కొత్తకోట, వెలుగు: వనపర్తి జిల్లా కొత్తకోట మండలంలోని రామకృష్ణ పురం గ్రామంలో శనివారం చెరువులోకి దిగిన ఓ వ్యక్తికి మొసలి కనిపించడంతో భయపడి నీటిలో మునిగి చనిపోయాడు. గ్రామస్తులు తెలిపిన వివరాల ప్రకారం.. రాములు(60) రోజు వారీగానే బర్రెలను మేపడానికి ఊరి చివర ఉన్న చెరువు దగ్గరకు తీసుకెళ్లాడు. మేసిన బర్రెలకు నీళ్లు తాగించడానికి వాటితోపాటు తాను కూడా చెరువులోకి వెళ్లాడు.
చెరువులో కొద్దిదూరం వెళ్లి నీళ్లు తాగుతున్న బర్రెలను మరింత లోపలికి పోనివ్వకుండా రాములు కాపలాగా ఉన్నాడు. అయితే తనకు దగ్గరలోనే మొసలి కనిపించింది. ఒక వైపు బర్రెలు మరోవైపు మొసలి ఉండడంతో భయంతో ఏంచేయాలో తోచక నీటి లోపలికి వెళ్లి మొసలికి కనిపించకుండా మునిగాడు. పైకి వస్తే మొసలి ఎక్కడ చంపేస్తున్న భయంతో అలాగే నీటిలోపలే ఉండడంతో ప్రాణాలు కోల్పోయాడు. బర్రెలు చెరువులో, అతడి చెప్పులు చెరువు గడ్డపై ఉండడంతో గ్రామస్తులు గాలించడంతో డెడ్బాడీ దొరికింది. మృతుడికి ఇద్దరు కొడుకులు, కూతురు ఉన్నారు.
