ఇబ్రహీంపట్నం, వెలుగు: ఫార్మాసిటీ రద్దు చేశామని ప్రభుత్వం స్పష్టమైన ప్రకటన చేయాలని సీపీఎం రాష్ట్ర కార్యదర్శి జాన్ వెస్లీ డిమాండ్ చేశారు. మంగళవారం రంగారెడ్డి జిల్లా యాచారం మండలం మేడిపల్లిలో సీపీఎం నేతలు పర్యటించారు. ఈ సందర్భంగా ఫార్మాసిటీలో భూములు కోల్పోయిన రైతుల సమస్యలను అడిగి తెలుసుకున్నారు. అనంతరం నిర్వహించిన సమావేశంలో ఆయన మాట్లాడారు. ఫార్మాసిటీ ఏర్పాటును ప్రభుత్వం రద్దు చేసినట్టు స్పష్టమైన ప్రకటన చేయాలని కోరారు.
ఇక్కడి రైతుల సమస్యలను పరిష్కరించాలని డిమాండ్ చేశారు. ప్రాజెక్టుల కోసం చేపట్టే బలవంతపు భూసేకరణకు తాము వ్యతిరేకమని తెలిపారు. ఎవరైనా రైతులు స్వచ్ఛందంగా భూములు ఇస్తామంటే వారికి మార్కెట్విలువ ప్రకారం నష్టపరిహారం చెల్లించాలని కోరారు. ఇక్కడి రైతులకు రుణమాఫీ, రైతుభరోసా, రైతుభీమాలాంటి సంక్షేమ పథకాలను అమలుచేయాలన్నారు. రంగారెడ్డి జిల్లా యాచారం, కందుకూరు మండలాల్లో రైతుల సమస్యలు పరిష్కరించకుంటే సీపీఎం పోరాటం చేసి వారికి బాసటగా నిలుస్తుందని పేర్కొన్నారు.
