- కొత్తగూడెం కౌన్సిల్ మీటింగ్ లో ఆఫీసర్లపై కౌన్సిలర్ల ఆగ్రహం
భద్రాద్రికొత్తగూడెం, వెలుగు : కౌన్సిల్ మీటింగ్ అంటే ఆఫీసర్లకు చులకనగా మారిందని పలువురు కౌన్సిలర్లు ఆగ్రహం వ్యక్తం చేశారు. ముచ్చట్లు పెట్టుకునే ఆఫీసర్లు.. కౌన్సిలర్లు చెప్పే సమస్యలు ఎట్లా వింటారంటూ అసహనం వ్యక్తం చేశారు. కొత్తగూడెం మున్సిపల్ కౌన్సిల్ మీటింగ్ చైర్ పర్సన్ కె. సీతాలక్ష్మి అధ్యక్షతన శనివారం మున్సిపల్ ఆఫీస్లో జరిగింది.
చైర్ పర్సన్పై 22 మంది కౌన్సిలర్లు నాలుగైదు రోజుల కిందట కలెక్టర్కు అవిశ్వాసం లేఖ ఇచ్చారు. ఈ క్రమంలో జరుగుతున్న కౌన్సిల్ మీటింగ్కు ప్రాధాన్యత ఏర్పడింది. మంచినీటి ఎద్దడి నివారణ కోసం వార్డుకు రూ. 2లక్షలు కేటాయించారని, ఫండ్స్ మాత్రం ఇవ్వలేదని సభ్యులు ప్రశ్నించారు. కోతులు, కుక్కల దాడులతో ప్రజలు తీవ్ర ఇబ్బందులు పడుతున్నారంటూ వాపోయారు. కరెంట్ పోల్స్ అవసరమని గతంలో కౌన్సిల్లో తీర్మానం చేసినా పనులు మాత్రం ముందుకు పడలేదన్నారు.
పట్టణంలో పేదలకు డబుల్ బెడ్ రూం ఇండ్లను లాటరీ పద్ధతిలో ఎలాట్ చేసినా ఇప్పటి వరకు ఒక్కరికి కూడా అప్పగించలేదని తెలిపారు. మీటింగ్లో మున్సిపల్ కమిషనర్ రఘు, డీఈ రవికుమార్, మేనేజర్ సత్యనారాయణ, కౌన్సిలర్లు పాల్గొన్నారు. అవిశ్వాసంపై సంతకాలు చేసిన వారిలో చాలా మంది కౌన్సిలర్లు కౌన్సిల్ మీటింగ్ మొదలైన కొద్ది సేపటి నుంచే ఒక్కొక్కరుగా బయటికి వెళ్లిపోయారు.
