నిజామాబాదు జిల్లాలో పెరిగిన క్రైం రేట్

• ఆత్మహత్యలు, రోడ్​ యాక్సిడెంట్స్​ మృతులు ఎక్కువే
• 1289 కేసులు నమోదు, రూ.8.44 కోట్ల సొత్తు నష్టం
• ఇప్పటికీ ఆచూకీ తెలియని 138 మంది పెద్దలు, 10 మంది పిల్లలు  
• ఏడాదిలో డయల్​100కు 61 వేలకు మించి ఫోన్​కాల్స్​

నిజామాబాద్, వెలుగు: జిల్లా పోలీస్​ కమిషనరేట్​పరిధిలో ఈ ఏడాది నేరాల సంఖ్య బాగా పెరిగింది. కొందరు పోలీస్​ ఆఫీసర్ల ట్రాన్స్​ఫర్లు వివాదం రాజేయగా లంచాలు తీసుకుంటూ అవినీతికి పాల్పడుతున్న 14 మంది ఆఫీసర్లకు ఫోకల్​పోస్టింగ్​లు ఇవ్వొద్దని  ఏకంగా డీజీ ఆఫీస్​ నుంచి వచ్చిన లెటర్​ కలకలం రేపింది. గత అసెంబ్లీ ఎలక్షన్ ​టైంలో సీపీగా బాధ్యతలు తీసుకున్న కల్మేశ్వర్​ సింగనెవార్​అక్టోబర్​లో అనూహ్యంగా ట్రాన్స్​ఫర్​అయ్యారు.

అప్పటి నుంచి కామారెడ్డి ఎస్పీ సింధూశర్మ ఇన్​చార్జి సీపీగా వ్యవహరిస్తున్నారు. కొత్త పోలీస్​బాస్ లేని లోటును స్పష్టంగా తెలుస్తోంది. నిరంతర అజమాయిషీలేక పోలీస్ వ్యవస్థ గాడితప్పగా, ప్రజల ఆస్తులకు రక్షణ కరువవుతోంది. కేసుల దర్యాప్తు లో స్పీడ్​లేక బాధితులకు తక్షణ న్యాయం జరగడంలేదు.

ఆస్తి నష్టం కేసులు1,289

ఈ సంవత్సరం జిల్లాలో దొంగతనాలు, దోపిడీ, చైన్​స్నానింగ్, వెహికల్స్​చోరీ తదితర  కేసులు 1,289 నమోదుకాగా  రూ.8.44 కోట్ల విలువ సొత్తు ప్రజలు నష్టపోయారు. ఇందులో కేవలం 407 కేసులను శోధించి రూ.2.02 కోట్ల విలువ సొత్తును మాత్రమే పోలీసులు రికవరీ చేశారు. రికవరీ 31 శాతానికే పరిమితమైంది.  వైట్​కాలర్​ నేరాలు 742 నమోదు కాగా సైబర్​ క్రైం కేసులు 376 రిజిష్టర్​ అయ్యాయి. గత రెండేండ్ల కంటే కేసులు పెరిగాయి.  అట్రాసిటీ కేసులు 101 నమోదు కాగా దర్యాప్తు కొనసాగుతోంది.

మహిళలపై అఘాయిత్యాలు

ఏడాది కాలంలో ఇప్పటి వరకు జిల్లాలో మహిళలపై 77 రేప్​ ఘటనలు జరిగాయి. వరకట్న వేధింపులు, ఈవ్​ టీజింగ్​తదితర కేసులు 593 రిజిస్ట్రర్ అయ్యాయి. బాలికలపై అత్యాచార సంఘటనలు 115 జరిగాయి.  నిందితులపై పోక్సో కేసులు పెట్టి జైలుకు పంపారు.  మొత్తం 42 హత్యలు జరుగగా, హత్యాయత్నం కేసులు 47, కిడ్నాప్​ కేసులు 57, దాడులలో గాయపడిన కేసులు 1,185 నమోదయ్యాయి. 

రోడ్​ యాక్సిడెంట్స్​లో 335 మృతి

ఈ ఏడాది జిల్లాలో 322 రోడ్​ యాక్సిడెంట్లలో 335 మంది ప్రాణాలు కోల్పోగా, 509 రోడ్​యాక్సిడెంట్స్​లో 758 మంది గాయాలపాలయ్యారు. వీరిలో సుమారు 200 మంది ఇంకా బెడ్​పైనే ఉన్నారు.  ఆయా కారణాలతో 442 మంది ఆత్మహత్యలకు పాల్పడ్డారు. 984  మిస్సింగ్​ కేసులు నమోదు కాగా 846 మందిని వెతికిపట్టుకున్నారు. ఇంకా 138 మంది జాడతెలియరాలేదు. 18 ఏండ్ల లోపు వారు 140 మిస్సింగ్​కాగా 130 దొరికారు.

ఇంకా 10 మంది అడ్రస్​ తెలియదు. జనవరి నుంచి ఇప్పటిదాకా రూ.1.35 కోట్ల విలువైన పీడీఎస్​రైస్ ను​పోలీసులు  పట్టుకున్నారు. 34 మందిపై ఇసుక దొంగతనం కేసులు నమోదు చేశారు. పేకాట ఆడుతున్న 2,179 మందిని, మట్కాలో దొరికిన 111 మందికి ఊచలు లెక్కబెట్టించారు. 22 గంజాయి కేసుల్లో 58 మంది నిందితులు దొరకగా మొదటిసారి కొకైన్​ ఆనవాళ్లు బయటపడ్డాయి. 

డయల్​100 చైతన్యం

ఆపద టైంలో డయల్​100 ఫోన్​చేయాలని ప్రచారం ప్రజల్లోకి బాగా వెళ్లింది. ఏడాదిలో మొత్తం 61,606 మంది  ఫోన్​చేసి పోలీసుల సేవలు పొందారు. నేరాలకు పాల్పడిన వారికి 15 కేసులలో కోర్టు శిక్షలు పడేలా దర్యాప్తు చేశారు. రోడ్​ ప్రమాదాలు, డ్రంకెన్​ డ్రైవ్, మూఢ నమ్మకాలు, మత్తు పదార్థాల వాడకంతో జరిగే అనర్థాలపై అవగాహన ప్రొగ్రామ్స్​కు ఈసారి ప్రయారిటీ ఇచ్చారు. నేరాల శోధనకు ఉపయోగపడేలా 8,567 కమ్యూనిటీ సీసీ కెమెరాలు ఏర్పాటు చేయించారు. ఆపరేషన్​ ముస్కాన్​లో 139 మంది పిల్లలకు విముక్తి కల్పించారు.