- సిటీలో తిరిగినా హెల్మెట్ ఉండాల్సిందే, లేకుంటే జరిమానాలు
- మరణాల నివారణకు నిర్ణయం
నిజామాబాద్, వెలుగు: ఆగస్టు 15 నుంచి బండి బయటకు తీస్తే తలకు హెల్మెట్ పెట్టుకోవాల్సిందే. లేకుంటే జరిమానాలు కట్టాల్సిందే. ఐదు నిమిషాల దారేకదా అని అశ్రద్ధ చేస్తే ఫైన్ పడుతుంది. ఇయ్యాల్టి నుంచి దీన్ని అమలు చేసేందుకు సీపీ కల్మేశ్వర్ ఆర్డర్స్ జారీ చేశారు.
767 యాక్సిడెంట్లు..337 మరణాలు
రోడ్ ప్రమాదాల నివారణపై ఫోకస్ పెట్టిన సీపీ కల్మేశ్వర్ ప్రమాదాలకు కారణాలను గుర్తిస్తున్నారు. మద్యం మత్తులో నడిపే వారిని డ్రంక్ అండ్ డ్రైవ్ టెస్ట్లో పట్టుకొని జైలుకు పంపుతున్నారు. ఇప్పటి వరకు 800 కేసులు నమోదు చేసి 400 మందికి 10 నుంచి 14 రోజుల జైలు శిక్ష పడేలా చేశారు. మైనర్లకు బండ్లు ఇవ్వొద్దని కాలేజీలకు వెళ్లి పేరేంట్స్తో కౌన్సిలింగ్ నిర్వహించారు. ఈ విషయంలో కాలేజ్ మేనేజ్మెంట్లకు ఆదేశాలు జారీచేశారు. రోడ్ సేఫ్టీ ప్రొగ్రామ్స్కు ప్రయారిటీ ఇచ్చారు. వన్వేలో రాంగ్రూట్లో వచ్చే వాహనాలు ఏవైనా జరిమానాలు విధిస్తున్నారు. సౌండ్ పొల్యూషన్కు కారణమవుతున్న బండ్ల సైలెన్సర్లను పీకేయించే బుల్డోజర్తో ధ్వంసం చేయించారు.
జిల్లాలో గత యాడాది 767 యాక్సిడెంట్లు జరుగగా337 మంది ప్రాణాలు కోల్పోయారు. 250 మంది సీరియస్ కండీషన్తో హాస్పిటల్స్లో చేరగా కొందరు ఇప్పటికీ కోలుకోలేదు. అవయవాలు కోల్పోయి దివ్యాంగులైన వారు కొందరు కాగా మరికొందరు చాలాకాలంగా బెడ్పైనే ఉన్నారు. జనవరి నుంచి ఇప్పటిదాకా జరిగిన ప్రమాదాల్లో 200 మించి మరణాలు చోటుచేసుకున్నాయి. వీటిలో టూవీలర్ ప్రమాదాలు ఎక్కువగా ఉండటంతో హెల్మెట్ రూల్ అమలు చేయనున్నారు. ఇందుకు డెడ్లైన్గా పంద్రాగస్ట్ను ఫిక్స్ చేసి రెండు వారాల నుంచి విస్తృత ప్రచారం చేశారు.
టూవీలర్స్ అధికం
జిల్లాలోని నిజామాబాద్నగరం, బోధన్, ఆర్మూర్, భీంగల్ మున్సిపాలిటీలలో 1,27,696 టూవీలర్ బండ్లు ఉండగా 530 విలేజ్లలో 2.43 లక్షల ఉన్నాయి. పల్లె, పట్టణం తేడా లేకుండా వాహనం ఉన్న ప్రతిఒక్కరికీ హెల్మెట్ అలవాటు చేయాలని నిర్ణయించారు. ట్రాఫిక్ ఉల్లంఘనల పరిధిలోనే హెల్మెట్ను చేర్చారు. వీటిని తలపై ధరించక బండ్లు నడిపేవారి ఫొటోలు తీసి ఇంటి అడ్రస్లకు జరిమానా లెటర్లు పంపుతారు. చెకింగ్లో పట్టుబడినా పెనాల్టీ వసూలు చేసి రశీదు ఇస్తారు.
వాహనాలు నడిపే వారి వ్యక్తిగత భద్రతకోసం 15 ఆగస్టు నుంచి మొత్తం కమిషరేట్ పరిధిలో హెల్మెట్ తప్పనిసరి చేశాం. హెల్మెట్ లేకుంటే చట్టప్రకారం కేసులు నమోదు చేస్తాం
సీపీ కల్మేశ్వర్
