హర్యానాలోని కాంగ్రెస్ పార్టీలో అసెంబ్లీ ఎన్నికల ముంగిట గొడవలు రోజుకొకటి బయటపడుతున్నాయి. ఇక్కడ 2014లో పవర్ కోల్పోయిన ఈ గ్రాండ్ ఓల్డ్ పార్టీకి ఐదేళ్ల తర్వాత కూడా ‘హస్త’వాసి మారేట్లు కనిపించట్లేదనేది ఎనలిస్టుల టాక్. హర్యానాలో కాంగ్రెస్ పార్టీ కష్టాలు ఇప్పట్లో తీరేలా లేవు. హైకమాండ్ సోనియాగాంధీ స్టేట్ కాంగ్రెస్కి ఈమధ్య రిపేర్ చేసినా గాడినపడేట్లు లేదు. ఒకపక్క అసెంబ్లీ ఎన్నికలకు కౌంట్డౌన్ మొదలైంది. ఈ గందరగోళానికి రీసెంట్గా టికెట్ల లొల్లి తోడైంది. తమ సపోర్టర్లకు పోటీ చేసే ఛాన్స్ ఇవ్వకపోవటంతో సీనియర్ నేతలు ఓపెన్గానే అసంతృప్తి వ్యక్తం చేస్తున్నారు. పీసీసీ మాజీ చీఫ్ అశోక్ తన్వర్ ఏకంగా ఢిల్లీలోని సోనియాగాంధీ ఇంటి వద్ద నిరసనకు దిగటం పార్టీలో ప్రస్తుత పరిస్థితికి అద్దం పడుతోంది. ఆ తర్వాత ఆయన పార్టీకి రాజీనామా చేసేశారు. పార్టీ ‘హుడా కాంగ్రెస్’గా మారిందని ఆరోపించారు. ఈ ఘటన తర్వాత టికెట్ల కేటాయింపుపై హైకమాండ్కూడా సీరియస్ అయింది. కాంగ్రెస్ ప్రెసిడెంట్ సోనియాగాంధీకి గతంలో పొలిటికల్ సెక్రెటరీగా పనిచేసిన అహ్మద్ పటేల్.. హర్యానాలో టికెట్ల కేటాయింపు జరిగిన తీరుపై తీవ్ర ఆగ్రహంతో ఉన్న వీడియో వెలుగులోకి వచ్చింది.
సీనియర్లకు కాస్త ఊరట
హర్యానా శాసన సభ ఎన్నికలకు అభ్యర్థులను ఎంపిక చేసే బాధ్యతను ఆరుగురు సభ్యుల కమిటీకి అప్పగించారు. అందులో స్క్రీనింగ్ కమిటీ మెంబర్, మాజీ సీఎం భూపిందర్సింగ్ హుడా ఒకరు. టికెట్ల పంపకంలో పార్టీలోని సీనియర్లందరికీ సమాన అవకాశం ఇవ్వలేదనే కంప్లయింట్లు హైకమాండ్కి పెద్దఎత్తున అందాయి. ఈ నేపథ్యంలో హుడాతోపాటు హర్యానా పార్టీ వ్యవహారాల ఇన్చార్జ్ గులాం నబీ ఆజాద్ని కూడా అహ్మద్ పటేల్ గట్టిగానే ప్రశ్నించినట్లు ఆ వీడియోలో క్లియర్గా కనిపిస్తోంది.
‘కైథాల్ సిట్టింగ్ ఎమ్మెల్యే, పార్టీ చీఫ్ స్పోక్స్ పర్సన్ రణ్దీప్సింగ్ సూర్జివాలా కోటాలో ఎందరికి టికెట్లు ఇచ్చారు?’ అని అహ్మద్ పటేల్ అడగ్గా, వాళ్లిద్దరూ వేర్వేరు జవాబులు చెప్పారు. నలుగురికి ఇచ్చామని హుడా, ఆరుగురికి ఇచ్చామని ఆజాద్ అన్నారు. ఈ వీడియోపై పార్టీ వర్గాలు అఫీషియల్గా స్పందించలేదు. అయితే టికెట్ల పంపిణీ సరిగా జరగకపోవటంపై బాధ్యుల నుంచి టాప్ లీడర్షిప్ వివరణ కోరటం రాష్ట్రంలో సీనియర్లకు సంతృప్తి కలిగించింది. తమ ఫిర్యాదులను పరిగణనలోకి తీసుకోవటంతో వాళ్లు కొంచెం శాంతించారు. అలాగని, పూర్తిగా ఫ్రెండ్లీ కల్చర్ ఏర్పడిందని చెప్పలేం.
స్టేట్ లీడర్ల కుమ్ములాటలు, గ్రూపు రాజకీయాలు హైకమాండ్కు తెలిసినా సకాలంలో స్పందించలేదని, దీంతో భవిష్యత్లో పార్టీ పరిస్థితి మరింత క్షీణించనుందని ఆందోళన చెందుతున్నారు. ఇదే విషయాన్ని లెజిస్లేటివ్ పార్టీ మాజీ చీఫ్ కిరణ్ చౌధురి ఈమధ్య అహ్మద్ పటేల్ని కలిసి చెప్పారు. పనిలోపనిగా టికెట్ల పంపిణీలో తనకు జరిగిన అన్యాయాన్ని ఆయన దృష్టికి తెచ్చారు. దీంతో అహ్మద్ పటేల్ అలర్ట్ అయ్యారు. కిరణ్ చౌధురి తర్వాత భూపిందర్సింగ్ హుడా, అశోక్ తన్వర్లతో కూడా భేటీ అయ్యారు. టికెట్ల గొడవకు ఫుల్ స్టాప్ పెట్టడానికి తన వంతు ప్రయత్నాలు చేశారు. అసెంబ్లీ ఎన్నికల్లో బీజేపీని బలంగా ఢీకొట్టేలా కాంగ్రెస్ పార్టీ ముందుజాగ్రత్త తీసుకోలేదన్న అభిప్రాయం ప్రజల్లోకి వెళ్లిపోయిందని పరిశీలకులు అంటున్నారు.
ఎక్కువ మంది తెలిసినోళ్లే
మొత్తం 90 సీట్లకు కాంగ్రెస్ ప్రకటించిన అభ్యర్థుల్లో ఎక్కువ మంది పాతవాళ్లు, సీనియర్ లీడర్ల వారసులు ఉన్నారు. వేరే పార్టీల నుంచి వచ్చిన కొందరికీ టికెట్లు దక్కాయి. 15 మంది సిట్టింగ్లకు ఈసారీ ఛాన్స్ ఇచ్చారు. స్క్రీనింగ్ కమిటీ మెంబర్ భూపిందర్సింగ్ హుడా తన కంచుకోటయిన గర్హి సంప్లా కిలోయి సెగ్మెంట్లోనే మళ్లీ బరిలో నిలుస్తున్నారు.
