- ముగ్గురు సభ్యుల గ్యాంగ్ అరెస్ట్
- పలు రాష్ట్రాల్లో వీరిపై 1,292 కేసులు
గచ్చిబౌలి, వెలుగు : క్రెడిట్ కార్డుపై క్యాష్ బ్యాక్ ఆఫర్ వచ్చిందంటూ సైబర్ నేరగాళ్లు ఓ వ్యక్తి నుంచి రూ. 4 లక్షలకు పైగా కొట్టేశారు. సైబరాబాద్ సైబర్ క్రైమ్ పోలీసులు తెలిపిన వివరాల ప్రకారం.. సైబరాబాద్కు చెందిన ఓ వ్యక్తికి ఈ ఏడాది మార్చి 21న యాక్సిస్ బ్యాంక్ ఎగ్జిక్యూటివ్ అంటూ ఒకతను కాల్ చేశాడు. క్రెడిట్ కార్డుపై రూ.4,500 క్యాష్ బ్యాక్ ఆఫర్ ఉందని.. వచ్చే నెల బిల్లులో ఆ మొత్తాన్ని క్రెడిట్ చేస్తామని చెప్పాడు. అతడి మాటలు నమ్మిన బాధితుడు బ్యాంక్ అకౌంట్ కు సంబంధించిన డీటెయిల్స్ ను చెప్పాడు. ఆ తర్వాత అతడి బ్యాంక్ అకౌంట్ నుంచి 3 ట్రాన్జాక్షన్లలో రూ.4 లక్షల 71 వేలు డెబిట్ అయ్యాయి. మోసపోయినట్లు గుర్తించిన బాధితుడు సైబర్క్రైమ్ పోలీసులకు కంప్లయింట్ చేశాడు. పోలీసులు కేసు ఫైల్ చేసి దర్యాప్తు చేపట్టారు. ఢిల్లీలోని నజఫ్ గఢ్ ప్రాంతానికి చెందిన భూపేందర్ కుమార్, ఉత్తమ్ నగర్కు చెందిన హిమాన్షుకుమార్, సోను రాథోడ్ ముగ్గురు కలిసి గ్యాంగ్గా ఏర్పడి ఇలాంటి మోసాలు చేస్తున్నట్లు పోలీసులు తెలుసుకున్నారు. ఈ ముగ్గురిని అరెస్ట్ చేసి సోమవారం రిమాండ్కు తరలించారు. నిందితులపై దేశవ్యాప్తంగా పలు రాష్ట్రాల్లో 1,292 కేసులు నమోదయ్యాయని, అందులో తెలంగాణలో 166, సైబరాబాద్ లో 23 కేసులున్నాయని పోలీసులు తెలిపారు.
