- జార్ఖండ్, మిజోరంలో లాక్డౌన్
- యూపీలో వీకెండ్లో అమలు
- జమ్మూకాశ్మీర్లో నైట్ కర్ఫ్యూ
- ఉత్తరాఖండ్, కర్నాటకలో కూడా..
న్యూఢిల్లీ: కరోనా కేసులు పెరుగుతుండడంతో రాష్ట్రాలు ఆంక్షలు విధిస్తున్నాయి. వైరస్ కట్టడికి నైట్ కర్ఫ్యూ పెడుతున్నాయి. నైట్ కర్ఫ్యూ విధించిన కొన్ని రాష్ట్రాలు లాక్ డౌన్ అమలు చేస్తున్నాయి. తాజాగా జార్ఖండ్ ప్రభుత్వం 8 రోజుల పాటు లాక్డౌన్ విధించింది. యూపీలో వీకెండ్ లాక్డౌన్ విధించను న్నట్లు అక్కడి సర్కారు ప్రకటించింది. మిజోరంలోని జిల్లా కేంద్రాల్లో లాక్డౌన్ అమలవుతోంది.
జార్ఖండ్ లో 8 రోజులు..
జార్ఖండ్ ప్రభుత్వం రాష్ట్ర వ్యాప్తంగా లాక్ డౌన్ విధించింది. ఈ నెల 22 నుంచి 29 వరకు లాక్ డౌన్ అమల్లో ఉంటుందని సీఎం హేమంత్ సోరేన్ మంగళవారం ప్రకటించారు.
యూపీలో వీకెండ్ లాక్ డౌన్
వీకెండ్ లాక్డౌన్ విధించనున్నట్లు ఉత్తరప్రదేశ్ ప్రభుత్వం ప్రకటించింది. రాష్ట్రంలో ఇప్పటికే నైట్ కర్ఫ్యూ అమలులో ఉండగా.. శని, ఆదివారాల్లో రాష్ట్రమంతా పూర్తి షట్డౌన్లో ఉంటుందని తెలిపింది.
మిజోరంలో 10 జిల్లా కేంద్రాల్లో..
ఐజ్వాల్ సహా 10 జిల్లా కేంద్రాల్లో మిజోరం ప్రభుత్వం లాక్డౌన్ విధించింది. ఈ నెల 26 వరకు అమల్లో ఉంటుందని పేర్కొంది. అత్యవసర సేవలకు మాత్రమే మినహాయింపు ఇస్తామని స్పష్టం చేసింది.
కర్నాటకలో వీకెండ్ లాక్డౌన్
కర్నాటక ప్రభుత్వం వీకెండ్స్‌‌లో కంప్లీట్ లాక్డౌన్ అమలవుతుందని ప్రకటించింది. అలాగే ఏప్రిల్ 21 నుంచి మే 4 వరకు నైట్ కర్ఫ్యూ కూడా ఉంటుందని స్పష్టం చేసింది.
ఉత్తరాఖండ్‌‌లో నైట్ కర్ఫ్యూ
ఉత్తరాఖండ్ సర్కారు ఏప్రిల్ 20 నుంచి నైట్ కర్ఫ్యూ అమలు చేయాలని నిర్ణయం తీసుకుంది. మంగళవారం 7 గంటల నుంచి ఉదయం 5 వరకు ఎవరూ బయటకు రావొద్దని ప్రభుత్వం ఆదేశించింది.
చండీగఢ్‌‌లో వీకెండ్ లాక్డౌన్
చండీగఢ్‌‌లో శుక్రవారం రాత్రి 8 నుంచి సోమవారం ఉదయం 5 వరకు వీకెండ్ లాక్డౌన్ పెడుతూ ప్రభుత్వం నిర్ణయం తీసుకుంది. ఇప్పటికే బుధవారం ఒక్కరోజు కంప్లీట్ లాక్డౌన్ విధించింది.
జమ్మూలో కర్ఫ్యూ పొడిగింపు..
జమ్మూకాశ్మీర్ ప్రభుత్వం నైట్ కర్ఫ్యూను పొడిగించింది. ఇప్పటి వరకు 8 జిల్లాల్లో అమల్లో ఉండగా, ఇక నుంచి రాష్ట్ర వ్యాప్తంగా అమలు చేయనున్నట్లు వెల్లడించింది. ఈ మేరకు ఎల్జీ ఆఫీస్ మంగళవారం ప్రకటించింది. ‘‘అన్ని మున్సిపాలిటీలు, అర్బన్ ఏరియాల్లో రాత్రి 10 నుంచి ఉదయం 6 వరకు కర్ఫ్యూ అమల్లో ఉంటుంది” అని పేర్కొంది.
మహారాష్ట్రలో కిరాణా షాపులు 4 గంటలే
మహారాష్ట్రలో కరోనా కేసులు పెరుగుతుండటంతో ఆ రాష్ట్ర ప్రభుత్వం నిబంధనలు మరింత కఠినం చేసింది. కిరాణా దుకాణాలు ఉదయం 7 గంటల నుంచి ఉదయం 11 వరకే తెరిచి ఉంచాలని ఉత్తర్వులిచ్చింది. ఈ ఆదేశాలు మంగళవారం నుంచి మే 1 వరకు అమలులో ఉంటాయని పేర్కొంది. అన్ని కిరాణా షాపులు, కూరగాయలు, పండ్ల దుకాణాలు, డెయిరీలు, బేకరీలు, వెజ్, నాన్వెజ్ మార్కెట్లు, వ్యవసాయ పనిముట్లు, ఉత్పత్తులకు సంబంధించిన అన్ని దుకాణాలు 4 గంటల పాటే తెరిచి ఉంచాలని ఆదేశించింది.
