ఆగిన మోడల్​ మార్కెట్​ పనులు..రోడ్ల పైనే వెజ్,​ నాన్​వెజ్​ అమ్మకాలు

• నిధులు లేక ముందుకు కదలట్లే 
• గత సర్కారు నిర్వాకంతో జాప్యం

జనగామ, వెలుగు : జనగామ ఇంటిగ్రేటెడ్​ మోడల్​ మార్కెట్​ నిర్మాణ పనులు ఆగి పోయాయి. జిల్లా కేంద్రంలోని దయానిలయం సమీపంలో నాలుగేండ్ల కింద మొదలైన పనులు ఒక అడుగు ముందుకు నాలుగు అడుగులు వెనక్కి అన్న చందంగా మారాయి. గత సర్కారు నిర్లక్ష్యం కారణంగా ఈ పరిస్థితి నెలకొంది.  జిల్లా కేంద్రంగా జనగామ వృద్ధి చెందుతుండడంతో అన్ని రకాల కూరగాయలు, మాంస విక్రయాలు ఒకే చోట అందుబాటులోకి తేవాలనే లక్ష్యం నేటికీ నెరవేరడం లేదు. 

స్లోగా పనులు

సిద్ధిపేట మోడల్​ మార్కెట్​ తరహాలో జనగామలో కూడా మార్కెట్​ ఏర్పాటు చేయాలని గత పాలకులు నాలుగేండ్ల క్రితం   శంకు స్థాపన  చేశారు. అయినా  నేటికీ పూర్తి కావడం లేదు. జనగామ టౌన్​ దినదినం అభివృద్ధి చెందుతుండడంతో జనాభా సుమారు లక్ష ను దాటినట్లు అంచనాలు ఉన్నాయి. ఇందుకు తగ్గట్టుగా మోడల్​ మార్కెట్ ఉంటుందని గత పాలకులు చెప్పుకొచ్చారు. కానీ ఆచరణలో మాత్రం భిన్నంగా ఉంది.   

పనులు పెండింగ్​

బిల్డింగ్​ నిర్మాణం యేడాది క్రితం పూర్తైనప్పటికీ లోపల చేపట్టాల్సిన వెజ్​ 43, నాన్​ వెజ్​ 60 స్టాల్స్​ పనుల పూర్తి పై పట్టింపు లేకుండా పోయింది. ఇదిలా ఉంటే తొలుత ఈ మార్కెట్​ నిర్మాణానికి రూ రెండు కోట్లు మంజూరు అయ్యాయి. కానీ పలుమార్లు దీని డిజైన్​ లను అప్పటి ఆఫీసర్లు. ప్రజా ప్రతినిధులు మార్పులు చేశారు. దీంతో సదరు నిధులు సరిపోవని అప్పట్లోనే మున్సిపల్​ అధికారులు అదనంగా మరో రెండున్నర కోట్లకు ప్రతిపాదనలు పంపించి మంజూరు చేయించారు. అంచనాలు డబుల్​ అయినప్పటికీ పనులు మాత్రం పూర్తికావడం లేదు. మాటలకు చేతలకు పొంతన లేకుండా వ్యవహరించిన గత సర్కారు తీరే ఇందుకు కారణంగా మారింది. 

ఎక్కడ పడితే అక్కడ

జనగామ టౌన్​లో కూరగాయాలు, మాంసం ఎక్కడ పడితే అక్కడ అమ్ముతున్నారు. రోడ్లు, గల్లీల్లో పరదాలు పరిచి వ్యాపారాలు చేస్తున్నారు. మాంసం విక్రయాల డబ్బాలు దాదాపుగా డ్రైనేజీల పైనే ఉంటున్నాయి. ఈ పరిస్థితి నుంచి మార్పు తేవాలని చేపడుతున్న మోడల్​ మార్కెట్​ నేటికీ అందుబాటులోకి రావడం లేదు. రోడ్ల పై అమ్మకాలతో ట్రాఫిక్​ సమస్యలు తలెత్తుతున్నాయి. బస్టాండ్​ ఏరియా, సిరాజ్​ ఫ్రూట్స్​ సమీపం, రైల్వే స్టేషన్​ పరిసరాలు, జనగామ చౌరస్తా నుంచి సిద్ధిపేట రోడ్డు, ఇలా పలు చోట్ల రోడ్ల పై పరదాలు పరచి కూరగాయలు అమ్ముతున్నారు. చిన్న రోడ్లు ఉన్న చోట దుకాణాల ముందు అమ్మకాలతో ట్రాఫిక్​ నరకం కనిపిస్తోంది. ఇప్పటికైనా పనులు పూర్తి చేసి మార్కెట్​ ను ప్రారంభించాలని పలువురు కోరుతున్నారు. 

పనుల పూర్తికి చర్యలు 

మోడల్​ మార్కెట్​ పనులు త్వరలో పూర్తయ్యేలా చర్యలు తీసుకుంటాం. రూ నాలుగున్నర కోట్లతో జరుగుతున్న ఈ పనుల్లో కోటిన్నర వరకు నిధులు విడుదల కాగా చెల్లింపులు చేశాం. వెజ్​, నాన్​ వెజ్​ అమ్మకాలు ఒకే చోట ఉండేలా మార్కెట్​ అందుబాటులోకి తెస్తాం.   
‌‌– పీ వెంకటేశ్వర్లు, మున్సిపల్​ కమిషనర్​, జనగామ