చాన్స్​ ఎవరికో? కాంగ్రెస్​లో పాత, కొత్త లీడర్ల మధ్య తీవ్ర పోటీ

• ఎమ్మెల్యేలు ప్రయారిటీ ఇవ్వడం లేదని దూరంగా కొందరు లీడర్లు
• త్వరలో లోకల్​బాడీ ఎలక్షన్స్
• ఎన్నికల నిర్వహణపై ఆఫీసర్ల ఫోకస్

మహబూబ్​నగర్, వెలుగు:  పార్టీలో ఏండ్లుగా కొనసాగుతున్న వారికి కాకుండా.. కొందరు ఎమ్మెల్యేలు బీఆర్ఎస్​ నుంచి వచ్చిన వారికి ప్రయారిటీ ఇస్తున్నారనే టాక్​ నడుస్తోంది. అసెంబ్లీ, పార్లమెంట్​ ఎన్నికల అనంతరం కాంగ్రెస్​లో చేరిన వారికి ప్రాధాన్యత ఇస్తున్నారని చెబుతూ పాత క్యాడర్​ దూరంగా ఉంటోంది. ఈ తరుణంలో లోకల్​ బాడీ ఎన్నికలు సమీపిస్తుండడంతో ఎవరికి చాన్స్​ వస్తుందనే విషయంపై చర్చ జరుగుతోంది. పార్టీలో కొత్తగా చేరిన వారికి చాన్స్​ ఇస్తామని ఇప్పటికే పలువురు ఎమ్మెల్యేలు హామీ ఇచ్చినట్లు తెలుస్తోంది. ఈ క్రమంలో ఎప్పటి నుంచో పార్టీలో ఉంటూ గత అసెంబ్లీ ఎన్నికల్లో గెలుపు కోసం పని చేసిన తమను పక్కన బెడుతున్నారని సీనియర్లు అసంతృప్తితో ఉన్నారు. సీనియర్లకే ప్రాధాన్యత ఇవ్వాలనే డిమాండ్​ వస్తోంది.

ఎన్నికల ముందు భారీగా చేరికలు..

2023లో జరిగిన అసెంబ్లీ ఎన్నికలకు ముందు, 2024లో జరిగిన పార్లమెంట్​ ఎన్నికలకు ముందు బీఆర్ఎస్​ నుంచి ఉమ్మడి పాలమూరు జిల్లాకు చెందిన కొందరు ఎంపీపీలు, జడ్పీటీసీసీలు, సర్పంచులు, ఎంపీటీసీలు, కౌన్సిలర్లు, మున్సిపల్​ చైర్మన్లు, పార్టీ లీడర్లు కాంగ్రెస్​లో భారీగా చేరారు. ఇంత వరకు బాగానే ఉన్నా.. ఇప్పుడు వీరంతా త్వరలో జరిగే లోకల్​ బాడీ ఎలక్షన్స్​లో మళ్లీ పోటీ చేసేందుకు సిద్ధం అవుతున్నారు. గ్రామాల్లో జరిగే మంత్రులు, ఎమ్మెల్యేల పర్యటనల్లో వీరే హడావుడి చేస్తున్నారు. లోకల్​గా కాంగ్రెస్​ లీడర్లు ఉన్నా..  వారిని పక్కకు పెడుతున్నారు. వీరి తీరుతో కాంగ్రెస్​ సొంత క్యాడర్  చాలా గ్రామాల్లో నారాజ్​లో ఉంది. 

పార్టీకి దూరంగా..

గత అసెంబ్లీ ఎన్నికల్లో ఉమ్మడి పాలమూరు జిల్లాలోని 14 అసెంబ్లీ స్థానాల్లో కాంగ్రెస్​ 12 స్థానాల్లో విజయం సాధించింది. ఈ విజయం కోసం పార్టీ క్యాడర్​ సీరియస్​గా గ్రౌండ్​ వర్క్  చేసింది. అయితే బీఆర్ఎస్​ హయాంలో ఆ పార్టీకి చెందిన కొందరు లీడర్లు ఇల్లీగల్​ దందాలు నిర్వహించారనే ఆరోపణలు రావడంతో.. దీనిపై అప్పట్లో కాంగ్రెస్, బీజేపీ లీడర్లు ఉద్యమాలు, ధర్నాలు, రాస్తారోకోలు చేశారు. అయితే ఇప్పుడు బీఆర్ఎస్​ నుంచి కాంగ్రెస్​లో చేరిన వారిలో ఎక్కువగా ఇసుక, సాండ్​, మైన్స్​ దందాలు చేసిన వారే ఉన్నారనే టాక్​ ఉంది. 

Also Read :- 555 టీఎంసీలు ఇవ్వాల్సిందే

తమ దందాలను యథావిధిగా కొనసాగించుకోవడంతో పాటు పార్టీలో పదవులు దక్కించుకునేందుకు వీరు పార్టీలు మారినట్లు పబ్లిక్​ బహిరంగంగానే చర్చించుకుంటున్నారు. కొందరు ఎమ్మెల్యేలు కూడా వీరికే సపోర్ట్​గా ఉంటున్నారనే టాక్​ వస్తోంది. సొంత క్యాడర్​ కలిసేందుకు వచ్చినా కొందరు ఎమ్మెల్యేలు టైం కూడా ఇవ్వడం లేదని గుసగుసలు వినిపిస్తున్నాయి. 

మరికొందరు ఎమ్మెల్యేలు క్యాడర్​ను పట్టించుకోకుండా పూర్తిగా పక్కకు పెట్టేశారనే విమర్శలున్నాయి. ఇక లోకల్​ బాడీ ఎలక్షన్స్​లో పోటీ చేసేందుకు పాత క్యాడర్​ సిద్ధంగా ఉన్నా.. మంత్రులు, ఎమ్మెల్యేలు సపోర్ట్  చేయకూండా దూరం పెడుతుండడంతో వారంతా పార్టీ కార్యక్రమాల్లో పాల్గొనకుండా దూరంగా ఉంటున్నారనే టాక్​ నడుస్తోంది.