- అధికార పార్టీకి ఓ రూల్..ప్రతిపక్షాలకు మరో రూల్
- అక్రమ కేసులు అరెస్ట్లతో వివాదాస్పదం
- జిల్లాలో సెంట్రల్ ఇంటెలిజెన్స్ నిఘా
- ఉమ్మడి పాలమూరు జిల్లాలో నలుగురు ఎస్పీల బదిలీపై రాష్ట్రవ్యాప్తంగా చర్చ
మహబూబ్నగర్, వెలుగు : ఉమ్మడి పాలమూరు జిల్లాలోని పోలీసుల తీరుపై మొదటి నుంచి విమర్శలు వెల్లువెత్తాయి. ఎన్నికల నేపథ్యంలో ఉమ్మడి జిల్లాలోని జోగుళాంబ గద్వాల, నారాయణపేట, పాలమూరు, నాగర్కర్నూల్ జిల్లాల ఎస్పీలను కేంద్ర ఎన్నికల కమిషన్ బదిలీ చేసింది. ఎస్పీలు కె.సృజన, ఎన్.వెంకటేశ్వర్లు, కె.నరసింహ, ఎ.మనోహర్కు ఎలక్షన్ బాధ్యతలు అప్పగించరాదని రాష్ర్ట ప్రభుత్వానికి ఆదేశాలు జారీ చేసింది. త్వరలో మరో రెండు డిపార్ట్మెంట్లకు చెందిన ఆఫీసర్లపై కూడా చర్యలుంటాయని ఈసీ వార్నింగ్ ఇవ్వడం చర్చనీయాంశంగా మారింది.
అక్రమ కేసులు, అరెస్టులు..
మహబూబ్నగర్, నాగర్కర్నూల్, గద్వాల, నారాయణపేట జిల్లాల్లో కొంత కాలంగా పోలీసుల తీరుపై తీవ్ర విమర్శలు వస్తున్నాయి. మంత్రులు, ఎమ్మెల్యేలు, ఇతర లీడర్లకు సపోర్ట్ చేస్తున్నారని పోలీసులపై ఆరోపణలు ఉన్నాయి. కొందరు రూలింగ్ పార్టీ లీడర్ల దురుసు ప్రవర్తనపై బాధితులు కంప్లైంట్ చేయడానికి స్టేషన్లకు వెళ్లితే.. తిరిగి బాధితుల మీదనే కేసులు పెడతామని హెచ్చరించి పంపించారనే వార్తలు వచ్చాయి. అపొజిషన్ లీడర్లను రూలింగ్ పార్టీలో చేరాలని ఒత్తిడి చేయడం, పార్టీ మారకుంటే పోలీసులను అడ్డు పెట్టుకొని బెదిరింపులకు పాల్పడడం తదితర విషయాలపై ఎస్పీలకు చెప్పినా పట్టించుకోలేదని అపొజిషన్ పార్టీల లీడర్లు కొద్ది రోజుల కిందట ఈసీకి దృష్టికి తీసుకెళ్లారు.
సర్కార్ పక్షానికే సహకారం..
ఈ నాలుగు జిల్లాల్లో పోలీసులు రూలింగ్పార్టీకి ఒక రూల్, అపొజిషన్ పార్టీలకు మరో రూల్ అన్నట్లు వ్యవహరించారనే ఆరోపణలు ఉన్నాయి. రూలింగ్ పార్టీ సభలకు సహాయ సహకారాలు అందిస్తున్నారు. అదే అపొజిషన్ పార్టీల సభలకు పబ్లిక్ను రానివ్వకుండా అడ్డుపడుతున్నారని ప్రతిపక్షాల లీడర్లు విమర్శించారు. దీనికితోడు ప్రతిపక్షాలు, స్టూడెంట్లు, వివిధ రంగాల కార్మికులు ధర్నాలు, నిరసన కార్యక్రమాలు నిర్వహిస్తే బలవంతంగా అరెస్టులు చేశారు. సీఎం, మంత్రుల పర్యటనలు ఉంటే ముందస్తు అరెస్టులు చేసి స్టేషన్కు తరలించి ఇబ్బందులకు గురి చేశారు. రూలింగ్ పార్టీ లీడర్లు ధర్నాలు, నిరసన కార్యక్రమాల వల్ల ఇబ్బంది ఏర్పడినా ఎలాంటి చర్యలు తీసుకోలేదని ఇటీవల ప్రతిపక్షాల లీడర్లు ఈసీకి ఫిర్యాదు చేశారు.
మరో రెండు డిపార్ట్మెంట్లపై కూడా ఆరోపణలు..
రాష్ర్ట ప్రభుత్వానికి ఆదాయ వనరుగా ఉన్న మరో రెండు డిపార్ట్మెంట్లపై కూడా ఈసీ నిఘా పెట్టింది. కొందరు ఆఫీసర్లు రూలింగ్పార్టీ లీడర్లకు అనుకూలంగా వ్యవహరిస్తున్నారనే ఫిర్యాదులు ఈసీకి వెళ్లాయి. ఇంటెలిజెన్స్ టీం ఈ రెండు డిపార్ట్మెంట్లపై కూడా నిఘా పెట్టింది. ఈ టీం ఇచ్చే రిపోర్ట్ తర్వాత ఈసీ ఎలాంటి చర్యలు తీసుకుంటుందనే దానిపై ఆసక్తి నెలకొంది.
బుధవారం ఎస్పీలను ట్రాన్స్ఫర్స్ చేసిన సమయంలోనే ఈ రెండు డిపార్ట్మెంట్ల ఆఫీసర్లు జాగ్రత్తగా ఉండాలని, తీరు మార్చుకోకుంటే కఠిన చర్యలు తీసుకుంటామని ఈసీ
వార్నింగ్ ఇచ్చింది.
సెంట్రల్ ఇంటెలిజెన్స్ నిఘా..
ఇక్కడి పరిస్థితులను తెలుసుకునేందుకు ఈసీ కొద్ది రోజుల కిందట సెంట్రల్ ఇంటెలిజెన్స్ టీంను రంగంలోకి దింపింది. వీరు ప్రతి నిత్యం జిల్లా కేంద్రాలు, నియోజకవర్గాలు, మండలాల్లో తిరుగుతూ ప్రజలు, అపొజిషన్ పార్టీల లీడర్లకు పోలీసులు ఎలా సహకరిస్తున్నారు? రూలింగ్ పార్టీ లీడర్లతో ఎలా ఉంటున్నారు అనే వివరాలు సేకరించారు. కొద్ది రోజుల కిందట ఈ వివరాలను ఈసీకి అందించారు. దీనితో పాటు ప్రజలు, అపోజిషన్ లీడర్లు ఇచ్చిన కంప్లైంట్ల ఆధారంగా రూలింగ్ పార్టీ లీడర్లకు వత్తాసు పలుకుతున్న ఆఫీసర్లను ట్రాన్స్ఫర్లు చేశారు.
