బాసర ట్రిపుల్ ఐటీలో.. ఏం మారలే!

• కలకలం రేపుతున్న వరుస సూసైడ్​లు
• ఈ అకడమిక్ ఇయర్​లోనే ఆరుగురు స్టూడెంట్ల ఆత్మహత్య
• మానసిక ఒత్తిళ్లతోనే దారుణాలు
• జాడలేని కౌన్సెలింగులు..
• కేటీఆర్ ఇచ్చిన హామీల్లో వచ్చింది ల్యాప్​టాప్​లే
• రెగ్యులర్​ వీసీ లేక పర్యవేక్షణ కరువు
• ఆందోళనలో స్టూడెంట్స్, పేరెంట్స్

నిర్మల్, వెలుగు: బాసర ట్రిపుల్ ఐటీలో వరుసగా జరుగుతున్న విద్యార్థుల ఆత్మహత్య  ఘటనలు  స్టూడెంట్స్​, పేరెంట్స్ లలో ఆందోళన రేకెత్తిస్తున్నాయి. 2008 నుం చి ఇప్పటివరకు ట్రిపుల్​ ఐటీలో 32మంది స్టూడెంట్లు చనిపోయారు. ఈ ఒక్క అకడమిక్ ఇయర్ లోనే దాదాపు ఆరుగురు విద్యార్థులు ఆత్మహత్య చేసుకున్నారు. గడిచిన రెండు నెలల్లోనే ముగ్గురు విద్యార్థులు సూసైడ్​ చేసుకోవడంతో క్యాంపస్​లో కలకలం మొదలైంది. ఈ ఆత్మహత్యలకు కారణాలేంటో ఇప్పటివరకు స్పష్టత లేదు. ఘటన జరగ్గానే ట్రిపుల్​ఐటీ ఆఫీసర్లు.. కమిటీలు వేస్తున్నా, నివేదికలను మాత్రం బయటపెట్టకపోవడంపై విమర్శలు వ్యక్తమవుతున్నాయి.

ల్యాప్​టాప్​లు తప్ప ఏ హామీ నెరవేర్చలే.. 
రెండేండ్ల నుంచి బాసర ట్రిపుల్ ఐటీలో రోజుకో ఘటన జరుగుతూనే ఉన్నది. క్వాలిటీ లేని ఫుడ్​, ఫ్యాకల్టీ కొరత, లైబ్రరీ తదితర సమస్య పరిష్కరించాలనే డిమాండ్​తో గతేడాది జూన్  14వ తేదీ నుంచి దాదాపు నెల రోజుల పాటు స్టూడెంట్స్​ ఆందోళన చేశారు. మొదట్లో ఈ ఆందోళనలను అణచివేసేందుకు విశ్వప్రయత్నాలు చేసిన సర్కారు, స్టూడెంట్లు పట్టువీడకపోవడంతో ప్రభుత్వమే దిగివచ్చింది. 

ఐటీ శాఖ మంత్రి కేటీఆర్, విద్యాశాఖ మంత్రి సబితా ఇంద్రారెడ్డి తదితరులు క్యాంపస్ ను సందర్శించి విద్యార్థులకు భరోసా ఇచ్చినా చాలా హామీలు నేటికీ నెరవేర్చలేదు. రెగ్యులర్​ వీసీ నియామకం, టీచింగ్ ఖాళీల భర్తీ, మెస్ ఏజెన్సీల మార్పు, అందరికీ ల్యాప్​టాప్​ల అందజేత, డిజిటల్​ లైబ్రరీ ఏర్పాటు, హాస్టల్ రూమ్ లకు రిపేర్లు, క్లాస్ రూమ్​ల మాడిఫికేషన్​లాంటి సమస్యలను పరిష్కరిస్తామని చెప్పగా, కేవలం స్టూడెంట్లందరికీ ల్యాప్ టాప్ లు అందజేశారు. మిగిలిన ఏ హామీని నెరవేర్చలేదని స్టూడెంట్లు ఆరోపిస్తున్నారు.

