ప్రభుత్వ కార్యక్రమాలకు ఎమ్మెల్సీలను ఆహ్వానించాలి

• మండలి చైర్మన్  గుత్తా సుఖేందర్  రెడ్డి
• ఉద్యమకారులను ఆదుకోవాలి: కోదండరామ్​

హైదరాబాద్, వెలుగు: ప్రభుత్వ కార్యక్రమాలకు శాసన మండలి సభ్యులను ఆహ్వానించాలని ప్రభుత్వాన్ని మండలి చైర్మన్​ గుత్తా సుఖేందర్​రెడ్డి కోరారు. అయితే.. ప్రొటోకాల్​ ప్రకారం ఆహ్వానించడం లేదని శాసనసభ వ్యవహారాల మంత్రి శ్రీధర్  బాబు చెప్పారు. ఇకపై ప్రభుత్వ ప్రారంభోత్సవాలకు, శంకుస్థాపన, ఇతర కార్యక్రమాలకు తప్పనిసరిగా కౌన్సిల్​ సభ్యులను ఆహ్వానించేలా చర్యలు తీసుకోవాలని మంత్రిని ఆయన ఆదేశించారు.

అదేవిధంగా నియోజకవర్గ అభివృద్ధి నిధులు (సీడీఎఫ్) పూర్తి స్థాయిలో  విడుదల చేయాలని, నిధులు మొత్తం విడుదల చేయాలని కోరారు. శనివారం శాసన మండలిలో మూడు బిల్లులతో పాటు స్పెషల్​ మెన్షన్స్​పై సభ్యులు అగిడిన ప్రశ్నలకు మంత్రులు శ్రీధర్​బాబు, పొన్నం సమాధానం చెప్పారు. సభ్యుడు కోదండరామ్  మాట్లాడుతూ తెలంగాణ రాష్ట్ర  సాధనలో పాల్గొన్న ఉద్యమకారులను ప్రభుత్వం ఆదుకోవాలని కోరారు.

ఓపీఎస్  అమలు చేయాలి: నరోత్తంరెడ్డి

పాత పెన్షన్​ స్కీమ్  విధానం అమలుచేసి ఉద్యోగులను ఆదుకోవాలని టీచర్​ ఎమ్మెల్సీ కూర నరోత్తం రెడ్డి కోరారు. ప్రత్యేక​ అంశాన్ని ప్రస్తావించి మాట్లాడుతూ సీపీఎస్​ రద్దు చేస్తామని కాంగ్రెస్  హామీ ఇచ్చిందని, దశలవారీగా 2003 నాటి పెన్షన్  ​  విధానం అమలు చేస్తే రూ.2500 కోట్లు ఖర్చు అవుతుందని, మూడువేల మందికి న్యాయంజరుగుతుందని తెలిపారు.

క్లినికల్​ ట్రయల్స్​పై విచారణ జరపాలి: తీన్మార్​ మల్లన్న

రాష్ట్రంలో ఫార్మా కంపెనీలు జరిపిన క్లినికల్​ ట్రయల్స్​తో ఓ వ్యక్తికి అన్ని అవయవాలు దెబ్బతిన్నాయని తీన్మార్​ మల్లన్న ఆరోపించారు. దీన్ని విచారిస్తే అమెరికా వరకు షేక్​ అవుతుందని పేర్కొన్నారు. నిమ్స్​లో ఇప్పటికీ ఆంధ్రా వాళ్లనే ఉద్యోగాల్లోకి తీసుకుంటున్నారని వాపోయారు. తెలంగాణలో  పారామెడికల్​ చేసిన నిరుద్యోగ యువతకు అవకాశం కల్పించాలని కోరారు.