- కంటైనర్ డీసీఎంలో తరలిస్తుండగా పట్టుకున్న సైబరాబాద్ పోలీసులు
- ఒడిశా నుంచి హైదరాబాద్మీదుగా మహరాష్ట్రకు స్మగ్లింగ్
- ఐదుగురు అరెస్ట్.. పరారీలో ప్రధాన సప్లయర్, రిసీవర్
గచ్చిబౌలి, వెలుగు : ఒడిశా నుంచి హైదరాబాద్ మీదుగా మహారాష్ట్రకు కంటైనర్ డీసీఎంలో తరలిస్తున్న 803 కిలోల గంజాయిని సైబరాబాద్ పోలీసులు పట్టుకున్నారు. కేసు వివరాలను ఆదివారం గచ్చిబౌలిలోని కమిషనరేట్ కార్యాలయంలో ఎస్ఓటీ డీసీపీ శ్రీనివాస్, శంషాబాద్ డీసీపీ రాజేశ్ వెల్లడించారు. ఒడిశాలోని మల్కాజిగిరి చిత్రగుండ మండలం కెందుగుగా గ్రామానికి చెందిన సోమనాథ ఖరా(34) గంజాయి స్మగ్లింగ్ దందా చేస్తున్నాడు. కర్నాటకకు చెందిన సంజీవ్ విఠల్రెడ్డి (డీసీఎం కంటైనర్ డ్రైవర్కం ఓనర్) తో సోమనాథకు పరిచయం ఏర్పడింది.
సంజీవ్తో ఒడిశా నుంచి హైదరాబాద్ మీదుగా మహరాష్ట్రకు గంజాయి రవాణా చేసేందుకు సోమనాథ రూ.2 లక్షలకు డీల్ కుదుర్చుకున్నాడు. గత నెల 30న సంజీవ్ కు పటాన్చెరు నుంచి విశాఖపట్నంకు ఫుడ్ ఐటమ్స్ డెలివరీ ఆర్డర్ వచ్చింది. పటాన్చెరులో సరుకు లోడ్ చేసుకొని తన డ్రైవర్ సంజీవ్కుమార్ హొళ్లప్పను తీసుకొని సంజీవ్ విశాఖపట్నం వెళ్లాడు. గాజువాకలో సరుకు డెలివరీ చేసి సోమనాథను సంప్రదించాడు. విశాఖలో గంజాయిని లోడ్ చేసుకొని హైదరాబాద్ శివారు పటాన్చెరు వద్ద నవీ ముంబైకు సురేష్ మారుతి పాటిల్ కు అందజేయాలని సంజీవ్ కు సోమనాథ తెలిపాడు.
ఈనెల 1న సంజీవ్ తన డీసీఎంలో విశాఖలో కెమికల్ సాల్వెంట్ డ్రమ్ములను లోడ్ చేసుకున్నాడు. తర్వాత సోమనాథ తన ఫ్రెండ్స్ జగ సునా (26), సునీల్ ఖోస్లా (28) డ్రైవర్తో కలిసి ఓ కారును అద్దెకు తీసుకున్నాడు. విశాఖ నుంచి విజయనగరం గొట్లాం ప్రాంతానికి వెళ్లి 26 గన్నీ బ్యాగుల గంజాయిని తీసుకొని సంజీవ్ కు అప్పగించాడు. సంజీవ్ ఆ బ్యాగులు లోడ్ చేసుకుని డ్రైవర్ హొళ్లప్పతో బయల్దేరాడు. వారికి ఎస్కార్ట్గా సోమనాథ, జగ సూన, సునీత్ ఖోస్లా బయలుదేరారు.
వాహన తనిఖీల్లో దొరికారు
బాలానగర్ ఎస్ఓటీ పోలీసులు, శంషాబాద్ పోలీసులు టీజీ న్యాబ్ అధికారులు ఈనెల 3న పెద్ద గోల్కొండ ఔటర్ రింగు రోడ్డు జంక్షన్ వద్ద వాహనాలు తనిఖీ చేస్తుండగా డీసీఎం కంటైనర్ను అదుపులోకి తీసుకున్నారు. చెక్ చేయగా కెమికల్ సాల్వెంట్ డ్రమ్ముల చాటున ఉంచిన 803 కిలోల గంజాయి దొరికింది. డ్రైవర్ సంజీవ్ కుమార్ హొళ్లప్ప, ఓనర్ సంజీవ్రెడ్డి, కమిషన్ ఏజెంట్ సోమనాథ ఖరా, సునీల్ ఖోస్లా, జగ సునాను అరెస్టు చేశారు. గంజాయి విలువ రూ.2.81 కోట్లు ఉండవచ్చని పోలీసులు తెలిపారు.
