- మేడిపల్లి పోలీసులకు ఎమ్మెల్సీ తీన్మార్ మల్లన్న ఫిర్యాదు
- కొన్ని సీన్లు పోలీసులను అవమానించేలా ఉన్నాయని ఫైర్
మేడిపల్లి, వెలుగు: పుష్ప–2 హీరో అల్లు అర్జున్, డైరెక్టర్ సుకుమార్పై చర్యలు తీసుకోవాలని కాంగ్రెస్ ఎమ్మెల్సీ తీన్మార్ మల్లన్న మేడిపల్లి పోలీస్ స్టేషన్లో సోమవారం ఫిర్యాదు చేశారు. అనంతరం మాట్లాడుతూ.. పుష్ప సినిమాలో పోలీసులను అవమానించేలా కొన్ని సీన్లు ఉన్నాయని, ఓ సన్నివేశంలో పోలీసు అధికారిని స్విమ్మింగ్ పూల్ లో పడేసి హీరో అల్లు అర్జున్ అందులో మూత్రం పోస్తాడని చెప్పారు. ఇది పోలీసుల మానసిక స్థితిని దెబ్బతీసే విధంగా ఉందన్నారు. ఇలాంటి సన్నివేశాలను తొలగించాలని డిమాండ్చేశారు.
స్మగ్లర్లు, నేరగాళ్లను హీరోలుగా చూపెట్టే సినిమాలకు సెన్సార్ బోర్డు, పోలీస్ డిపార్ట్మెంట్, ప్రభుత్వం అనుమతి ఇవ్వకూడదన్నారు. స్మగ్లింగ్ ను ఆపడానికి ప్రయత్నించిన పోలీసులను విలన్లుగా ఎలా చూపిస్తారని మల్లన్న ప్రశ్నించారు. ఇది పోలీసులు, వారి కుటుంబ సభ్యుల మనోభావాలను దెబ్బతీయడమే అవుతుందన్నారు. అల్లు అర్జున్, డైరెక్టర్ సుకుమార్పై ఫిర్యాదు అందిందని, విచారణ చేపట్టి కేసు నమోదు చేస్తామని మేడిపల్లి సీఐ గోవింద రెడ్డి వెల్లడించారు.
