దొంగతనానికి ముందు దేవుళ్లకు మొక్కులు

• మధ్యప్రదేశ్​ నుంచి వచ్చి సిటీలో చోరీలు చేస్తున్న ముఠాలు అరెస్ట్​ 
• 6 కత్తులు, రెండు సెట్ల కట్టర్లు, రూ.11,500 క్యాష్​ స్వాధీనం..

గచ్చిబౌలి, వెలుగు : దొంగతనాలను చేసే ముందు సొంతూరిలో దేవుళ్లకు మొక్కి వచ్చి, సిటీలో చోరీలు చేస్తున్న అంతర్రాష్ట్ర దొంగల ముఠాలను సైబరాబాద్​ పోలీసులు అరెస్ట్​ చేశారు. సైబరాబాద్​ క్రైమ్​ డీసీపీ నర్సింహా మంగళవారం గచ్చిబౌలిలోని మాదాపూర్​ డీసీపీ అఫీస్​లో మీడియాకు వివరాల వెళ్లడించారు. ఆయన వివరాల ప్రకారం.. మధ్యప్రదేశ్​లోని ధర్​ జిల్లాకు చెందిన కరణ్​ మనోహర్​ బాబర్​(23), ప్యార్​సింగ్​ బావులా(27), ధేబ్రా బావులా(27) ఒక గ్యాంగ్​గా.. కడక్​ సింగ్​(38), చెందిన ఠాకూర్​ ఎడియా(30), కుమన్​ ఎడియా(30) కలిసి మరో గ్యాంగ్​గా ఏర్పడ్డారు.

 మద్యం, పేకాట అలవాటు ఉన్న వీరు జల్సాల కోసం దొంగతనాలు చేయాలని ప్లాన్​ చేసుకున్నారు. సొంతూరు, చుట్టూపక్కల దొంగతనాలు చేస్తే అనుమానాలు వస్తాయని హైదరాబాద్​వచ్చి చోరీలు ప్రారంభించారు. తాళం వేసి ఉన్న ఇండ్లను గుర్తించి, మధ్యాహ్నం రెక్కి చేసి, అర్ధరాత్రి తర్వాత పని కానిస్తారు. దొంగలించిన సొత్తుతో తిరిగి సొంతూరుకు వెళ్లి సమానంగా పంచుకుంటారు. కరణ్​మనోహర్​ బాబర్​ గ్యాంగ్​ మియాపూర్​ పోలీస్​ స్టేషన్​ లిమిట్స్​లోని ఓ విల్లాలో దొంగతనం చేశారు.

 కడక్​ సింగ్​ గ్యాంగ్​ పేట్​బషీరాబాద్​ పోలీస్​ స్టేషన్​ లిమిట్స్​లో దొంగతనానికి పాల్పడ్డారు. ఈ రెండు గ్యాంగులపై మియాపూర్​, పేట్​బషీరాబాద్​ పోలీస్​ స్టేషన్​లలో కేసులు నమోదు అయ్యాయి. మాదాపూర్​ సీసీఎస్​, బాలానగర్​ సీసీఎస్​ పోలీసులు స్థానిక పోలీసులతో కలిసి దర్యాప్తు చేపట్టారు. ఈనెల 7న మియాపూర్​లోని మక్తా వద్ద ముగ్గురిని, పేట్​బషీరాబాద్​ పోలీస్​ స్టేషన్​ లిమిట్స్​లోని గుండ్లపోచంపల్లి రైల్వే స్టేషన్​ వద్ద మరో ముగ్గురిని పోలీసులు అదుపులోకి తీసుకొని విచారించగా నేరాలు ఒప్పుకున్నారు. 

వీరి నుంచి 6 కత్తులు, రెండుసెట్ల కట్టర్​లు, రూ.11,500 క్యాష్​ను స్వాధీనం చేసుకున్నారు. వీరిపై మూడు కమిషనరేట్లతో పాటు సంగారెడ్డి, మెదక్​, నల్గొండ జిల్లాల్లో 35 కేసులు ఉన్నాయి. రెండు గ్యాంగ్​ సభ్యులు దొంగలించిన సొత్తును అమ్మిపెట్టే ఇద్దరు వ్యక్తులు రోహిత్​సోని, గౌరవ్​లతో పాటు మరో ఆరుగురు పరారీలో ఉన్నట్లు డీసీపీ తెలిపారు. దొంగతనాలు చేసే సమయంలో ఎవరైన అడ్డుపడితే చంపేందుకు కూడా వెనుకాడరని పేర్కొన్నారు.