- వాకింగ్ చేసి ఇంటికొచ్చాక కుప్పకూలాడు
హాలియా, వెలుగు : గుండెపోటుతో ఓ పోలీస్ కానిస్టేబుల్ గురువారం మృతి చెందాడు. నల్గొండ జిల్లా అనుముల మండలం అలీనగర్ కు చెందిన షేక్ నజీర్ (35) కొంత కాలంగా నల్గొండ జిల్లా కేంద్రంలోని వన్ టౌన్ పోలీస్ స్టేషన్ లో కానిస్టేబుల్ గా పనిచేస్తున్నాడు. గురువారం ఉదయం నజీర్ వాకింగ్ చేయడానికి గ్రౌండ్ కి వెళ్లి ఇంటికి తిరిగివచ్చాడు. ఇంట్లోకి రాగానే గుండెపోటుతో ఒక్కసారిగా కుప్పకూలాడు. వెంటనే కుటుంబ సభ్యులు ఆయనను హాస్పిటల్ కు తరలిస్తుండగా మార్గం మధ్యలో చనిపోయాడు.
మృతునికి భార్య, ఇద్దరు కుమార్తెలు, ఒక కుమారుడు ఉన్నారు. కాగా, నజీర్ జాతీయ స్థాయి కబడ్డీ క్రీడాకారుడిగా మంచి గుర్తింపు పొందాడు. ఆయనభౌతికకాయాన్ని మృతుడి స్వగ్రామం అలీనగర్ లో నాగార్జున్ సాగర్ ఎమ్మెల్యే కుందూరు జైవీర్ రెడ్డి సందర్శించి కుటుంబ సభ్యులకు సంతాపం తెలిపారు. పోలీసులు గౌరవ వందనం మధ్య ఆయన అంత్యక్రియలు పూర్తయ్యాయి.
