వరంగల్​ కొత్త సెంట్రల్​ జైలు నిర్మాణంపై నీలినీడలు

• మామునూరు భూములపై పీటముడి
• ఉన్నఫళంగా పాత జైలును కూల్చిన బీఆర్​ఎస్​ సర్కార్​
•   ఏడాదిలో కొత్త సెంట్రల్​ జైలు కడ్తామని హామీ
•  మూడున్నరేండ్లు కావస్తున్నా పనులు షురూ కాలే 
• ఇవే భూములను అడుగుతున్న  ఎయిర్​పోర్ట్​ బాధిత రైతులు
• చెట్టుకొకరు..పుట్టకొకరుగా ఖైదీలు.. 

వరంగల్​, వెలుగు: వరంగల్​లో కొత్త సెంట్రల్​ జైలు​ నిర్మాణం అడుగు ముందుకుపడడం లేదు. మూడున్నరేండ్ల కింద  సూపర్​ స్పెషాలిటీ హస్పిటల్​ కోసమంటూ అప్పటి సీఎం కేసీఆర్.. ఎంతో చరిత్ర కలిగిన వరంగల్​ సెంట్రల్​ జైలును కూల్చివేయించిన సంగతి తెలిసిందే. దీనిపై ప్రజల్లో వ్యతిరేకత రావడంతో  ఏడాదిలోగా కొత్త సెంట్రల్​ జైలు​ నిర్మాణం పూర్తిచేస్తామని హామీ ఇచ్చారు. తీరాచూస్తే.. రెండున్నరేండ్ల  తర్వాత వారి ప్రభుత్వం దిగిపోయే నాటికి సైతం పనులకు కనీసం కొబ్బరికాయ కూడా కొట్టలేదు.

దీంతో ఉమ్మడి ఓరుగల్లుతో పాటు చుట్టూ ఉన్న జిల్లాల ఖైదీలు చెట్టుకొకరు పుట్టకొకరు వెళ్లారు. దీంతో కోర్ట్​ కేసులు, ములాఖత్​ కోసం ఖైదీలు, వారి కుటుంబ సభ్యులు పడరాని పాట్లు పడుతున్నారు.  దీనికితోడు సెంట్రల్​ జైలు కోసం ముమునూర్​లో  కేటాయించిన భూములను ఎయిర్​పోర్ట్​ బాధిత రైతులు కూడా అడుగుతుండడంతో నిర్మాణంపై నీలినీడలు కమ్ముకుంటున్నాయి.

రాత్రికి రాత్రే బుల్డోజర్లతో నేలమట్టం​

ప్రస్తుత వరంగల్​ భద్రకాళి ఆలయం, ఎంజీఎం హస్పిటల్​ జంక్షన్​లో 138 ఏండ్ల కింద 54.5 ఎకరాల విస్తీర్ణంలో వరంగల్​ సెంట్రల్​ జైల్​ నిర్మించారు. 6వ నిజాం మీర్  మహబూబ్  అలీ ఖాన్  హయాంలో నిర్మించిన ఈ జైల్​ సౌత్​ ఇండియాలోనే మొట్టమొదటి ఓపెన్‌ ఎయిర్‌  జైల్​ కావడం విశేషం. 2021 మే 21న వరంగల్​ జిల్లా పర్యటనలో భాగంగా ఎంజీఎం కోవిడ్​ హస్పిటల్​ పరిశీలనకు వెళ్లిన అప్పటి సీఎం కేసీఆర్​ పనిలోపనిగా పక్కనే ఉన్న సెంట్రల్​ జైలుకు​ వెళ్లారు.  

