- నాసిరకం పనులతో పగులుతున్న సీసీ, బీటీ రోడ్లు
- కొత్తగూడెం మున్సిపాలిటీలో రూ. 60కోట్ల డెవలప్మెంట్ వర్క్స్పై కొరవడిన పర్యవేక్షణ
- ఇదే అదనుగా రెచ్చిపోతున్న కాంట్రాక్టర్లు!
భద్రాద్రికొత్తగూడెం, వెలుగు : జిల్లా కేంద్రమైన కొత్తగూడెంలో డెవలప్మెంట్వర్క్స్ఇష్టారాజ్యంగా కొనసాగుతున్నాయి. మున్సిపాలిటీలో సీసీ రోడ్లు, డ్రైనేజీలతో పాటు కమ్యూనిటీ హాల్స్ నిర్మాణ పనుల్లో నాణ్యత కొరవడుతోందనే విమర్శలు వస్తున్నాయి. డ్రైనేజీల మధ్యలోనే కరెంట్ స్తంభాలు ఉంటున్నాయి. చెత్తాచెదారం వస్తే ఆ స్తంభాలకు తట్టుకుని మురుగు నీరు రోడ్డుపైకి వచ్చే పరిస్థితి నెలకొంది. చాలా చోట్ల సీసీ రోడ్లు, డ్రైనేజీ వాల్స్, కప్పులుపగుళ్లు వచ్చాయి. పట్టణంలోని బీటీ రోడ్లు అక్కడక్కడ కంకర తేలి డేంజర్గా మారాయి.
రూ. 60కోట్లతో పనులు..
కొత్తగూడెం మున్సిపాలిటీలో దాదాపు రూ.60కోట్లతో అభివృద్ధి పనులు జరుగుతున్నాయి. అధికారుల పర్యవేక్షణ కొరవడడంతో క్వాలిటీ సరిగా లేక మూన్నాళ్లకే శిథిలావస్థకు చేరే పరిస్థితి నెలకొంది.
- పట్టణంలోని సూర్యోదయ స్కూల్ నుంచి అపార్ట్మెంట్స్, పాత కొత్తగూడెం వెళ్లే దారిలో డ్రైనేజీ పనులు అడ్డదిడ్డంగా చేపట్టారు. కొన్ని పనులు అసంపూర్తిగా వదిలేయడంతో ప్రజలు ఇబ్బందులు పడుతున్నారు. కరెంట్స్తంభాలను మధ్యలో ఉంచే డ్రైనేజీలు కట్టడం ఇంజినీరింగ్అధికారుల పనితీరుకు అద్దం పడుతోంది. చెత్తతో కూడిన మురుగునీటి వరద వచ్చినప్పుడు డ్రైనేజీ మధ్యలోని స్తంభాలకు తగిలి ఆ నీరంతా నిలిచిపోయే ప్రమాదం ఉంది. ఈ విషయం ఆఫీసర్లకు తెలిసినా పట్టించుకోవడంలేదనే విమర్శలు ఉన్నాయి.
- సీసీ రోడ్లు, డ్రైనేజీల నిర్మాణాల్లో సిమెంట్, కంకర, ఇసుక, వాటర్ మిక్సింగ్ను క్రమ పద్ధతి లేకుండా చేస్తున్నారు. గోదావరి ఇసుకను వాడాల్సి ఉన్నప్పటికీ సమీపంలోని వాగుల్లో క్వాలిటీ లేని ఇసుకను కాంట్రాక్టర్లు వాడుతున్నారు. ఈ విషయంలో ఆఫీసర్లు చూసీచూడనట్లు వదిలేస్తుండడంతో కాంట్రాక్టర్లు మరింత రెచ్చిపోతున్నారు. ఈ పరిస్థితితో చేసిన పనులు మూన్నాళ్ల ముచ్చటేనని తెలుస్తోంది. పట్టణంలోని పలు ప్రాంతాల్లో ఆరు నెలల కింద వేసిన సీసీ రోడ్ల నాణ్యత అప్పుడే బయటపడుతోంది. బీటీ రోడ్లు కూడా కంకర తేలుతున్నాయి. ప్రస్తుతం మున్సిపాలిటీల్లో పనులను పర్యవేక్షించాల్సిన స్పెషల్ ఆఫీసర్లు ఎన్నికల డ్యూటీలో ఉన్నారు. ఇదే అదనుగా కాంట్రాక్టర్లు నాణ్యతను పట్టించుకోకుండా త్వరగా పనులు పూర్తి చేసి చేతులు దులుపుకునేందుకు చూస్తున్నారు.
నాణ్యతలో రాజీ పడేది లేదు
డెవలప్మెంట్ వర్క్స్ విషయంలో నాణ్యతలో రాజీ పడేది లేదు. క్వాలిటీ లేకుంటే కాంట్రాక్టర్లరకు బిల్లులు ఆపేస్తాం. సీసీ రోడ్లు, డ్రైనేజీలు, ఇతరత్రా వర్క్స్ను పక్కాగా పర్యవేక్షించాలని ఇంజినీరింగ్ అధికారులను ఆదేశిస్తాం.
శేషాంజన్స్వామి. కమిషనర్, కొత్తగూడెం మున్సిపాలిటీ
క్వాలిటీకి ప్రాధాన్యత ఇస్తున్నాం
కొత్తగూడెం పట్టణంలో జరుగుతున్న అభివృద్ధి పనుల్లో నాణ్యతకు ప్రాధాన్యత ఇస్తున్నాం. ఎక్కడైనా నాణ్యత లేకుండా పనులు జరిగినట్లు ప్రజలు గుర్తిస్తే మా దృష్టికి తీసుకురావాలి. చర్యలు తీసుకొని సమస్యను పరిష్కరిస్తాం.
రవి కుమార్, డీఈ, కొత్తగూడెం మున్సిపాలిటీ
