హైదరాబాద్: రాష్ట్ర రాజధాని హైదరాబాద్లో మరోసారి భారీగా డ్రగ్స్ పట్టుబడ్డాయి. బోయినపల్లిలో రూ.8.5 కోట్ల విలువ చేసే ఎనిమిదిన్నర కిలోల మత్తు పదార్థాలను పోలీసులు స్వాధీనం చేసుకున్నారు. ఈ కేసుకు సంబంధించిన వివరాలను హైదరాబాద్ సీపీ శ్రీనివాస్ రెడ్డి మీడియాకు వెల్లడించారు. బోయినపల్లి పల్లిలో స్థానిక పోలీసులు, హెచ్ న్యూ టీమ్స్ సోమవారం 8.5 కిలోల ఎమ్ఫిటమిన్ డ్రగ్ పట్టుకున్నారని తెలిపారు. దీని విలువ రూ.8.5 కోట్లు ఉంటుందని.. ఈ డ్రగ్ను పిల్, లిక్విడ్గా వివిధ రూపాల్లో తీసుకుంటారని చెప్పారు. ఎమ్ఫిటమిన్ డ్రగ్ను అమ్మాయిలకు కూల్ డ్రింక్స్లో కలిపి ఇస్తుంటారన్నారు. మార్కెట్లో ఈ డ్రగ్ ఖరీదు ఒక కేజీ.. కోటి నుంచి కోటిన్నర వరకు ఉంటుందని చెప్పారు. ఈ కేసులో ప్రధాన నిందితుడు కంచెర్ల నాగరాజు.. కుంతి శ్రీ శైలం, వినోద్ కుమార్లతో కలిసి డ్రగ్ రవాణా చేస్తున్నాడని తెలిపారు.
Also Read:-రాయదుర్గంలో అక్రమ నిర్మాణాలు కూల్చివేత
గతంలో ఆల్ఫా జోలం సరఫరా కేసులో అరెస్ట్ అయిన అంజిరెడ్డి అనే నిందితుడి శిష్యుడే ఈ కంచెర్ల నాగరాజు అని వెల్లడించారు. ఈ కేసులో ప్రధాన నిందితులను అరెస్ట్ చేశామని.. పరారీలో ఉన్న మరో ఇద్దరి కోసం గాలిస్తున్నట్లు తెలిపారు. ఈ సందర్భంగా హైదరాబాద్ యువతకు సీపీ శ్రీనివాస్ రెడ్డి కీలక విజ్ఞప్తి చేశారు. ‘‘దయచేసి నగర యువత డ్రగ్స్ బారిన పడకండి. పార్టీలకు వెళ్లే యూత్.. తెలిసినా, తెలియని వ్యక్తులతో పార్టీలకు వెళ్ళినపుడు అప్రమత్తంగా ఉండాలి. మాదక ద్రవ్యాలను కూల్ డ్రింక్స్లో కలిపి ఇస్తుంటారు కాబట్టి అలెర్ట్ గా ఉండాలి. తల్లి దండ్రులు సైతం తమ పిల్లలు ఎవరితో పార్టీలకు పోతున్నారో గమనిస్తూ ఉండాలి’’ అని సూచన చేశారు.
