- భాస్కర్రెడ్డి పిటిషన్ కొట్టేసిన హైకోర్టు
- 15 రోజుల క్యాంప్ తర్వాత తిరొగొచ్చిన డైరెక్టర్లు
- రాజీనామాపై చైర్మన్ తర్జనభర్జన
నిజామాబాద్, వెలుగు: డీసీఓ ఉత్తర్వులతో నిర్వహించునున్న అవిశ్వాస సమావేశాన్ని రద్దు చేయాలని డీసీసీబీ చైర్మన్ పోచారం భాస్కర్రెడ్డి వేసిన పిటిషన్ను హైకోర్టు బుధవారం కొట్టేసింది. దీంతో గురువారం జరగాల్సిన నో కాన్ఫిడెన్స్ మీటింగ్కు ఏర్పాట్లు చేస్తున్నారు. వైస్ చైర్మన్ రమేశ్రెడ్డి ఆధ్వర్యంలో అవిశ్వాసాన్ని ప్రతిపాదించిన 15 మంది డైరెక్టర్లు బుధవారం గోవా క్యాంప్ నుంచి నిజామాబాద్కు తిరిగివచ్చారు. డైరెక్టర్లకు పోలీస్ భద్రత కల్పించారు. అవిశ్వాసం నెగ్గే అవకాశం ఉండడంతో భాస్కర్ రెడ్డి రాజీనామా చేయనున్నట్లు తెలుస్తోంది. కాగా రాత్రి 10 గంటల ప్రాంతంలో చైర్మన్ పేరుతో తన పదవికి రాజీనామా చేశారంటూ ఓ లెటర్ సామాజిక మాధ్యమాల్లో చక్కర్లు కొట్టింది. దీన్ని అధికారులు
కోర్టు తీర్పుపై కొనసాగిన ఉత్కంఠ
చైర్మన్ భాస్కర్రెడ్డిపై అవిశ్వాసం ప్రకటిస్తూ 15 మంది డైరెక్టర్లు సంతకాలు చేసి ఈ నెల 4న డీసీవో శ్రీనివాస్రావుకు లెటర్ అందించారు.15 రోజుల సమయమిస్తూ 21న స్పెషల్ మీటింగ్ నిర్వహిస్తున్నట్లు డీసీవో డైరెక్టర్లకు నోటీసులు పంపారు. బలపరీక్షలో నెగ్గేందుకు భాస్కర్రెడ్డి ఇద్దరు డైరెక్టర్లను తనవైపు లాక్కోడానికి విశ్వప్రయత్నాలు చేశారు. సాధ్యం కాక హైకోర్టులో రెండు పిటిషన్లు వేశారు.
డైరెక్టర్లలో తన పట్ల ఉన్న అసంతృప్తిని తొలగించడానికి వారితో మాట్లాడే అవకాశం కల్పించాలని కోరుతూ వేసిన పిటిషన్ను గత మంగళవారం కోర్టు కొట్టేసింది. దీంతో డీసీవో శ్రీనివాస్రావుకు నోకాన్ఫిడెన్స్ మీటింగ్ నిర్వహించే అధికారాలు లేవంటూ మరో పిటిషన్ వేశారు. మంగళవారం వాదనలు ముగియగా, కోర్టు తీర్పును రిజర్వ్ చేసింది. హైకోర్టు ఆర్డర్స్ ఎలా వస్తాయో అనే టెన్షన్ కొనసాగిన వేళ బుధవారం పిటిషన్ను కొట్టేస్తూ తీర్పు వెలువరిచింది.
అవిశ్వాసం నెగ్గితే..
భాస్కర్రెడ్డిపై అవిశ్వాసం నెగ్గితే ఇన్చార్జి చైర్మన్ బాధ్యతల్లో వైస్ చైర్మన్ రమేశ్రెడ్డి కూర్చుంటారు. తర్వాత పూర్తి స్థాయి చైర్మన్ ఎన్నికను నిర్వహిస్తారు. ఒకవేళ చైర్మన్ భాస్కర్రెడ్డి తన పదవికి రిజైన్ చేస్తే, వెంటనే చైర్మన్ ఎన్నిక చేపడతారు.
క్యాంప్ నుంచి వాపస్
బలపరీక్షలో నెగ్గడానికి చైర్మన్ భాస్కర్రెడ్డి డైరెక్టర్లను తనవైపు తిప్పుకునేందుకు ప్రయత్నించగా, ఆయనకు చిక్కకుండా మొత్తం 15 మంది ఒకేచోట క్యాంప్లో ఉన్నారు. మొదట హైదరాబాద్, తర్వాత గోవాకు మారారు. భాస్కర్రెడ్డి పిటిషన్లను కొట్టేస్తూ కోర్టు తీర్పివ్వడంతో డైరెక్టర్ల టీం బుధవారం హైదరాబాద్ చేరింది. మాజీ మంత్రి, బోధన్ ఎమ్మెల్యే సుదర్శన్రెడ్డిని ఆయన ఇంట్లో కలిసి నోకాన్ఫిడెన్స్ మీటింగ్లో వ్యవహరించాల్సిన తీరుపై చర్చించారు.
ఉదయం 11 గంటలకు జరిగే మీటింగ్కు అటెండయ్యేలా రాత్రే హైదరాబాద్ నుంచి నిజామాబాద్లోని ఒక హోటల్కు చేరుకున్నారు. డైరెక్టర్ల సెక్యూరిటీ కోసం వారు ప్రయాణించే బస్సు, బస చేసే హోటల్ వద్ద పోలీస్ బందోబస్తు ఏర్పాటు చేశారు.