రెగ్యులర్​ వీసీ లేడు.. పర్యవేక్షణ లేదు..
ట్రిపుల్​ఐటీని సందర్శించినప్పుడు ఇకపై మూడు నెలలకోసారి తాను క్యాంపస్ కు వస్తానని చెప్పిన కేటీఆర్​ ఏడాదిగా ఇటువైపు కన్నెత్తి చూడలేదు. మరోవైపు కీలకమైన వీసీ పోస్టును ఇప్పటికీ నియమించలేదు. ప్రస్తుతం ఇన్​చార్జి వీసీ వెంకటరమణ ఉన్నత విద్యమండలి వైస్ చైర్మన్ కావడంతో అందుబాటులో ఉండడంలేదు. ఇక డైరెక్టర్ సతీశ్​కుమార్​ సైతం తరచూ హైదరాబాద్ వెళ్తారని, దీంతో సిబ్బందిపై పర్యవేక్షణ కరువైందని స్టూడెంట్స్​ ఆరోపిస్తున్నారు. ఇప్పటికే  స్టాఫ్​ పలుమార్లు స్టూడెంట్స్ ముందు కొట్లాడుకున్నప్పటికీ వాళ్ల మీద కనీస చర్యలు తీసుకోలేదు. పైగా తమ ఆగడాలను ఎక్కడ బయటపెడ్తారోనని విద్యార్థులనే ఉల్టా  కంప్లయింట్స్​ పేరిట బెదిరిస్తున్నారనే ఆరోపణలు వినిపిస్తున్నాయి. 

జాడలేని కౌన్సిలింగ్ లు..
ట్రిపుల్​ ఐటీ అంటేనే స్టూడెంట్లపై చదువులు, పరీక్షల ఒత్తిడి ఉంటుంది.  క్యాంపస్​ వాతావరణం సరిగ్గా లేకపోవడం, స్టడీస్​లో వెనుకబాటు, హోమ్​సిక్​, ఇతర వ్యక్తిగత కారణాల వల్ల కూడా  విద్యార్థులు మానసికంగా కుంగిపోతున్నారు. ముఖ్యంగా ప్రెషర్​లో ఒత్తిడి, కుంగుబాటు ఎక్కువ ఉంటోంది. ఇలాంటి విద్యార్థుల్లో మనోధైర్యం నింపేందుకు నిపుణులతో కౌన్సెలింగ్ ఇప్పించాల్సి ఉన్నా ఆ దిశగా అధికారులు చర్యలు తీసుకోవడంలేదనే ఆరోపణలున్నాయి. కనీసం స్టడీస్​లో వెనుకబడిన స్టూడెంట్స్​పైనా ఫోకస్​ పెట్టడం లేదని విద్యార్థులు అంటున్నారు. దీనికితోడు తోటి విద్యార్థుల కండ్ల ముందే ఆత్మహత్యలకు పాల్పడుతుండడంతో చాలా మంది స్టూడెంట్లు భయాందోళనకు గురవుతున్నారు. ఈ నెలలో ఇప్పటికీ ముగ్గురు విద్యార్థులు సూసైడ్​ చేసుకున్నా కౌన్సెలింగ్​ ఇప్పించే ప్రయత్నం చేయకపోవడంపై తీవ్ర విమర్శలు వ్యక్తమవుతున్నాయి.

 కొత్త మెస్ లపై స్పందన కరువు..
ఏడాది కింద ఆందోళన టైంలో స్టూడెంట్లు ప్రధానంగా మెస్​లలో క్వాలిటీ ఫుడ్​ పెట్టడం లేదని ఆరోపించారు. దీంతో ఆయా మెస్​ల నిర్వాహకులను తొలగించి కొత్తవాళ్లను తీసుకుంటామని  అప్పట్లో ఉన్నతాధికారులు హామీనిచ్చారు. కొత్తగా మెస్ ల నిర్వహణ కోసం టెండర్లు సైతం ఆహ్వానించారు. కానీ, సాంకేతిక కారణాలతో టెండర్ దాఖలు చేసిన సంస్థలకు అర్హత దక్కలేదు. ఈ క్రమంలో ప్రత్యామ్నాయ చర్యలు తీసుకోవాల్సిన ఆఫీసర్లు ఆ పని చేయకపోవడంతో ఎప్పట్లాగే పాత సంస్థలే క్యాంపస్ లో మెస్ లను నిర్వహిస్తున్నాయి. దీనిని బట్టి ట్రిపుల్ ​ఐటీలో సమస్యల పరిష్కారంపై సర్కారుకు, అధికారులకు ఎంత చిత్తశుద్ధి ఉందో అర్థం చేసుకోవచ్చు.