- రామంతాపూర్లో ఘటన
ఉప్పల్, వెలుగు: పైసలన్నీ రెండో భార్యకు ఇస్తున్నాడని తండ్రిని కొడుకు దారుణంగా హత్య చేశాడు. ఈ ఘటన ఉప్పల్ పీఎస్ పరిధిలో జరిగింది. వివేక్నగర్లోని సూర్య అపార్ట్ మెంట్లో ఉండే పాండుసాగర్(54)కు భార్య, ముగ్గురు పిల్లలున్నారు. పాండుసాగర్ అదే ఏరియాలో టెంట్హౌజ్నిర్వహిస్తున్నాడు. నాలుగేండ్ల కిందట పీర్జాదిగూడకు చెందిన విజయలక్ష్మి అనే మహిళను రెండో పెండ్లి చేసుకున్న పాండుసాగర్ ఆమెతోనే ఉంటున్నాడు. పాండుసాగర్ తమను పట్టించుకోవడడం లేదని, డబ్బులన్నీ విజయలక్ష్మికే ఇస్తున్నాడని కొడుకులు, మొదటి భార్య అతడిపై కోపంగా ఉన్నారు.
దీంతో పెద్ద కొడుకు పవన్(25)తో కొంత కాలంగా గొడవలు జరుగుతున్నాయి. టెంట్ హౌజ్ సామాన్లు పెట్టేందుకు పాండుసాగర్ ఈ మధ్యే రామంతాపూర్ పరిధి శ్రీనివాసపురంలోని ఓ అపార్ట్ మెంట్లో ఫ్లాట్ అద్దెకు తీసుకున్నాడు. పాండుసాగర్ సోమవారం సాయంత్రం 4 గంటలకు ఆ ఫ్లాట్లోఉండగా అక్కడకు వచ్చిన పవన్ తమ వద్దకు ఎందుకు రావడం లేదని తండ్రిని నిలదీశాడు. దీంతో ఇద్దరి మధ్య గొడవ జరిగింది. ఆగ్రహానికి గురైన పవన్ టెంట్ హౌజ్లో ఉన్న పెద్ద సుత్తితో తండ్రితలపై బలంగా కొట్టాడు. తీవ్రంగా గాయపడ్డ పాండుసాగర్ అక్కడికక్కడే చనిపోయాడు. విషయం తెలుసుకున్న పోలీసులు ఘటనా స్థలానికి చేరుకుని డెడ్ బాడీని పోస్టుమార్టం కోసం ఉస్మానియాకు తరలించారు. కేసు ఫైల్ చేసి దర్యాప్తు చేస్తున్న పోలీసులు నిందితుడు పవన్ను అదుపులోకి తీసుకొని విచారిస్తున్నట్లు సమాచారం.