లేడికి లేచిందే పరుగు అన్నట్లుగా జైలును ఖాళీ చేసి భూములను హెల్త్​ డిపార్టుమెంట్​కు అప్పగించాలని ఆర్డర్​ వేశాడు. తెల్లారి నుంచే ఖైదీలతో పాటు లారీల కొద్ది ఉండే వస్తుసామగ్రి తరలించడం మొదలుపెట్టారు. మొత్తంగా జూన్​ 11న జైల్​ శాఖ అధికారులు స్థలాన్ని వైద్య ఆరోగ్య శాఖ అధికారులకు అప్పగించి చెట్టుకొకరు..పుట్టకొకరు అన్నట్లు ఖైదీలతో వివిధ జైళ్లకు తరలివెళ్లారు. అదేరాత్రి పెద్దపెద్ద బుల్డోజర్లను దింపిన అధికారులు 54.5 ఎకరాల్లో ఉన్న జైల్​ బ్యారక్​లు, అందులోని స్కూళ్లు, హస్పిటల్స్​, స్మాల్​ ఇండస్ట్రీస్​.. ఇలా ఏ ఒక్కటి లేకుండా నాలుగు రోజుల్లో నేలమట్టం చేశారు. 

నిర్మాణంపై నీలినీడలు.. 

మామూనూర్​ ఎయిర్​పోర్ట్​ ప్రారంభించడానికి ఎయిర్​పోర్ట్​ అథారిటీ ఆఫ్​ ఇండియా తక్కువలో తక్కువ 253 ఎకరాలు అడిగింది. ఈ క్రమంలో అధికారులు ప్రస్తుత ఎయిర్​పోర్ట్​ చుట్టూరా ఉన్న గుంటూరపల్లి, నక్కలపల్లి గ్రామ శివారులోని రైతుల భూములను అధికారులు సర్వే చేసి పెట్టారు. కాగా, రైతులు మాత్రం తాము కోల్పోతున్న భూములకు పరిహారంగా జైలుకు కేటాయించిన భూములనే అడుగుతున్నారు. దీంతో ఇప్పుడు వరంగల్​ కొత్త సెంట్రల్​ జైల్​ నిర్మాణం సందిగ్ధంలో పడినట్లయింది. దీనిపై అధికారంలో ఉన్న కాంగ్రెస్​ ప్రభుత్వం ఎటువంటి నిర్ణయం తీసుకుంటుందోనని ఓరుగల్లువాసులు ఆసక్తిగా ఎదురుచూస్తున్నారు.

పైసా కేటాయించలే.. 

 జైల్​ కూల్చివేతకు ముందు సీఎం కేసీఆర్​మాట్లాడుతూ.. సెంట్రల్​ జైల్​ కోసం వరంగల్‌ సిటీకి  సుమారు 7 కిలోమీటర్ల దూరంలోని మామూనూర్​ 4వ పోలీస్​ బెటాలియన్‌ ప్రాంతంలో 101 ఎకరాలు కేటాయించనున్నట్లు ప్రకటించారు. నిర్మాణం కోసం అవసరమైన రూ.254 కోట్లకు పరిపాలన అనుమతులను వెంటనే జారీ చేస్తున్నట్లు చెప్పారు. 2021 జూన్​ నెలలో ఈ హామీలు ఇవ్వగా, 2023 నవంబర్​లో జనరల్​ ఎలక్షన్లు జరిగే వరకు పనులకు కొబ్బరికాయ కొట్టలేదు. 

చెప్పిన రూ.254 కోట్లలో పైసా నిధులు ఇవ్వలేదు. జైల్​ కూల్చే సమయంలో ఉమ్మడి వరంగల్​తో పాటు చుట్టూరా జిల్లాలకు చెందిన వందలాది మంది ఖైదీలను శిక్షల ఆధారంగా హైదరాబాద్, ఖమ్మం తరలించారు. వీరేగాక ప్రస్తుతం వివిధ కేసుల్లో జైలు​శిక్షలు పడేవారు సైతం జిల్లాలుదాటి వెళ్లాల్సి వస్తోంది. ఇది నిందితులు, వారిని చూడటానికి వెళ్లే కుటుంబ సభ్యులతో పాటు డ్యూటీలు చేయాల్సిన పోలీసులకు తలనొప్పిగా మారింది.