- కలెక్టరేట్ ఎదుట పెద్దమల్లారెడ్డి వాసుల ధర్నా
- దోమకొండలో ఎంపీడీవో ఆఫీస్ వద్ద బైఠాయింపు
- ప్రజాప్రతినిధులు బయటకు వెళ్లకుండా అడ్డగింత
కామారెడ్డి, కామారెడ్డి టౌన్, వెలుగు : దళితబంధు కోసం కామారెడ్డి జిల్లాలో రెండు చోట్ల ఆందోళనలు నిర్వహించారు. భిక్కనూరు మండలం పెద్దమల్లారెడ్డికి చెందిన దళితులు ట్రాక్టర్లలో కలెక్టరేట్ఆఫీసుకు వచ్చారు. గ్రామంలో 250 దళిత కుటుంబాలుంటే కేవలం 15 మందికే ఇచ్చారని, మిగతావారికి కూడా ఇవ్వాలంటూ కలెకర్టేట్ఎదుట ధర్నా నిర్వహించారు.
గ్రామంలోని బీఆర్ఎస్ ప్రజాప్రతినిధులకు వారికి అనుకూలంగా ఉన్న వారికే దళితబంధు ఇచ్చారని ఆరోపించారు. అర్హులైన ప్రతిఒకరికీ వెంటనే దళిత బంధు ఇవ్వాలని నినాదాలు చేశారు. అనంతరం కలెక్టరేట్ ఏవోకు వినతిపత్రం అందించారు.
దోమకొండలో..
దోమకొండ ఎంపీడీవో ఆఫీస్ ఎదుట దళితులు ధర్నా చేశారు. అర్హులైన వాళ్లకు దళితబంధు ఇవ్వాలంటూ పలువురు ఎంపీడీవో ఆఫీస్మెయిన్డోర్ ఎదుట బైఠాయించారు. అంతకు ముందే ఆఫీసులో ఎంపీపీ శారద, జడ్పీటీసీ తిర్మల్గౌడ్, బీఆర్ఎస్లీడర్లు ఎంపీడీవో ఆఫీసు లోపల బతుకమ్మ చీరలు, స్పోర్ట్స్కిట్లు పంపిణీ చేస్తున్నారు.
వీరిని బయటకు రాకుండా దళితులు డోర్ ఎదుట గంటన్నర పాటు ధర్నా చేశారు. ప్రభుత్వ ఉద్యోగాలు, పెద్దపెద్ద బంగ్లాలు ఉన్నవారికే దళితబంధు లబ్ధిదారులుగా గుర్తించారని ఆవేదన వ్యక్తం చేశారు. ఎమ్మెల్యే దృష్టికి తీసుకెళ్లి అందరికి న్యాయం జరిగేలా చూస్తామని ప్రజాప్రతినిధులు హామీ ఇవ్వడంతో విరమించారు. .
