డీసీసీబీ పీఠంపై కాంగ్రెస్​ నజర్! .. నాగభూషణంపై అవిశ్వాసానికి నోటీస్​

• డీసీఓకు నోటీస్​అందజేసిన 11 మంది సొసైటీ డైరెక్టర్లు ​ 
• చైర్మన్​ రేసులో తుళ్లూరి బ్రహ్మయ్య, యలగొండస్వామి?

ఖమ్మం, వెలుగు: ఉమ్మడి ఖమ్మం జిల్లా కేంద్ర సహకార బ్యాంక్​ (డీసీసీబీ)​ పై కాంగ్రెస్​ పార్టీ కన్నేసింది. రాష్ట్రంలో ప్రభుత్వం మారిన తర్వాత జరిగిన పరిణామాల్లో డీసీసీబీ పీఠాన్ని దక్కించుకునేందుకు రంగం సిద్ధం చేసింది. ప్రస్తుతం డీసీసీబీ చైర్మన్​గా ఉన్న కూరాకుల నాగభూషణం వి.వెంకటాయపాలెం సొసైటీ చైర్మన్. సొసైటీ చైర్మన్​గా ఉన్న ఆయనపై అవిశ్వాసానికి 11 మంది నోటీస్​ఇచ్చారు. 

ఇక్కడ మొత్తం 13 మందికి గాను 11 మంది అవిశ్వాసం నోటీసులపై సంతకాలు చేసి, జిల్లా కో ఆపరేటివ్​ ఆఫీసర్​(డీసీవో)కు నోటీస్ అందజేయడంతో అవిశ్వాసం నెగ్గే అవకాశాలు కనిపిస్తున్నాయి. ఇక్కడ వారు నెగ్గితే నాగభూషణం డీసీసీబీ చైర్మన్ పదవి కూడా కోల్పోవలసి వస్తుంది. దీంతో ఆ చైర్మన్ పీఠాన్ని దక్కించుకునేలా కాంగ్రెస్​ ప్లాన్​ చేస్తోంది. ఇది ఉమ్మడి ఉమ్మడి జిల్లా రాజకీయాల్లో​ చర్చనీయాంశంగా మారింది. జిల్లా నుంచి ప్రాతినిధ్యం వహిస్తున్న మంత్రుల అనుచరులు చైర్మన్​ పీఠం కోసం పోటీ పడుతుండడంతో ఎవరికి చాన్స్ వస్తుందుదోననే ఆసక్తి నెలకొంది.

వచ్చే ఏడాది ఫిబ్రవరి వరకు గడువు 

2020 ఫిబ్రవరిలో ఖమ్మం డీసీసీబీ ఎన్నికలు జరిగాయి. వచ్చే ఏడాది ఫిబ్రవరి వరకు ఈ పాలకవర్గానికి గడువు ఉంది. ప్రస్తుతం డీసీసీబీ చైర్మన్​ గా ఉన్న కూరాకుల నాగభూషణం రఘునాథపాలెం మండలం వి.వెంకటాయపాలెం పీఏసీఎస్​ నుంచి ప్రాతినిధ్యం వహిస్తున్నారు. సొసైటీలో నాగభూషణంతో కలిపి మొత్తం 13 మంది సభ్యులు ఉండగా, గతంలో అప్పటి మంత్రి పువ్వాడ అజయ్​ కుమార్​ సపోర్టుతో సొసైటీ చైర్మన్​గా ఏకగ్రీవంగా ఎన్నికయ్యారు. 

ఆ తర్వాత డీసీసీబీ చైర్మన్​గా ఎన్నిక అయ్యారు. ప్రభుత్వం మారడంతో ఇప్పుడు సీన్​ రివర్స్​ అయింది. 13 మందికి గాను, 11 మంది నాగభూషణంకు వ్యతిరేకంగా అవిశ్వాసం నోటీస్​ పై సంతకాలు చేశారు. గురువారం ఖమ్మం జిల్లా సహకారశాఖ అధికారి విజయనిర్మలను కలిసి నోటీస్​ను అందజేశారు. వి.వెంకటాయపాలెం సొసైటీ చైర్మన్ గా నాగభూషణంను అవిశ్వాసం ద్వారా తప్పిస్తే డీసీసీబీ చైర్మన్​ గా ఆయన అనర్హుడిగా మారే అవకాశం ఉండడంతో కాంగ్రెస్​ ఈ ఎత్తు వేసింది.​

రేసులో మంత్రుల అనుచరులు.. 

కొత్త డీసీసీబీ చైర్మన్​ రేసులో ఉన్న నాయకులు ఇప్పటికే తమ ప్రయత్నాలు చేసుకుంటున్నారు.​ రాష్ట్ర రెవెన్యూశాఖ మంత్రి పొంగులేటి శ్రీనివాస​రెడ్డి అనుచరుడిగా ఉన్న ప్రస్తుత డీసీసీబీ డైరెక్టర్​ తుళ్లూరి బ్రహ్మయ్య, రాష్ట్ర వ్యవసాయశాఖ మంత్రిగా ఉన్న తుమ్మల నాగేశ్వరరావు అనుచరుడు, ముదిగొండ పీఏసీఎస్​ చైర్మన్​ తుపాకుల యలగొండస్వామితో పాటు మరికొందరు రేసులో ఉన్నారు. మొత్తం ఉమ్మడి ఖమ్మం జిల్లా డీసీసీబీ పరిధిలో 101 పీఏసీఎస్​లు ఉన్నాయి. ఖమ్మం జిల్లాలో 76, భద్రాద్రి కొత్తగూడెం జిల్లాలో 21, ములుగు జిల్లాలో రెండు, మహబూబాబాద్​ జిల్లాలో రెండు పీఏసీఎస్​లు ఉన్నాయి. పీఏసీఎస్​ చైర్మన్లుగా ఉన్నవారే డీసీసీబీ డైరెక్టర్లుగా ఎన్నికవుతారు. అలా మొత్తం 21 మంది డీసీసీబీ డైరెక్టర్ల నుంచి డీసీసీబీ చైర్మన్​ను ఎన్నుకుంటారు.