- ఉత్తరాఖండ్లో 3 వేల మందికి వైరస్
- గత పది రోజుల్లోనే వెయ్యికి పైగా కేసులు నమోదు
- మహారాష్ట్రలో ఒక్క నెలలోనే 51% పెరిగిన కేసులు
- ముంబైలో రోజూ 20 మంది పిల్లలకు పాజిటివ్
- పిల్లల నుంచి కరోనా సోకే ముప్పు తక్కువని కామెంట్
న్యూఢిల్లీ: వృద్ధులు, యువతే కాదు.. పిల్లలనూ కరోనా మహమ్మారి వదలట్లేదు. ఫస్ట్వేవ్తో పోలిస్తే సెకండ్వేవ్లో ఎక్కువ మంది పిల్లలు దాని బారిన పడుతున్నారు. జనవరి 1 నుంచి ఇప్పటిదాకా నమోదైన కేసుల్లో 11 శాతానికిపైగా 20 ఏళ్లలోపువారేనని కేంద్ర ప్రభుత్వ లెక్కలు చెబుతున్నాయి. ఉత్తరాఖండ్లో 10 రోజుల గ్యాప్లోనే వెయ్యి మందికిపైగా 9 ఏళ్లలోపు చిన్నారులు దాని బారిన పడ్డారు. కొందరు పిల్లలు ట్రీట్మెంట్ కోసం ఆస్పత్రిలో చేరాల్సిన పరిస్థితి కూడా వచ్చింది. ఏప్రిల్ మధ్య వారం నుంచి పిల్లల్లో కరోనా కేసులు పెరుగుతున్నాయని అధికారులు చెబుతున్నారు. రాష్ట్రంలో ఫస్ట్వేవ్లో 2,131 మంది చిన్నారులు
కరోనా బాధితులుగా మారారు. ఇప్పుడు సెకండ్వేవ్లో ఏప్రిల్ 1 నుంచి 15 మధ్య 264 మందికి పాజిటివ్ వస్తే.. ఏప్రిల్ 16 నుంచి 30 వరకు ఏకంగా 1,053 మంది కరోనా బారిన పడ్డారు. మేలో మొదటి రెండు వారాల్లోనే 1,618 మంది ఎఫెక్ట్ అయ్యారు. మొత్తంగా ఏప్రిల్ 1 నుంచి ఇప్పటిదాకా నెలన్నరలో 2,935 మంది పిల్లలకు కరోనా సోకింది. చాలా మంది ఇళ్లు ఇరుకుగా ఉన్నాయని, అలాంటి కుటుంబాల్లోని వ్యక్తులకు పాజిటివ్ వస్తే సరైన ఐసోలేషన్ లేక పిల్లలకూ సోకుతోందని ఉత్తరాఖండ్ డైరెక్టర్ జనరల్ ఆఫ్ హెల్త్ డాక్టర్ తృప్తి బహుగుణ చెప్పారు.
మహారాష్ట్రలో ఒక్క నెలలోనే కరోనా బారిన పడిన పిల్లల సంఖ్య 51 శాతం పెరిగిందని ఆ రాష్ట్ర హెల్త్ డిపార్ట్మెంట్ లెక్కలు చెబుతున్నాయి. అకోలా, అమరావతిలలో ఈ నెల మొదటి వారంలో నమోదైన కేసుల్లో 10 నుంచి 12 శాతం మంది పిల్లలున్నారు. ముంబైలోని బాయి జెర్బాయి వాడియా హాస్పిటల్ ఫర్ చిల్డ్రన్‌లో ఫస్ట్ వేవ్లో ఏడు నెలల కాలానికిగానూ సగటున నెలకు 21 మంది పిల్లలు కరోనా ట్రీట్మెంట్ తీసుకున్నారు. అదే సెకండ్వేవ్లో ఇప్పటిదాకా 90 కేసులు నమోదయ్యాయి. ముంబైలో రోజూ సగటున 15 నుంచి 20 మంది పిల్లలకు కరోనా సోకుతోందని ఎస్ఆర్సీసీ చిల్డ్రన్‌ హాస్పిటల్ పీడియాట్రిక్ పల్మనాలజిస్ట్ ఇందూ ఖోస్లా చెప్పారు. మంగళూరు జిల్లాలో సెకండ్వేవ్లో ఇప్పటిదాకా 1,455 మంది పిల్లలు కరోనా బారిన పడ్డారని చెబుతున్నారు.
70% మందికి లక్షణాల్లేవ్: యునిసెఫ్
పిల్లలకు కరోనా సోకే ముప్పుందని, అయితే దాని తీవ్రత మాత్రం తక్కువగానే ఉంటోందని యునిసెఫ్ వెల్లడించింది. 60 నుంచి 70 శాతం వరకు పిల్లల్లో లక్షణాలు కనిపించట్లేదని తెలిపింది. లక్షణాలున్న పిల్లల్లో కేవలం 1 నుంచి 2 శాతం మందికే ఐసీయూలో ట్రీట్మెంట్ అవసరమవుతోందని పేర్కొంది. పిల్లలకు కరోనా వచ్చినా కంగారు పడిపోవద్దని, పిల్లలకు అసలు కరోనా వచ్చిన విషయం తెలియనివ్వకుండా జాగ్రత్తగా చూసుకోవాలని సూచించింది. పిల్లలు సూపర్స్ప్రెడర్లు అన్న మాటలను యునిసెఫ్ కొట్టిపారేసింది. పెద్దలతో పోలిస్తే చిన్న పిల్లల నుంచి మహమ్మారి సోకడం చాలా తక్కువని పేర్కొంది.
