చేవెళ్ల, వెలుగు: ఒక మతానికి చెందిన పురాతన నిర్మాణం కూల్చివేతపై ఇరువర్గాల మధ్య మూడు రోజులుగా వివాదం కొనసాగుతోంది. దీంతో రంగారెడ్డి జిల్లా మొయినాబాద్ పీఎస్ పరిధిలో ఉద్రిక్తత నెలకొంది. చిలుకూరు రెవెన్యూలో సర్వే నంబర్ 199లో వక్ఫ్బోర్డు భూమిలో అతి పురాతన నిర్మాణం కూల్చివేతపై కుతుబ్ షాహీ మజీద్ పేరుతో కొందరు ఫ్లెక్సీలను కట్టారు.
దీన్ని నిరసిస్తూ చిలుకూరు గ్రామస్తులు, బజరంగ్ దళ్ కార్యకర్తలు ఆందోళనకు దిగారు. మైనార్టీ వర్గానికి చెందిన ఓ ఎమ్మెల్సీ , ఓ పోలీసు ఉన్నతాధికారి కూల్చివేత ఘటన స్థలానికి ఎలా వస్తారని బజరంగ్ దళ్ నేతలు ఆరోపించారు. రాజేంద్రనగర్ డీసీపీ చింతమనేని శ్రీనివాస్ ఇరువర్గాలకు నచ్చజెపుతూ శాంతింపచేశారు. చలో చిలుకూరు బాలాజీ ఆలయం అంటూ బజరంగ్ దళ్ బుధవారం పిలుపునివ్వగా సైబరాబాద్ కమిషనర్ అవినాష్ మహంతి ఐపీసీ సెక్షన్ 163 విధించారు. మతపరమైన ఘర్షణలు చోటు చేసుకుంటాయనే సమాచారం పెద్ద ఎత్తున పోలీసులను మోహరించారు. ఎస్ఐబీ, పోలీసులు, ఇంటెలిజెన్స్ పోలీసులు సైతం ఎప్పటికప్పుడు పరిస్థితులను పర్యవేక్షిస్తున్నారు.
