వనపర్తి జిల్లాకు కోర్టు కాంప్లెక్స్​ మంజూరు

• క్లయింట్లు, లాయర్లకు సౌలతులు

వనపర్తి, వెలుగు : రాష్ట్ర ప్రభుత్వం న్యాయ నిర్మాణ్​ ప్లాన్​ కింద రాష్ట్రంలోని 12 జిల్లాల్లో 10+2 కోర్టు కాంప్లెక్సుల(ఫ్యామిలీ, పొక్సో కోర్టులు కలిపి) కోసం రూ.972 కోట్లు మంజూరు​చేసింది. ఇందులో ఉమ్మడి మహూబ్​నగర్​ జిల్లాలోని వనపర్తి, మహబూబ్​నగర్, జోగులాంబ గద్వాల, మహబూబ్​నగర్​ ఉన్నాయి. వనపర్తిలోని మెడికల్​ కాలేజీ ఎదురుగా ఉన్న స్థలంలో 20 ఎకరాలను కోర్టు కాంప్లెక్స్​ నిర్మాణానికి ఇచ్చారు. ఒక్కో కోర్టు నిర్మాణానికి రూ.81 కోట్లు అవసరముండగా, కేంద్రం 60 శాతం, రాష్ట్ర ప్రభుత్వం 40శాతం నిధులను సమకూరుస్తాయి. 

తొలగనున్న ఇబ్బందులు..

వనపర్తిలో జిల్లా కోర్టు ఉండడంతో జిల్లాతో పాటు నాగర్​కర్నూల్, గద్వాల జిల్లాల నుంచి క్లయింట్లు, లాయర్లు ఇక్కడికి వస్తుంటారు. కోర్టు హాళ్లు విశాలంగా లేకపోవడంతో ఇబ్బంది పడాల్సి వస్తోంది. కొత్త కోర్టు కాంప్లెక్స్​ ఏర్పాటుతో హై కోర్టును తలపించేలా పలు కోర్టులు ఒకే చోట ఉండనున్నాయి. ప్రస్తుతం ఆర్ అండ్ బీ శాఖకు చెందిన భవనంలోనే ప్రిన్సిపల్​ డిస్ట్రిక్ట్​ అండ్​ సెషన్స్​ జడ్జి కోర్టు, పొక్సో కోర్టు కొనసాగుతోంది. ఇతర భవనాల్లో సీనియర్​ సివిల్​ కోర్టు, అడిషనల్​ సీనియర్​ సివిల్​ జడ్జి కోర్టు, జూనియర్​ సివిల్​ జడ్జి కమ్​ జ్యుడిషియల్​ మెజిస్ట్రేట్​ ఫస్ట్​ క్లాస్​ కోర్టు కొనసాగుతున్నాయి. కోర్టు కాంప్లెక్స్​తో పాటు బార్​ అసోసియేషన్​ హాల్​ సమకూరే అవకాశం ఉంది. 

కొత్త కోర్టులు వస్తయ్..​

కోర్టు కాంప్లెక్స్​ ఏర్పాటుతో లేబర్​ కోర్టు, కన్జుమర్​ కోర్టు, ఎస్సీ,-ఎస్టీ కోర్టులూ రానున్నాయి. ప్రస్తుతం ఐదుగురు జడ్జిలు పని చేస్తున్నారు. భవిష్యత్​లో న్యాయమూర్తుల సంఖ్య కూడా పెరగనుంది. కోర్టు కాంప్లెక్స్​లోనే జడ్జీలకు క్వార్టర్లు ఏర్పాటు కానున్నాయి. ఫ్యామిలీ, పోక్సో కేసులు రెగ్యులర్​గా నడుస్తాయి. 

అందరికీ లాభమే..

న్యాయ నిర్మాణ్​ ప్లాన్​ కింద 10+2 కోర్టు కాంప్లెక్స్​ వనపర్తికి రావడం హర్షణీయం. ఎన్నో ఏండ్లుగా చేస్తున్న కృషి ఇన్నాళ్లకు ఫలించనుంది. ఎమ్మెల్యే మేఘారెడ్డి చొరవ తీసుకోవడం  అభినందనీయం. కాంప్లెక్స్​ ఏర్పాటుతో అందరికీ లాభం కలగనుంది. 

-  మోహన్​కుమార్​యాదవ్, బార్​ అసోసియేషన్​ ప్రెసిడెంట్