బాన్సువాడ, వెలుగు: ఎన్టీఆర్ ముఖ్యమంత్రి అయినప్పటి నుంచి సహకార సంఘాలు బలోపేతమయ్యాయని స్పీకర్ పోచారం శ్రీనివాస్ రెడ్డి పేర్కొన్నారు. శుక్రవారం ఆయన కలెక్టర్జితేశ్వీ పాటిల్తో కలిసి పాత బాన్సువాడలో కోపరేటీవ్ సొసైటీ కొత్త బిల్డింగ్ని, గోదామ్లను ప్రారంభించారు. అనంతరం రైతులనుద్దేశించి మాట్లాడుతూ..1977 లో తన రాజకీయ జీవితం దేశాయ్పేట సొసైటీ చైర్మన్ గా ప్రారంభమైందని గుర్తు చేసుకున్నారు.
ఎన్టీఆర్ ప్రవేశపెట్టిన ఏకగవాక్ష విధానం (సింగిల్ విండో) ద్వారా రైతులకు ఒకే ప్రదేశంలో అన్నీ రకాల సేవలను అందుతున్నాయన్నారు. బాన్సువాడ సొసైటీ చైర్మన్ కృష్ణా రెడ్డి సొసైటీని జిల్లాలో నెంబర్వన్స్థానంలో నిలిపారని కొనియాడారు. కార్యక్రమంలో రైతు సమన్వయ సమితి జిల్లా అధ్యక్షుడు అంజిరెడ్డి, మున్సిపల్ చైర్మన్ గంగాధర్, జడ్పీటీసీ పద్మ, ఎంపీపీ నీరజ తదితరులు పాల్గొన్నారు.
