీ నాయకులు మంత్రిని అడ్డుకున్నారు. ఎన్నికలసమయంలో మంత్రులు కేటీఆర్, మల్లారెడ్డి జవహర్ నగర్ ప్రజలకు ఇచ్చిన వాగ్దానాలు ఏం చేశారంటూ నిలదీశారు.
దీంతో టీఆర్ఎస్ నాయకులు, కాంగ్రెస్ నేతల మధ్య కాసేపు తోపులాట జరిగింది. అక్కడే ఉన్న పోలీసులు కాంగ్రెస్ నాయకులను అడ్డుకున్నారు. తనను అడ్డుకోవడంతో ఆవేశానికి లోనైన మంత్రి మల్లారెడ్డి.. ‘‘మీ రేవంత్ రెడ్డి ఏం చేసిండు” అని విరుచుకుపడ్డారు. తర్వాత కాంగ్రెస్ నేతలు మీడియాతో మాట్లాడారు. టీఆర్ఎస్ నాయకులకు జవహర్ నగర్ ప్రజల సమస్యలు పరిష్కరించాలనుంటే ఎన్నికల ముందు 58, 59 జీవో కింద పేద ప్రజలకు పట్టాలు ఇస్తామన్న నిలబెట్టుకోవాలని డిమాండ్ చేశారు. కార్పొరేషన్ పరిధిలో ఉన్న సుమారు ఆరువేల ఎకరాల ప్రభుత్వ భూములు కబ్జాలు చేయడానికే మంత్రి మల్లారెడ్డి, మేయర్, డిప్యూటీ మేయర్, కార్పొరేటర్లు ప్రయత్నిస్తున్నారని ఫైరయ్యారు.
కార్పొరేషన్ పరిధిలో నివసిస్తున్న పేద, బడుగు, బలహీన వర్గాల ప్రజల సమస్యలను పట్టించుకోకుండా భూ ఆక్రమణలే తమ ధ్యేయంగా పనిచేస్తున్నారని విమర్శించారు. జవహర్ నగర్ కార్పొరేషన్ తన గుండెకాయ అని ఎక్కడపడితే అక్కడ మాట్లాడే మల్లారెడ్డి.. జవహర్ నగర్లో తిరగడం సిగ్గుచేటన్నారు. ఎన్నికల సమయంలో చేసిన వాగ్దానాలను, ప్రస్తుతం ఇబ్బందులు ఎదుర్కొంటున్న ప్రతి సమస్యను వెంటనే పరిష్కరించాలని, కార్పొరేషన్ పరిధిలో నిబంధనలకు విరుద్ధంగా జరుగుతున్న అక్రమ వెంచర్లను, నిర్మాణాలను అడ్డుకొని ప్రభుత్వ భూములు కాపాడాలన్నారు.
