- పట్టణ వలసలు తగ్గించి పల్లెల్లో ఉపాధి పెంచే లక్ష్యం
- బీఆర్ఎస్ లూటీ చేసింది
- కాంగ్రెస్ గవర్నమెంట్తో ఏ మార్పు ఊహించలేం
- 400 సీట్లతో మళ్లీ కేంద్రంలో మోదీ సర్కార్
- సెంట్రల్ మినిస్టర్ నితిన్ గడ్కరీ
నిజామాబాద్, వెలుగు: తెలంగాణ రాష్ట్రంలో రూ.60 వేల కోట్ల ఖర్చుతో జాతీయ రహదారుల నిర్మాణం జరుగుతోందని సెంట్రల్ ట్రాన్స్పోర్ట్ మినిస్టర్ నితిన్గడ్కరీ తెలిపారు. పల్లె రోడ్లను హైవేలకు లింకు చేయడం వల్ల బహుముఖ ప్రయోజనం ఉంటుందన్నారు. ముఖ్యంగా వ్యవసాయం వృద్ధి చెంది పట్టణ వలసలు తగ్గుతాయన్నారు. నిజామాబాద్ సిటీలో గురువారం నిర్వహించిన బీజేపీ విజయ సంకల్ప యాత్ర ముగింపు సభకు హాజరైన ఆయన మాట్లాడారు. పవర్, వాటర్, ట్రాన్స్పోర్ట్, కమ్యూనికేషన్ సౌలత్ ఉన్న ప్రాంతాలు డెవలెప్మెంట్లో స్పీడ్గా దూసుకెళ్తాయన్నారు. మక్కలు, వడ్లు, గోధుమ, తదితర ఆహార పంటలు పండించే రైతులను ఇథనాల్ ఉత్పత్తి వైపు టర్న్ చేశామన్నారు.
మక్కలు, బియ్యం, బాంబూ, చెరుకు రసం, మొలాసిస్తో ఇథనాల్ తయారు చేస్తున్నామన్నారు. ఏవియేషన్ ఇంధనాన్ని కూడా వీటితోనే ఉత్పత్తి చేస్తున్నామన్నారు. రైతు ఆత్మహత్యలు లేని పాలన కోసం పనిచేస్తున్నామని మహారాష్ట్ర హింగోలిలో ఆర్గానిక్ పసుపు సాగు చేయించి దేశవ్యాప్త అవసరాలు తీరుస్తామన్నారు. పీఎం సడక్ యోజన కింద దేశంలోని 6.5 లక్షల గ్రామాల్లో ఇప్పటికి 3.70 లక్షల గ్రామాలకు రోడ్డు సౌకర్యం కల్పించామన్నారు.
లోక్సభ ఎన్నికల్లో 400 పైగా సీట్లు సాధించి ప్రధానిగా మూడో సారి మోదీ బాధ్యతలు చేపట్టనున్నారని జోస్యం చెప్పారు. గత బీఆర్ఎస్ గవర్నమెంట్ పాలనను ప్రజల సొమ్ము లూటీకే వినియోగించిందన్నారు. ఎన్నో ఏండ్ల కాంగ్రెస్ పాలనను ప్రజలు చూశారని, ఈసారి తెలంగాణలో కొత్తగా ఏర్పడిన సర్కారుతో ఒరిగేదేమీలేదన్నారు. బీజేపీని ఆదరించాలని కోరారు. ఎంపీ ధర్మపురి అర్వింద్, అర్బన్, ఆర్మూర్ ఎమ్మెల్యేలు ధన్పాల్ సూర్యనారాయణ, పైడి రాకేశ్రెడ్డి, పార్టీ జిల్లా ప్రెసిడెంట్ దినేశ్కులాచారి, పల్లె గంగారెడ్డి, పెద్దోళ్ల గంగారెడ్డి, స్రవంతిరెడ్డి ఉన్నారు.
