ముంబై, ఢిల్లీ కేంద్రంగా ఫేక్ సర్టిఫికెట్ల వ్యాపారం
జగిత్యాల, వెలుగు : జగిత్యాల జిల్లా కేంద్రంగా కొనసాగుతున్న ఫేక్ సర్టిఫికెట్ల దందాను సైబరాబాద్ టాస్క్ఫోర్స్ పోలీసులు బహిర్గతం చేశారు. లోకల్పోలీసుల సహకారంతో శుక్రవారం అర్ధరాత్రి స్టూడెంట్ అకాడమీ సొసైటీలో సోదాలు నిర్వహించారు. సైబరాబాద్ టాస్క్ఫోర్స్ ఎస్ఐ నర్సింహారెడ్డి ఆధ్వర్యంలో ఈ తనిఖీలు కొనసాగాయి. సొసైటీ నిర్వాహకుడు ఖలీల్ను అరెస్టు చేసి విచారిస్తున్నారు.
ఈ సోదాల్లో జార్ఖండ్, యూపీ, గుజరాత్, మహారాష్ట్రకు చెందిన మొత్తం 18 యూనివర్సిటీలకు చెందిన సర్టిఫికెట్స్ను స్వాధీనం చేసుకున్నారు. గ్రాడ్యుయేషన్ సర్టిఫికెట్ కోసం రూ.15 నుంచి 20వేలు, ప్రొఫెషనల్ కోర్సు సర్టిఫికేట్ కోసం రూ.లక్షల్లో వసూలు చేస్తున్నట్టు అక్కడ దొరికిన రికార్డులను పరిశీలిస్తే తెలుస్తున్నది. డిస్టెన్స్ కోర్సుల్లో ఎగ్జామ్స్ రాయించిన 150 ఆన్సర్ షీట్స్ను కూడా పోలీసులు స్వాధీనం చేసుకున్నారు.
సొసైటీలోని సర్టిఫికెట్స్, హాల్ టికెట్స్, కంప్యూటర్స్, సెల్ఫోన్స్, ఆధార్కార్డులు, డ్రైవింగ్ లైసెన్సులు, ప్రింటర్, స్టాంపులను సీజ్ చేశారు. హైదరాబాద్లో దొరికిన ఫేక్ స్టడీ సర్టిఫికెట్స్ ఆధారంగా తనిఖీలు చేపట్టినట్టు తెలుస్తున్నది. ఈ దందా ముంబై, ఢిల్లీ కేంద్రంగా సాగుతున్నట్టు పోలీసులు ఓ అంచనాకొచ్చారు. సోదాలకు వచ్చిన టాస్క్ఫోర్స్ పోలీసులకు సొసైటీ నిర్వాహకుడు ఖలీల్ సహకరించలేదు. దుకాణం తెరిచేందుకు తాళాలివ్వకపోవడం, కంప్యూటర్ పాస్వర్డ్స్ చెప్పక పోవడంతో సోదాలు 4గంటలు లేట్గా ప్రారంభమై.. శనివారం తెల్లవారుజాము దాకా కొనసాగాయి.
