బెల్లంపల్లి, వెలుగు: తమ సమస్యలను ప్రభుత్వం పరిష్కరించాలని డిమాండ్ చేస్తూ బెల్లంపల్లి పట్టణంలోని ప్రభుత్వ ఏరియా ఆస్పత్రిలో పనిచేసే కాంట్రాక్ట్, ఔట్ సోర్సింగ్ కార్మికులు, వైద్య సిబ్బంది చెట్ల ఆకులు తింటూ వినూత్న రీతిలో నిరసన తెలిపారు. వారు మాట్లాడుతూ.. తమ సమస్యలను సంబంధిత అధికారులు, జిల్లా కలెక్టర్‌‌‌‌‌‌‌‌కు తెలియజేసినా పట్టించుకోకపోవడంతో ఈ నిరసన చేపట్టినట్లు చెప్పారు.
తమకు గత ఐదు నెలలుగా ఔట్సోర్సింగ్ ఏజెన్సీ కాంట్రాక్టర్ వేతనాలు చెల్లించడంలేదని ఆవేదన వ్యక్తం చేశారు. పండుగ పూట కూడా పస్తులుండాల్సి వస్తోందని వాపోయారు. వేతనాలు చెల్లించకపోవడంతో పాటు కార్మిక చట్టం నిబంధనలను ఉల్లంఘిస్తున్న ఔట్సోర్సింగ్ ఏజెన్సీపై మండిపడ్డారు. ప్రభుత్వం జీవో నంబర్ 60ని అమలు చేయాలన్నారు. ఈ సమ్మెకు సీఐటీయు లీడర్లు సంకె రవి, అబ్బోజు రమణ తదితరులు మద్దతు తెలిపారు.
