- హైదరాబాద్ జిల్లాలో 584 మందికి పోస్టింగ్ ఆర్డర్లు
- టెక్నికల్ ఇష్యూస్తో ఉదయం కౌన్సిలింగ్ ఆలస్యం
- మధ్యాహ్నం 2 గంటల తర్వాత ప్రారంభం
- అర్ధరాత్రి వరకు కొనసాగిన ప్రాసెస్
హైదరాబాద్ సిటీ, వెలుగు:ప్రభుత్వం నుంచి అపాయింట్మెంట్ఆర్డర్లు అందుకున్న కొత్త టీచర్లకు మంగళవారం కౌన్సెలింగ్ ప్రశాంతంగా ముగిసింది. ఉదయం 9 గంటలకే కౌన్సెలింగ్కు హాజరుకావాలని హైదరాబాద్ జిల్లాలోని విద్యాశాఖ అధికారులు ప్రకటించడంతో..అబిడ్స్లోని స్టాన్లీ గర్ల్స్హైస్కూల్కు కుటుంబసభ్యులు, పిల్లాపాపలతో కొత్త టీచర్లు చేరుకున్నారు.
స్కూల్ ప్రాంగణమంతా కిక్కిరిసిపోయింది. జిల్లాలో 584 డీఎస్సీ పోస్టులను అధికారులు ఫైనల్ చేయగా, ఎస్జీటీ 386 మంది, స్కూల్ అసిస్టెంట్107 మంది, లాంగ్వేజ్ పండిట్లు 91 మంది మంగళవారం పోస్టింగ్ఆర్డర్లు తీసుకున్నారు. వీరంతా బుధవారం ఆయా స్కూళ్లలో రిపోర్ట్ చేయనున్నారు.
ఉదయం గందరగోళం
కొత్త టీచర్లంతా ఉదయం స్టాన్లీ గర్ల్స్ స్కూల్కు చేరుకోగా, టెక్నికల్ఇష్యూస్ కారణంగా కౌన్సెలింగ్ వాయిదా వేస్తున్నట్టు అధికారులు ప్రకటించారు. ఎప్పుడు జరిగేది త్వరలో ప్రకటిస్తామని తెలిపారు. దీంతో అభ్యర్థులు ఆందోళనకు గురయ్యారు. కాసేపు గందరగోళ పరిస్థితులు నెలకొన్నాయి. మధ్యాహ్నం టెక్నికల్సమస్యను అధికారులు పరిష్కరించగా... 2 గంటల నుంచి కౌన్సెలింగ్ ప్రారంభమైంది.
ఎస్టీటీలకు, ఎస్ఏలకు, పండిట్లకు వేర్వేరుగా కౌన్సిలింగ్నిర్వహించారు. లేటుగా ప్రారంభించడంతో మంగళవారం అర్ధరాత్రి వరకు ప్రక్రియ కొనసాగింది. ఆర్డర్లు పొందిన స్కూల్ అసిస్టెంట్లు, లాంగ్వేజ్పండిట్లు బుధవారం వారికి కేటాయించిన స్కూళ్లలోని హెచ్ఎంలకు రిపోర్ట్ చేయాలని, ఎస్జీటీలు మాత్రం వారి మండలంలోని డిప్యూటీ ఐఓఎస్వద్ద రిపోర్ట్చేయాలని విద్యాశాఖ అధికారులు ఆదేశించారు.
స్కూళ్లలో, డిప్యూటీ ఐఓఎస్వద్ద రిపోర్టింగ్కు వెళ్లే వారు తప్పనిసరిగా అపాయింట్ మెంట్ ఆర్డర్లు, ఫిట్నెస్సర్టిఫికెట్, ఒరిజినల్సర్టిఫికెట్లతోపాటు, రెండు సెట్ల జిరాక్సులు తీసుకు వెళ్లాలని స్పష్టం చేశారు.
ఏర్పాట్లు అంతంత మాత్రమే...
కౌన్సెలింగ్ కోసం వచ్చిన 584 మంది అభ్యర్థులతోపాటు, వారి వెంట వచ్చిన వారి కుటుంబ సభ్యులతో స్టాన్నీ స్కూల్ప్రాంగణం నిండిపోయింది. కౌన్సిలింగ్హాల్ లోకి అభ్యర్థులను మాత్రమే అనుమతించారు. అయితే, అధికారులు తగిన ఏర్పాట్లు చేయలేదని అభ్యర్థులు పెదవి విరిచారు. డ్రింకింగ్ వాటర్సరిపోను లేవని, అభ్యర్థులు, వారి సంబంధికులు ఉండడానికి ఏర్పాట్లు లేవని అసహనం వ్యక్తం చేశారు. పార్కింగ్ సమస్య తలెత్తిందని, కుర్చీలు కూడా వేయలేదని చెప్పారు.
చిన్న పిల్లల్ని ఎత్తుకొని రోడ్ల మీద, కింద కూర్చోవాల్సిన పరిస్థితి వచ్చిందని వాపోయారు.
