రావణ దహనం.. ధర్మ విజయానికి నిదర్శనం..

 దసరా పండుగకు రామాయణం, మహాభారతం రెండింటితోనూ సంబంధం ఉంది. రామాయణం ప్రకారం.. లంకాధిపతి రావణాసురుడు సీతాదేవిని అపహరించి లంకకు తీసుకెళ్తాడు. సీతను రక్షించేందుకు శ్రీరాముడు, లక్ష్మణుడు, హనుమంతుడు, సుగ్రీవుడు, వానర సేన సహాయంతో లంకపై యుద్ధం చేస్తాడు. చివరకు రావణుడిని సంహరించి సీతాదేవిని తిరిగి తీసుకొస్తాడు. ఈ విజయానికి గుర్తుగా విజయదశమి వేడుకలు నిర్వహిస్తారు. 

రావణుడి భారీ దిష్టిబొమ్మలను దహనం చేస్తూ, శ్రీరాముడి విజయాన్ని స్మరించుకుంటారు. రామలీలా ప్రదర్శనలు, రావణ వధ ఘట్టాలు పండుగ సందడిని మరింత పెంచుతాయి. తెలంగాణలోనూ పలు ప్రాంతాల్లో ఈ వేడుకలను ఉత్సాహంగా నిర్వహిస్తారు.

 రావణ దహనం ద్వారా చెడుపై మంచి, అధర్మంపై ధర్మం సాధించిన విజయాన్ని చాటిచెబుతారు. ఎంతటి శక్తి ఉన్నా అధర్మం చివరకు ఓటమి పాలవుతుందనే సందేశాన్ని ఈ సంప్రదాయం అందిస్తుంది. చెడు లక్షణాలను విడిచిపెట్టి సత్యం, న్యాయం, ధర్మం వైపు నడవాలనే ఆలోచనను గుర్తుచేస్తుంది. 

ఈ ఏడాది విజయదశమి అక్టోబర్‌‌ 20న రావడంతో రాష్ట్రంలోని పలు ప్రాంతాల్లో రావణ దహన వేడుకలకు ఏర్పాట్లు చేస్తున్నారు. వరంగల్‌‌లోని ఉర్సు గుట్ట రంగాలీలా మైదానం, కరీమాబాద్‌‌, కాజీపేట ప్రాంతాల్లో జరిగే కార్యక్రమాలు స్థానికులకు ప్రత్యేక ఆకర్షణగా నిలుస్తాయి. 

నిజామాబాద్‌‌లోని ప్రొఫెసర్‌‌ జయశంకర్‌‌ మినీ స్టేడియం, ఆదిలాబాద్‌‌లోని డైట్‌‌ మైదానం సహా పలు ప్రధాన మైదానాల్లోనూ రావణ దహనం నిర్వహిస్తారు. ఆదిలాబాద్‌‌లో సనాతన హిందూ ఉత్సవ సమితి ఆధ్వర్యంలో ఈ వేడుకలు జరుగుతాయి. జగిత్యాల, కరీంనగర్‌‌ ప్రాంతాల్లోనూ కార్యక్రమాల సందర్భంగా ప్రజల భద్రతకు అవసరమైన ఏర్పాట్లు చేస్తున్నారు.

హైదరాబాద్‌‌లో రావణ దహనం 

హైదరాబాద్‌‌లోనూ దసరా వేడుకలకు ప్రత్యేక గుర్తింపు ఉంది. ఫలక్‌‌నుమా మల్లికార్జున దేవాలయం పరిసరాల్లో జరిగే వేడుకలకు కుటుంబాలతో కలిసి పెద్ద సంఖ్యలో సందర్శకులు తరలివస్తారు. గోల్కొండ, చింతలబస్తీ ప్రాంతాల్లోనూ రావణ దహనం కార్యక్రమాలు నిర్వహిస్తారు. సికింద్రాబాద్‌‌ పరేడ్‌‌ గ్రౌండ్స్‌‌, సరూర్‌‌నగర్‌‌ స్టేడియం వంటి ప్రాంతాల్లోనూ వేడుకలకు ఏర్పాట్లు చేస్తున్నారు. 

నాంపల్లి ఎగ్జిబిషన్‌‌ గ్రౌండ్స్‌‌లో రాజస్థానీ ప్రగతి సమాజ్‌‌ ఆధ్వర్యంలో ఐదు దశాబ్దాలకు పైగా రావణ దహనం నిర్వహిస్తున్న సంప్రదాయం ఉంది. సికింద్రాబాద్‌‌ పరేడ్‌‌ గ్రౌండ్స్‌‌లో రావణుడితోపాటు కుంభకర్ణుడు, మేఘనాథుడి దిష్టిబొమ్మలను కూడా దహనం చేసే కార్యక్రమాలు నిర్వహిస్తారు.

లోయర్‌‌ ట్యాంక్‌‌బండ్‌‌లోని ఎన్టీఆర్‌‌ స్టేడియం పరిసరాల్లో రామలీలా ఘట్టాలు, సంగీత కార్యక్రమాలు వేడుకల్లో భాగంగా ఉంటాయి. సరూర్‌‌నగర్‌‌ స్టేడియం, ఎల్బీనగర్‌‌, ఖైరతాబాద్‌‌, బోరబండ, నాగోల్‌‌ ప్రాంతాల్లోనూ రావణ దహన వేడుకలు నిర్వహించే సంప్రదాయం ఉంది. చిన్నారులు, యువత, పెద్దలు కుటుంబాలతో కలిసి ఈ వేడుకల్లో పాల్గొంటారు.