- రాష్ట్రంలోనే అత్యధిక డిమాండ్ ఉన్న సీటుగా మహబూబాబాద్
- 48 మంది దరఖాస్తు
- కాంగ్రెస్ బీ ఫామ్ దక్కితే చాలనుకుంటున్న నేతలు
- అధిష్టానం నిర్ణయంపై అందరిలో ఉత్కంఠ
మహబూబాబాద్, వెలుగు: రాష్ట్రంలోనే మహబూబాబాద్ కాంగ్రెస్ ఎంపీ సీటు కోసం ఫుల్ కాంపిటేషన్ ఏర్పడింది. ఈ సీటు కోసం ఏకంగా 48 మంది అప్లయ్ చేశారు. రాబోయే ఎన్నికల్లో కాంగ్రెస్ బీఫామ్ దొరికితే చాలు ఎన్నికల్లో గెలుపొందడం ఖాయం అని భావిస్తున్నారు. పార్లమెంట్పరిధిలో మహబూబాబాద్, డోర్నకల్,ములుగు, నర్సంపేట, ఇల్లందు, పినపాక నియోజకవర్గాల్లో కాంగ్రెస్ గెలిచింది. కేవలం భద్రాచలంలో అసెంబ్లీ నియోజకవర్గంలో మాత్రమే బీఆర్ఎస్ గెలుపొందినది. మెజార్టీ అసెంబ్లీ స్థానాలు కాంగ్రెస్ గెలుపొందడంతో పార్లమెంట్ ఎన్నికల్లోను అదే వేవ్ కొనసాగుతుందని కాంగ్రెస్ లీడర్లు భావిస్తున్నారు.
ఎవరికి దక్కేనో!
కాంగ్రెస్ అధిష్టానానికి ప్రదేశ్ఎన్నికల కమిటీ ( పీఈసీ) పంపే నాలుగు పేర్లలో ఎవ్వరికి చోటు దక్కనుందో అనేది జిల్లాలో హట్ టాపిక్గా ఉంది. మాజీ కేంద్ర మంత్రి పోరిక బలరాంనాయక్, ఆదివాసీ జాతీయ కాంగ్రెస్ వైస్ చైర్మన్ తేజావత్ బెల్లయ్య నాయక్, ఖమ్మం జిల్లాకు చెందిన మంత్రి పొంగులేటి అనుచరురాలు విజయభాయి, రిటైర్డ్ ఎక్సైజ్ ఆఫీసర్ బానోతు మోహన్లాల్, డోర్నకల్ నియోజకవర్గానికి చెందిన మాలోతు నెహ్రునాయక్, కిసాన్ పరివార్ సంస్థ నిర్వాహకుడు భూపాల్ నాయక్, పొట్టిశ్రీరాములు తెలుగు యూనివర్సిటి రిజిస్ట్రార్ భట్టు రమేశ్ పేర్లు ప్రధానంగా వినిపిస్తున్నాయి. పార్టీకి విధేయులుగా ఉండటం, పార్లమెంట్ స్థాయిలో పరిచయాలు, ఆర్ధికవనరులు ఉన్నవారికే ఛాన్స్ దక్కే అవకాశం ఉంది.
కాంగ్రెస్ నేతలను నిరతంరం కలుస్తున్నారు
పార్లమెంట్ పరిధిలో 7 అసెంబ్లీ నియోజకవర్గాల పరిధిలో ఇటీవల గెలుపొందిన కాంగ్రెస్ ఎమ్మెల్యేల మద్దతు కూడగట్టుకోవడం కోసం ఎంపీ టిక్కెట్ ఆశిస్తున్న నాయకులు ప్రయత్నిస్తున్నారు. అధిష్టానం పరిశీలనలో తమ పేరు రాగానే మద్దతు తెలుపాలని కోరుతున్నారు. నియోజకవర్గ పరిధిలోని కాంగ్రెస్ పెద్దలు ఆయా డీసీసీల ప్రెసిడెంట్స్, ఇతర నాయకులను క్రమం తప్పకుండా కలుస్తూ మద్దతు కోరుతున్నారు.
ALSO READ : మున్నేరు ముంచకుండా గోడలు!..6 నుంచి 11 మీటర్ల ఎత్తులో నిర్మాణం
కాంగ్రెస్ బీఫామ్ దక్కుతే చాలనుకుంటున్న నేతలు
ప్రస్తుతం రాజకీయాల్లో ఉన్న వారితో పాటుగా ప్రభుత్వ సర్వీస్లో ఉన్న ఉద్యోగులు సైతం కాంగ్రెస్ టిక్కెట్ కోసం దరఖాస్తులు చేసుకోవడం విశేషం. ఈ ప్రాంతంలో ఉంటున్న ఆదివాసులు, గిరిజనుల్లో ప్రస్తుతం కాంగ్రెస్ ప్రభావం ఎక్కువగా ఉండటం, బీజేపీపై వ్యతిరేకత, బీఆర్ఎస్ లో ఓటమి నిరాశ... కాంగ్రెస్కు కలిసి వచ్చేలా ఉంది. దీనికి తోడు ఫుల్ జోష్లో ఉన్న కాంగ్రెస్నేతలు గెలుపు దీమా వ్యక్తం చేస్తున్నారు. దీంతో టికెట్టు కోసం ఎవరి ప్రయత్నాలు వారు చేస్తున్నారు.
