ఎల్కతుర్తి, వెలుగు: ఇంటి, నల్లా పన్నులు చెల్లించాలని కోరుతూ హనుమకొండ జిల్లా ఎల్కతుర్తి మండలం తిమ్మాపూర్ పంచాయతీ సిబ్బంది శుక్రవారం గ్రామంలో దగ్గరుండి దండోరా వేయించారు. ముఖ్యంగా పన్నులు కట్టని వారి ఇండ్లు, షాపుల ముందు డప్పు కొట్టించారు. ఈ విధంగా చేయడాన్ని గ్రామంలోని కాంగ్రెస్నాయకులు తప్పుబట్టారు. వారితో స్వల్ప వాగ్వాదానికి దిగారు. కాంగ్రెస్ ప్రభుత్వం ఏర్పాటైన రోజే ఇలా బద్నాం చేయడం కరెక్ట్ కాదన్నారు. ఇన్నిరోజులు సైలెంట్గా ఉండి, కొత్త ప్రభుత్వం రాగానే దండోరా వేయించడం ఏమిటని ప్రశ్నించారు. ఉద్దేశపూర్వకంగానే ఇలా చేస్తున్నారని, తమ ప్రభుత్వంపై వ్యతిరేకత వచ్చేలా వ్యవహరిస్తున్నారని అసహనం వ్యక్తం చేశారు. వారిని పట్టించుకోకుండా పంచాయతీ సిబ్బంది దండోరాను కొనసాగించారు.
