కాంగ్రెస్ సెకండ్ లిస్ట్ రిలీజ్.. ఫడ్నవీస్‎పై ధీటైన అభ్యర్థిని దింపిన హస్తం పార్టీ

ముంబై: మహారాష్ట్ర అసెంబ్లీ ఎన్నికల్లో పోటీ చేసే అభ్యర్థుల రెండో జాబితాను కాంగ్రెస్ పార్టీ విడుదల చేసింది. 23 మంది పేర్లతో సెకండ్ లిస్ట్ రిలీజ్ చేసిన కాంగ్రెస్ పార్టీ.. పలువురు కీలక నేతలకు ఈ జాబితాలో టికెట్లు కేటాయించింది. కాంగ్రెస్, శివసేన (ఉద్ధవ్ వర్గం) పట్టుబట్టిన దక్షిణ నాగ్‌పూర్ అసెంబ్లీ సీటుపై ఎట్టకేలకు పీఠముడి వీడింది. సుధీర్ఘ చర్చల అనంతరం ఈ సీటును కాంగ్రెస్ పార్టీ దక్కించుకుంది.

దక్షిణ నాగ్‌పూర్ అసెంబ్లీ స్థానం నుండి పోటీ చేస్తోన్న మహారాష్ట్ర డిప్యూటీ సీఎం, బీజేపీ అభ్యర్థి దేవేంద్ర ఫడ్నవీస్‌పై సీనియర్ నేత, మాజీ మంత్రి గిరీష్ కృష్ణరావు పాండవ్‎ను కాంగ్రెస్ బరిలోకి దించింది. మహా వికాస్ అఘాడీ కూటమి పొత్తులో భాగంగా ప్రస్తుతానికి కాంగ్రెస్ పార్టీకి 85 అసెంబ్లీ స్థానాలు దక్కాయి. 85 స్థానాలకు గానూ తొలి జాబితాలో 48 మంది పేర్లతో ఫస్ట్ లిస్ట్ విడుదల చేసిన కాంగ్రెస్.. శనివారం (అక్టోబర్ 26) 23 మంది పేర్లతో రెండో జాబితాను ప్రకటించింది.

ALSO READ | కాంగ్రెస్ అధ్యక్షుడిగా రెండేళ్లు పూర్తి చేసుకున్న మల్లికార్జున్ ఖర్గే.. విషెస్ తెలిపిన రాహుల్ గాంధీ

రెండు జాబితాలతో కలిపి మొత్తం 71 సీట్లకు కాంగ్రెస్ క్యాండిడేట్లను ఫిక్స్ చేసింది. మిగిలిన 14 స్థానాలకు అభ్యర్థులను ఎంపిక చేయడంపై కాంగ్రెస్ హై కమాండ్ కసరత్తు చేస్తోంది. కాగా, 2024, అక్టోబర్ 15వ తేదీన మహారాష్ట్ర అసెంబ్లీ ఎన్నికల షెడ్యూల్‎ను కేంద్ర ఎన్నికల సంఘం విడుదల చేసిన విషయం తెలిసిందే. మహారాష్ట్రలో మొత్తం 288 అసెంబ్లీ సీట్లు ఉండగా.. 2024, నవంబర్ 20వ తేదీన సింగల్ ఫేజ్‎లో ఎన్నికలు నిర్వహిస్తామని ఎలక్షన్ కమిషన్ ప్రకటించింది. నవంబర్ 23వ తేదీన ఓట్ల లెక్కింపు, ఫలితాలు వెలువడనున్నాయి.