ఓటర్లను చేరువయ్యేందుకు లీడర్ల ప్రయత్నాలు

•     కులసంఘాలకు గాలం, యూత్​పై నజర్
•     పెండ్లిళ్లు, పేరంటాలు, పరామర్శలు
•     సోషల్​మీడియా వేదికగా జోరుగా ప్రచారం
•     జిల్లాలో గరంగరంగా అసెంబ్లీ పాలిటిక్స్

నిజామాబాద్, వెలుగు :  అసెంబ్లీ ఎన్నికల్లో పోటీ చేసే లీడర్లు, ఆశావహుల ఓటర్లను చేరువయ్యేందుకు ప్రయత్నాలు ప్రారంభించారు. టికెట్ల ఖరారుతో బీఆర్ఎస్ అభ్యర్థులు, అభ్యర్థిత్వంపై ఆశగా ఉన్న ప్రతిపక్ష కాంగ్రెస్, బీజేపీ లీడర్లు డైలీ ప్రోగ్రామ్స్​నిర్వహిస్తూ, ప్రజల నోళ్లల్లో మెదిలేందుకు ట్రై చేస్తున్నారు. కార్యకర్తల ఇండ్లలో పెండ్లిళ్లు, పేరంటాలు ఏమున్నా అటెండయ్యేందుకు ప్రయార్టీ ఇస్తున్నారు. యువతను ప్రభావితం చేసే ఫేస్​బుక్, వాట్సాప్​ తదితర సోషల్​మీడియా ప్లాట్​ఫామ్ లలో ప్రచారాన్ని హోరెత్తిస్తున్నారు.

కారు.. జోరు..

బీఆర్ఎస్​ హైకమాండ్​ జిల్లాలోని అయిదు నియోజకవర్గాలకు సిట్టింగ్​ఎమ్మెల్యేలనే అభ్యర్థులుగా ప్రకటించింది. దీంతో బీఆర్ఎస్ అభ్యర్థులు తమ ప్రచారాన్ని ప్రారంభించారు. అర్బన్​ఎమ్మెల్యే గణేశ్​గుప్తా ప్రతిరోజూ నగరంలోని అయిదు డివిజన్లు తిరుగుతున్నారు. అభివృద్ధి పనులకు శంకుస్థాపనలు చేస్తూ ఓటర్లను కలుస్తున్నారు. యూత్​ను ఆకర్షించేందుకు ఇప్పటికే రెండుసార్లు జాబ్​మేళాలు నిర్వహించారు. రూరల్​ఎమ్మెల్యే బాజిరెడ్డి కుల సంఘాలకు ఫండ్స్​ఇస్తున్నారు. పెండింగ్​లో ఉన్న డెవలప్​మెంట్​పనుల ప్రారంభోత్సవాలు, శంకుస్థాపనలతో నియోజకవర్గంలో పర్యటిస్తున్నారు.

బోధన్​ఎమ్మెల్యే షకీల్ లబ్ధిదారులకు షాదీ ముబారక్, కల్యాణలక్ష్మి చెక్కుల పంపిణీకి చేస్తూ, లబ్ధిదారులకు భోజనాలు పెట్టిపంపుతున్నారు. ఇటీవల నియోజకవర్గంలోని యువతకు సొంత ఖర్చుతో డ్రైవింగ్​లైసెన్సులు ఇప్పించే కార్యక్రమాన్ని స్టార్ట్​చేశారు. షకీల్​భార్య అయేషా తన ఫౌండేషన్​ద్వారా హైస్కూల్​గర్ల్​స్టూడెంట్స్​కు సైకిళ్లు అందిస్తున్నారు. మంత్రి ప్రశాంత్​రెడ్డి, ఆర్మూర్​ఎమ్మెల్యే జీవన్​రెడ్డి కూడా కొత్తగా ఓటు హక్కు పొందినవారికి  డ్రైవింగ్​ లైసెన్సులంటూ యూత్​ మద్దతు పొందే ప్రయత్నాలు పడుతున్నారు.

గడపగడపకు కాంగ్రెస్​..

గడపగడపకు కాంగ్రెస్​పేరిట ఆ పార్టీ ఆశావహులు ప్రజల వద్దకు వెళ్తున్నారు. పార్టీ అభ్యర్థులు స్పష్టం చేయనప్పటికీ పబ్లిక్​మధ్య ఉండేందుకు ప్రయార్టీ ఇస్తున్నారు. ఎన్నికల ప్రచారం నేపథ్యంలో కాంగ్రెస్​సీనియర్​నేత, మాజీ మంత్రి సుదర్శన్​రెడ్డి అద్దె బిల్డింగ్​లో ఆఫీసు ఏర్పాటు చేశారు. ఆర్మూర్​లో తన అభ్యర్థిత్వాన్ని బలపరచాలని మార చంద్రమోహన్​ప్రచార వాహనాన్ని తిప్పుతున్నారు. ఆయనతో పాటు టికెట్​కు దరఖాస్తు చేసిన వారిలో మరో ఏడుగురు ప్రచారం షురూ చేశారు. అర్బన్, రూరల్, బాల్కొండ  రేసులో ఉన్న వారు  ఆయా నియోజకవర్గాల్లో నిరంతర కార్యక్రమాలు నిర్వహిస్తున్నారు. 

బీజేపీలో హుషారు.. 

సెల్ఫ్​ ప్రోగ్రామ్స్ కు తోడు పార్టీ నిర్ణయించిన కార్యక్రమాలతో బీజేపీ ఆశావహులు నిత్యం ప్రజల మధ్య ఉంటున్నారు. ప్రవాస్​ అభియాన్​ పేరుతో కర్నాటక, మహారాష్ట్ర, అసోం రాష్ట్రాల ఎమ్మెల్యేలు గతవారం జిల్లాలోని నియోజకవర్గాల్లో పర్యటించారు. ప్రస్తుతం మేరా మిట్టి – మేరా దేశ్​కార్యక్రమంతో పల్లెలోని ప్రతీ వీధిలో తిరుగుతున్నారు.  వారం కింద స్టూడెంట్స్​ఇష్యూస్​పై‌‌ ఎమ్మెల్సీ కవిత ఇంటిని, డబుల్​బెడ్​రూమ్​ ఇండ్ల పంపిణీ టాపిక్​పై రెండు రోజుల క్రితం ఆర్మూర్​ ఎమ్మెల్యే జీవన్​రెడ్డి ఇంటిని ముట్టడించారు. ప్రచారంలో భాగంగా సిట్టింగ్​ ఎమ్యెల్యేల వైఫల్యాలే టార్గెట్​గా విమర్శలకు పదును పెడుతున్నారు.