హైదరాబాద్, వెలుగు: చైనా మాంజాతో విద్యుత్ సరఫరాలో అంతరాయం ఏర్పడుతున్నది. కరెంట్ వైర్లపై మెటల్ మాంజా పడటంతో షార్ట్ సర్క్యూట్ అవుతున్నది. దీంతో హైదరాబాద్తో పాటు పట్టణ ప్రాంతాల్లో తరుచూ కరెంట్ సప్లై ఆగిపోతున్నది. ట్రాన్స్ఫార్మర్లపై పతంగులు పడటంతో కూడా ఇబ్బందులు తలెత్తుతున్నాయి. షార్ట్ సర్క్యూట్ కారణంగా ఇండ్లు, దుకాణాల్లో ఉన్న విలువైన సామగ్రి కాలిపోతున్నాయి.
దీనికితోడు ప్రజలకు ప్రాణహాని కలుగుతున్నది. ఈ నేపథ్యంలో డిస్కంలు గైడ్లైన్స్ రూపొందించాయి. సదరన్ డిస్కమ్ సీఎండీ ముషారఫ్ ఫారూఖి ఈమేరకు ప్రెస్నోట్ రిలీజ్ చేశారు. ‘‘పతంగులు ఎగురవేసేటప్పుడు జాగ్రత్తలు పాటించాలి. విద్యుత్ తీగలు, ట్రాన్స్ఫార్మర్ల దగ్గర్లో పతంగులు ఎగురవేయొద్దు. తమ పిల్లల విషయంలో తల్లిదండ్రులే జాగ్రత్తలు తీసుకోవాలి’’అని ముషారఫ్ ఫారూఖి సూచించారు.
జారీ చేసిన మార్గదర్శకాలు
- కరెంట్ వైర్లు, ట్రాన్స్ఫార్మర్లు, సబ్ స్టేషన్లకు దూరంగా.. మైదాన ప్రదేశాల్లో పతంగులు ఎగురవేయాలి.
- కాటన్, నైలాన్, లెనిన్తో చేసిన మాంజాలు మాత్రమే వాడాలి. చైనా, మెటాలిక్ మాంజాలు వాడొద్దు. మెటాలిక్ మాంజా నుంచి కరెంట్ సప్లై అవుతుంది.
- పొడి వాతావరణంలోనే పతంగులు ఎగురవేయాలి. మంచు, తడి వాతావరణంలో పతంగులు ఎగురవేయడంతో విద్యుత్ షాక్కు గురయ్యే ప్రమాదం ఉంటుంది.
- కరెంట్ వైర్లపై పతంగులు, మంజా పడితే వాటిని ముట్టుకోవద్దు. వాటిని పట్టుకుని లాగినప్పుడు వైర్లు ఒకదాంతో ఒకటి టచ్ అయి ప్రమాదం జరిగే అవకాశం ఉంటుంది.
- ఏదైనా ప్రమాదం సంభవించినప్పుడు వెంటనే 1912కు కాల్ చేయాలి.
- మొబైల్ యాప్ లేదా www.tgsouthern power.org వెబ్‌‌సైట్ ద్వారా కూడా సమాచారం అందజేయొచ్చు.
