- రైతుబంధు విషయంలో కేసీఆర్వి అబద్ధాలు
- కాంగ్రెస్ ఎంపీ ఉత్తమ్ కుమార్ రెడ్డి
మేళ్లచెరువు, వెలుగు : నామినేషన్లలోపు రైతుబంధు డబ్బులు ఇవ్వాలని తాను రైతుల తరఫున మాట్లాడితే కేసీఆర్ దాన్ని వక్రీకరించి, రైతుబంధు ఆపాలన్నట్లు రాష్ట్రమంతా తప్పుడు ప్రచారం చేస్తున్నారని కాంగ్రెస్ ఎంపీ ఉత్తమ్ కుమార్ రెడ్డి మండిపడ్డారు. సూర్యాపేట జిల్లా హేమ్లాతండా, ఎర్రవరం గ్రామాల్లో మంగళవారం ఆయన పర్యటించారు.
ఈ సందర్భంగా మాట్లాడుతూ.. రైతుబంధు విషయంలో తనపై కేసీఆర్ అసత్య ప్రచారం చేస్తున్నారని, దీన్ని ఖండిస్తున్నట్లు తెలిపారు. ఓటమి భయం కేసీఆర్లో మొదలైందని, అందుకే ఏం మాట్లాడుతున్నారో ఆయనకే అర్థం కావడం లేదని విమర్శించారు. కాళేశ్వరం ప్రాజెక్టులో జరిగిన అవినీతి వల్లే మేడిగడ్డ కూలేదశకు చేరుకుందని, మేడిగడ్డలాగే బీఆర్ ఎస్ ప్రభుత్వం కూడా ఎన్నికల్లో కూలిపోవడం ఖాయమని ఉత్తమ్ విమర్శించారు.
