- దశాబ్దాల కాలం ఆయన కనుసన్నల్లో కాంగ్రెస్ రాజకీయాలు
- జిల్లాకు తెలంగాణ వర్సిటీ, మెడికల్ కాలేజీ తెచ్చిన ఘనుడు
- మున్నూరు కాపు సంఘానికి జీవితకాల గౌరవ అధ్యక్షుడిగా..
- ఆయన పట్టుబడితే.. ఏ పనైనా అవ్వాల్సిందే
ఉమ్మడి నిజామాబాద్ జిల్లాలో డి.శ్రీనివాస్ రాజకీయ శకం ఒక సువర్ణ అధ్యాయం. సుమారు 40 ఏండ్లు పాలిటిక్స్లో తనదైన ముద్ర వేసిన ఆయన పర్మనెంట్ డెవలప్మెంట్ పనులతో అన్ని తరాల నేతలకు ఆదర్శంగా నిలిచారు. రాజకీయాలు వేరు, అభివృద్ధి వేరు అనే సూత్రాన్ని డీఎస్ బలంగా విశ్వసించేవారు. ఎదగడం, ఒదగడం తెలిసిన ఆయన జిల్లా కాంగ్రెస్ రాజకీయాలను కొన్నేండ్లపాటు శాసించారు. మున్నూరు కాపు సామాజిక వర్గానికి చెందిన డీఎస్ను జిల్లా కాపు సంఘాలు జీవితకాలపు అధ్యక్షుడిగా కొనసాగించాయి. ఇతర అన్ని వర్గాలు ఆయనను ప్రత్యేకంగా అభిమానించి గౌరవించేవారు. మొత్తంగా చెప్పాలంటే ఇందూరులో డీఎస్ పెద్దమనిషిగా పేరొందారు.
నిజామాబాద్, వెలుగు: రాష్ట్రంలో తనను లీడర్గా నిలబెట్టిన నిజామాబాద్అసెంబ్లీ సెగ్మెంట్పై డీఎస్కు ప్రత్యేక అభిమానం ఉంది. యాక్టివ్ పాలిటిక్స్లో ఎంత బిజీగా ఉన్నా పబ్లిక్ రిలేషన్ మరిచేవారు కాదు. రెగ్యులర్ పనులతో సంతృప్తి చెందని ఆయన పర్మనెంట్ ప్రాజెక్టులను ప్రజల కోసం ఏర్పాటు చేయించారు. సిటీ విస్తరణను ముందుగానే గ్రహించి 2008లో ఇందూర్ మున్సిపాలిటీ పరిధిలో అండర్ గ్రౌండ్ డ్రైనేజీ (యూజీడీ) నిర్మించారు. రూ.290 కోట్లు ఇందుకు ఖర్చయ్యాయి. నగరానికి లింక్ లేకుండా కంఠేశ్వర్ మీదుగా డిచ్పల్లికి వెళ్లే బైపాస్ రోడ్డుకు ఆద్యుడు డీఎస్సే. నగరంలోని ఒక భాగం ప్రజలు ఏండ్ల తరబడి ఎదురుచూసిన రైల్వే ఓవర్ బ్రిడ్జి నిర్మాణం ఆయనే వేయించారు.
టీయూ ఆయన చలువే
సీఎంగా వైఎస్ రాజశేఖర్రెడ్డి ఉన్నప్పుడు జిల్లాకు యూనివర్సిటీ సాంక్షన్ చేయించడమే కాకుండా దానికి తెలంగాణ (టీయూ) పేరు పెట్టించారు. వేలాది మంది ఉన్నత చదువులకు ఇప్పుడు వర్సిటీ సెంటర్ పాయింట్అయింది. రాజకీయపరమైన పలు అడ్డంకులు వచ్చినా మెడికల్ కాలేజీని తాను అనుకున్నట్లు పట్టుబట్టి నగరం నడిబొడ్డున ఏర్పాటు చేయించారు. గవర్నమెంట్ బీఈడీ కాలేజీతో పాటు ప్రస్తుత మున్సిపల్ కార్పొరేషన్ కొత్త ఆఫీస్ బిల్డింగ్కు డీఎస్ ఫండ్స్ఇచ్చి శంకుస్థాపన వేశారు. 2004–-09లో రాష్ట్ర మంత్రిగా ఉన్న టైంలో నిజామాబాద్ సెలక్షన్ గ్రేడ్ మున్సిపాలిటీకి కార్పొరేషన్ హోదా ఇప్పించారు. అనంతరం మున్సిపల్ కార్పొరేషన్ ఫస్ట్ మేయర్గా పెద్ద కుమారుడు ధర్మపురి సంజయ్కు బాధ్యత కట్టబెట్టారు. ఆయన చిన్న కుమారుడు అర్వింద్ బీజేపీలో చేరి 2019, 2024 ఎన్నికల్లో నిజామాబాద్ ఎంపీగా గెలిచారు. డీఎస్ సహధర్మచారిని విజయలక్ష్మీ గృహిణి.
అందరి గౌరవం పొందిన నేత
అర్గుల్ రాజారాం తర్వాత జిల్లా కాంగ్రెస్లో డి.శ్రీనివాస్ హవా నడిచింది. ఆయనను పార్టీ క్యాడర్ మొత్తం పెద్దమనిషిగా కీర్తించేవారు. ఇక మున్నూరు కాపు సామాజిక వర్గం ఆయనకు ఇచ్చిన గుర్తింపు, గౌరవం అసాధారణం. డీఎస్ను జీవితకాలపు గౌరవ అధ్యక్షుడిగా కొనసాగించారు. ఆయన చెప్పింది వేదంగా పరిగణించేవారు. బతికిఉన్నంత కాలం డీఎస్ అన్ని వర్గాలకు వెన్నుదన్నుగా నిలిచారు.
ప్రగతీనగర్ ఇంటికి పార్థివదేహం
హైదరాబాద్లో నుంచి డీఎస్ డెడ్బాడీని శనివారం సాయంత్రం నిజామాబాద్లోని ప్రగతీనగర్ ఇంటికి తెచ్చారు. భార్య విజయలక్ష్మీ, కొడుకులు ఎంపీ అర్వింద్, మాజీ మేయర్ సంజయ్, తమ్ముళ్లు సురేందర్, ప్రకాశ్ బంధువులు వెంట ఉన్నారు. తమ అభిమాన నేతను కడసారి చూడడానికి ప్రజలు తరలివస్తున్నారు. బైపాస్ రోడ్లోని డీఎస్ కుటుంబీకుల ల్యాండ్లో ఆదివారం అంతిమ సంస్కారాలు జరుగనున్నాయి. సీఎం రేవంత్రెడ్డితో పాటు ఆయా పార్టీలకు చెందిన రాష్ట్ర నేతలు హాజరవనున్నారు.
