మేడిపల్లి, వెలుగు: మంత్రి మల్లారెడ్డి చెప్పే కల్లబొల్లి మాటలను జనం నమ్మే పరిస్థితుల్లో లేరని మేడ్చల్ సెగ్మెంట్ కాంగ్రెస్ అభ్యర్థి తోటకూర వజ్రేశ్ యాదవ్ తెలిపారు. కాంగ్రెస్ను గెలిపిస్తే మేడ్చల్ సెగ్మెంట్లో ఆరు గ్యారంటీలను అమలు చేసే బాధ్యత తనదని ఆయన హామీ ఇచ్చారు. శుక్రవారం బోడుప్పల్, పీర్జాదిగూడ కార్పొరేషన్ల పరిధి మేడిపల్లి, పర్వతాపూర్లోని పలు కాలనీల్లో పోగుల నర్సింహా రెడ్డి, తుంగతుర్తి రవితో కలిసి ఆయన ప్రచారం నిర్వహించారు. ఈ సందర్భంగా వజ్రేశ్ యాదవ్ మాట్లాడుతూ.. పీర్జాదిగూడలో చిన్న వానకే ఇండ్లలోకి నీరు చేరుతుందని.. జనం ఇబ్బంది పడుతున్నారని వాపోయారు. పీర్జాదిగూడ, బోడుప్పల్లో రోడ్లు, డ్రైనేజీలు అధ్వానంగా ఉన్నాయన్నారు.
స్థానికంగా పుట్టి పెరిగిన వ్యక్తిగా ఇక్కడి సమస్యలు తనకు తెలుసన్నారు. ఈ నెల 30న జరిగే ఎన్నికల్లో హస్తం గుర్తుకు ఓటేసి తనను భారీ మెజార్టీతో గెలిపించాని ఆయన కోరారు. అనంతరం బోడుప్పల్లోని కుతుబ్ షాహీ మసీదు వద్ద ముస్లిం మత పెద్దలతో కలిసి వజ్రేశ్యాదవ్ ప్రార్థనలు చేశారు. ఎన్నికల ప్రచారంలో బోడుప్పల్ మాజీ సర్పంచ్ తోటకూర లక్ష్మీ, సీనియర్ నాయకులు కొత్త కిశోర్ గౌడ్, పీర్జాదిగూడ ప్రధాన కార్యదర్శి పన్నాల శ్రీనివాస్ రెడ్డి, తోటకూర రవీందర్ యాదవ్ పాల్గొన్నారు.
